Read Nyishi 1 KORINTI 14 Bible Online

1 KORINTI 14 - Nyishi bible

1 KORINTI 14

¹Hoqgab nulv abynam mam tuugabto, hoqgv yalwg lvqcnam aky gab nulug hangv mwwgabto, mwlwngam koi yab Pwnbog puiyam bedwb atoram naadwb kwrwb nyito.

²Luusaq agam bedwb lvqcnam akv nyiig lvgab agam gooma dvn, hvbmab mwv Pwnbog lvgab goodwn, hoggab hoq agam ham hiyvkam tacin maadwn, mwv yalwg ator hoqgv nyiig cengmanam ura jvqtw agam mam goodwn.

³Hvbmabde hiyv nyiv Pwnbog puiyam nyi tulungam bekin dvn, svka dvn, biywr-beparl mwwngaml jamp dvb jidwn.

⁴Luusaq agam goonbo akv mwwg at gab aldvn, hvbmabde hiyv Pwnbog puiyam bekardvn, hoq nyi akv dvrwq namlongam svka dvn.

⁵Nulv mwlwngv luusaq agam belaq nyiloqkam ham ngo al mwwpa do, hvbsujaqkam Pwnbog puiyam bekarnan lvqcam nulv kaapa nyiloqkam ham hilayab alpa hvl ngo mwwbwq dvn. Hoggab Pwnbog puiyam bekarbo nyi akv luusaq agam belaqbo akam xibin yaanam gob nyidwn, hoggab luusaq agam benam mam nyi asaq akgon hoq niqtuqkam mwwg benam mam bekin maabnyiloqkam dvrwq namlo gab haajaq niqtuq dooiyin maadwn.

⁶Ngoqg vbw-bor tulu, hoqgab ngo nulug dookub vs jaqkam, ngo luusaq agam goobloqkam ngo nulgab hog niqtuq dookin maapa. Hvbmabde ngo nulug agaho Pwnbo galoqkv lengdynam mam, ho meeg cenglaqnam mam, ho nyiqry benam mam, ho hog biswrnam mam baql haab nyiloqkam altayin.

⁷Turma bo dvrab pengko lo dunbo dvrab piul ho maalo rwwxw-gungga ngv, bulug yal dunamv asaq asaqb tadar cekar dvb duma baloqkam, nyiingv hoggub hoq dunam mam tacinl cengtayin.

⁸Nyob padwb gamt tonam mam ho goqr ronam mam kvtaqb tadar maab nyiloqkam, hoggub nyil nyiv atam nyob patab wdwb hvl nwwxo uppuq mwx-mvaq tayin?

⁹Hoq hvbkalam nulv tacin maanam agam mam agamv beb nyiloqkam hoggub nyil tacin tayin? Hoqgab nulug agam goonamv kam dooiyib wpaq nvnpv.

¹⁰Gvda gvt so agamv hog hwdgo doodwn, hoq tuluhv akukam niqtuq doomabo dooma dvn.

¹¹Hvbmabde ngo hoq luusaq agam mam tacin maab nyiloqkam, hoq agam mam benbog kaagaho ngo nyob luusaq nyi gob nyidwn, hoo benbo akv ngoqg kaagaho mwv kam nyob luusaq nyi gob nyidwn.

¹²Hoqgab nulvkam yalwg lvqcnam akiam kaapa nwwdo, hoqgab mwwgab lalal dvrwq namlo swwgam kaagdvl hog mwlwngam nyito.

¹³Hoqgab luusaq agam benbo nyi akv mwwg benam niqtuq ham rub bekin dvb xuml ator koto.

¹⁴Hoggab, ngo luusaq agam lvgab xuml mvbaloqkam, ngoqg yalv xumdwn, hvbmabde ngoqg hangv mvvba maadwn.

¹⁵Hvb nyiloqkam ngo hoggub nyitayin? Ngo ngoqg yal galoqkv xumtayin, ho ngoqg hang ura soqkv xumtayin; ngo ngoqg yal ura soqgv bemin betayin ho ngoqg hang ura soqgv kam bemin betayin.

¹⁶Noqg yalv aro Pwnboam paqb nyiloqkam hoggub nyil nyi asaqkv noqg lvgab dooba bo nyiv “Amen” hvl noqg paql xumnam lvgab bela tayin. No hog hvl bedwn ham mwv cengma baloqkam hoggub nyilakam mwv cengram.

¹⁷Noqg Pwnboam paql xumnamv aljaq supa, hvbmabde noqg hoq xumnamv noqg ajin doognam nyi gab almab nyitayin.

