Read Nyishi 1 KORINTI 12 Bible Online

1 KORINTI 12 - Nyishi bible

1 KORINTI 12

¹Sija nulv Dvrwqbo yalwg lvqc cinam pagoqkam nulug xeqnam bvrwqngam gootadvn. Ngoqg vbw-bor tulu, nulv Dvrwqbo yalwg jvqtw pagoqkam cengmab doonam sam ngo alpa mwwma dvn.

²Nulv aal golo Nyoodo nyi nyil swwdul doodwkho, nulam turma bo murtiam xumdvb booxarl wgnum.

³Hoqgab ngo nulam bekin dvn, nulug pengko lo Pwnbog yal galoqkv agam goonbov hiyvkam “Jisun beeto,” hvl benyiram, ho Dvrwqbo yalv beg maalo hiyvkam, “Jisu At Sw jaq goknyi!” hvl benyiram.

⁴Yalwg lvqc cinamv ok oksub doodwn, hvbsujaqkam hoq lvqc tulungam cinbov yalv akinv.

⁵Asaq asaq bon nyisv doojaqkam, At Swv akin gotwq doodwn ham nyijdvn.

⁶Asaq asaq bon nyinam atorv doodwn, hvbsujaqkam hoq bon nyinnan atoram vxiam nyidynam bon hoq gab bulam mwlw jaqkam Pwnbo akin galoqkv jilinamv.

⁷Nyi mwlwg alko gab nyi vxiam yalwg lvqc cidynam mam cipan.

⁸Yalv nyi akgon mwwlaqnanam jidwn, akgon yalv nyijwq-nyegam belaqnannam jidwn.

⁹Hoq Yal akinv akgon mwwjwnam mam jidwn; hoqgv akgon vcboam mwpnan atoram jidwn.

¹⁰Hoq yalv akgon swrdorxeq bonam nyim dvb atoram jidwn, hoqgv akgon nyiqry bem dvb, hoo akgon Pwnbog puiyam belaq jaqb bekin mvdwb hoqgv akgon yalwg pagoqkam kaalaql bekin mvdwb la yalwg galoqkv nyimanam bvrwqngam kaacin mvdwb, hoqgv akgon agam taka maanam agam mam bemdvb jipan, hoqgv akgon agam tacin maanam agam mam tatwl hoqg benam mam bedar mviya dvb atoram jipan.

¹¹Hvbmabde hoq Yal akinv hiyvn hoggub jitayin mwv ham mwwg mwwlwqkob jipin jiral hog mwlw bonam nyidwn.

¹²Kristo gv vp akin hvb nyidwn, hoqgv naleqgo svmbwq-svmbwqb vigo doonam hvb nyisjaqkam hvraqb gv akin hoqgv lengdwn, gv akin lo all alaq vigo doonam hvb nyisjaqkam, nyiipv akin go.

¹³Hoq hvbkalam, ngulv mwlwngv Juhudi ge, Nyoodo nyi ge, nyera ge, nyet ge, gv akin gob nyidkub hvl Yal akin lo baptijum naapa kun, ho Yal akin lo ngul mwlwngam lokub twwbam mvdkub jipa kun.

¹⁴Hoggab gv dorpw si vp pwkin gob nyima dvn, hvbmabde all alaqngv naleqdvn.

¹⁵Lvpiangv “Ngo alaq ma, hoqgab ngo gv gab dooma dvn,” hvl bebaloqkam, hvbkam lvpiangv bedwb nyiram.

¹⁶Hoqgv nyurungv, “Ngo vnyiq ma, hoqgab ngo gv gab dooma dvn,” hvl bebaloqkam, hvbkam nyurungv belaram, ho nyurungv gv gab doomab nyilaram.

¹⁷Gv dorpwngv vnyiq cikin gob nyilaram, hoggub nyil tapa tayin? Ho gv dorpwngv nyuru gob nyiloqkam, hoggub nyil supa tayin?

¹⁸Sija hoggub nyil doodwn, hvbkalam Pwnbov mwwg mwlwqkob gv urasi all alaqngam luuxiam mwlwqpan.

¹⁹Gv dorpwngv all alaq rooxo nyiloqkam gv vpv dooram.

²⁰All alaqngv asaq sujaqkam, gv ngv akin dvn.

²¹Hoqgab vnyiqngv alaqngam benyiram, “Ngo nam doog nwma,” ho dumpongv kam aalam bedwb nyiram, “Ngo nam doog nwma.”

²²Hvb besjaqkam, ngulug gv lo doonbo tulug pengko lo tuugin ator maadwn hvb nyijaqkam, hoq tuluhv dooma lo ngulv hog nyinyimab ator maab nyitado.

²³Ngulug gv lo doonbo all alaqngam ngulv ximanam gob mwwdwn, hvbmab hoq torab yangam vi yab alwb kadub nyidwn, hoqgv gv lo doonbo hogloq all alaqngv kangam maadwn hoq tulungam mvg xibin yal anyab kadub nyidwn.

²⁴Ho kangam bo tulungam haajaqb xil paql kama jaqkam aldo, Pwnbov mwv atv mwlw jaqkam gv urasi vlwq tvl hoq tulu hoqkam xidynam mam xibin yamdvb mwj pan.

²⁵Hoqgab gv uralo doonbo all alaqg pengko lo haqmin sum mvma dvb, hvbmabde akwn akwnwg alko pagoqkam mwlwg alko gab mwwl swwm dvb jipan.

²⁶Gv loqkv all alaq gon vc baloqkam gv dorpwngv vcam hemba dvn. Hoqgv all alaq gonam paqb nyiloqkam gv dorpw ho doonbo mwlwngv hempam poba dvn.

²⁷Nulv mwlwngv Kristog gv vpv, hoqgv vxiv hoq gv hoqgv all alaqb nyidwn.

²⁸Dvrwq namlo uraho Pwnbov mwlwngam at atwg doodyko hv ap pan. Otuqjaqb, xuqnam tulu nyi, vnyi deenv nyiqry benbo tulungv, oum deenv tomswrbo, hoq kokwb swrdorxeq bonam nyinbo, hoq kokwb vcboam mwpbo, hoqgv svka kaanbo nyi tulu, hoqgv lamta kaakin bo, hoqgv agam tacin maanam agam mam benbo.

²⁹Bulv mwlw jaqkv xuqnam ma, nyiqry benbo tulu ma, tomswrbo ma, bulug vxiv swrdorxeq bonam nyidybo ma.

³⁰Hvbmab vcam mwpbo ma, ho tacin maanam agam benbo ma, hvbmab hognvkam bepakun ham bedar yanbo kama.

³¹Hvbmabde al al yaanbo lvqcnam ak gab nulug hangv mwwgdvl dooto. Hvbsujaqkam ham al yanbo lamta ak ngo nulam kaakin gvdwn si soq betanam torab si.