Read Nyishi 1 KORINTI 13 Bible Online

1 KORINTI 13 - Nyishi bible

1 KORINTI 13

¹Ngo nyob luuxig agam mam ho ao gumtwg agam mam belaq sujaqkam, ngoqg abynamv dooma baloqkam, ngo beta maabnyiloqkam tal jwwdin tvl dul doonbo hvb nyidwn.

²Hoqgv nyiqry tak kaal, mwlw nyijwq-nyegam mam cengl gonam cengjaqkam, ho ngo yorn puutungam mvxia naadwb mwwjwngam doog sujaqkam ngoqg abynamv dooma baloqkam ngo asarv.

³Hoqgv jwwgw nyi tulungam dvm dvb ngoqg nyet swwnam bumpwngam jixa tvl, hoq so ngo ngoqg gv vpamkam hoq pagoq gab wm parxia sujaqkam, ngoqg abynamv dooma baloqkam, hoq nyik hoqgv hog niqtuq ngoqgab dooram.

⁴Abynamv vigo cwqdwn ho ayadvn. Abynamv hang baqma dvn, atam paqs maadvn, xitor gob mwwma dvn,

⁵Abynamv hang baqma dvn, roogum maadwn, hang lengla maadwn, abynamv alman boam mwwgab maadwn.

⁶Abynamv almanbo gab hemp poma dvn, hvbmabde jvqtw bvrwq gab hemp podwn.

⁷Abynamv hog mwlwngam himw dvn, hog mwlwngam mwwjw dvn, hog mwlwngam hingwdvn cwqnnan atoram doogdvn.

⁸Abynamv nywywngam niiram, hvbmabde nyiqry kaanamv kam niitayin, nyob luuxig agam benamv kam nyiileq tayin, nyijwq-nyegam mvkam nyiita yukun.

⁹Hoggab ngulug nyijwq-nyegam mvkam vcwr gotwq, pwbw maab ngulug nyiqry kaanam mvkam vcwr gotwq,

¹⁰hvbmabde pwbwnam hv haak bolo hoq vcwrko hv niitayin.

¹¹Ngo ko anyo dvkho, ko anyo hvb agam goonum, ko anyo hvb mwwnum, ko anyo hvb mwwmwq mwwlwql mwwnum, kokw so ngo axa yikho, otuqg ko anyo nyinam wnam mwlwngam apaq tukun.

¹²Hvbmabde sija ngulv vrs lo kaanam hvb kaadar maab koodu dvn, hvbmabde ngulv nyuqm kalamv nywwrwq minsul kaapa tayin. Sija ngoqg nyijwq-nyegamv vcwr gotwq, hvbmabde hoq aalam, ngo hoggub nyil hog mwlwngam cengknum, hvbkalam ngo hog mwlwngam cengta yukun.

¹³Sija mwwjwnam, hingwnam hoo abynamv soq oum si doodo, soq oum pengko lo mwlw jaqkam koi yaan bov abynamv.