¹⁸Ngam nulam laabo yaab luusaq agam mam belaqdvb jigam gab ngo Pwnboam paqdwn.

¹⁹Hvbmabde dvrwq namlo uraho xumyikam agam lwwyw go goom mam lingsam gomcwr ang go tacinam agam mam nyi asaqkam tomswr dvb ngo gootwqdvn.

²⁰Ngoqg vbw-bor tulu, nulv himy anyo mwwnam hvb mwwmabv, almanbo pagoqho himy vjwb nyito, hvbmabde hangv axa gob mwwto.

²¹Dvrwqbo Potalo xeqnamv doodwn, “At Sw bedwn, ngo nyob luusaq agam benbo nyi tulungam ngoqg nyi tulungam agam bem tayin. Nyoodo nyi tulug agam hoqgv ngoqg nyi tulungam ngo agam gootayin, hvbsujaqkam ngoqg nyi tulungv ngoqg agam mam taram.”

²²Hoqgab luusaq agam bemdvb lvqcnam si mwwjw maanbo nyi tulu gab sulak kaacin mvdwb jipan, hvbmab mwwjwbo nyi tulu gab ma, hvbmabde Pwnbog Tugu Puiyam bemdvb lvqcnam si mwwjwbo nyi tulu gab doodwn, mwwjw maanbo nyi gab ma.

²³Hoqgab dvrwq namlo uraho nyi mwlwngv olum gob hookum yukam nyi vxiv luusaq agam goorab baloqkam nyi asaqkv mwwjw maanbo nyi tulungv rugaqbo nyi gob bulv nulam beram i?

²⁴Hvbmabde nyi vxiv Pwnbog Tugu Puiyam bekar baloqkam, mwwjw maanbo nyi tulungv ho nyi asaqkv uraho haabaloqkam mwwjw maanbo nyiv ho nyi nyiisamv hoq Pwnbog puiyam tatwl, mwwg atwg nyicam mwwpal, atam pw-hwwka sul,

²⁵mwwg uraho nyis-nyipeql nyinam, mwwsil mwwnam mam hutoho kaadar cekar dvb kaapa tukul bulv Pwnboam mwwg nyicam bepal Pwnbog agaho kumbwl xuml mwv betayin, “Jvqtw jaqb Pwnbov nulug pengko so lokub dooba duknyi!”

²⁶Ngoqg vbw-bor tulu, ngo nulam soq sam bedwn, nulv xumtab hookum yukam nulv akwn bemin beto, akwn tomswrto, akwn Pwnbog galoqkv kaapanam puiyam betamto, akwn luusaq agam benam, hoqgv akwn hoqg luusaq agam benam mam bekin yaato, nyinam mwlwngv dvrwq namlo swwg pagoq gab nyinamv aldvn.

²⁷Ho hiyv nyi akgon luusaq agam betayin, vnyi maalo oum go bitwq dvb nyidwn, bulv akwn bexo-bexo mvtwl kokwb bedwb nyidwn; hoqgv hiyv nyi akgon nulug pengko hoqgv bulug benam hoq niqtuqkam bekin dvb nyidwn.

²⁸Hvbmabde hiyvkam hoq niqtuqkam bekinbo dooma baloqkam, luusaq agam goonbo nyi akv cooikab doodwb nyidwn hoo mwv atam la Pwnbog lvgab gool dootwq dvb nyidwn.

²⁹Vnyi maalo oum go nyiqry benbo tulungam goom to, hoo hoggv benum ham asaq tulungv mwwdy dvb nyidwn.

³⁰Hoqgv tal doodu bo nyi tulug pengko hoqgv hiyv akgon Pwnbo galoqkv agam tapa baloqkam, goodul doonbo akv mwwg goongongam apaq tvl cooikab doodwb nyidwn.

³¹Nyi mwlwngv cengdwb ho mwwngam dvb nulv mwlwngv akwn akwn Pwnbog Tugu Puiyam bebamto.

³²Tugu puiyam bekar mvdwb Pwnbog lvqcnam akv lvqc cinbo akwg alaqho dootwl bedwb nyidwn,

³³hoggab Pwnbov ngulam nyidar nyipar maab nyil swwm dvb mwwma dvn, hvbmabde swrsomalob lokub nyibam swwnam mam al mwwpa dvn. Pwnbog dvrwqbo nyi tulug mwlwngv dvrwq namlo lo nyinam hvbkalam nulug

³⁴dvrwq namlo hookam nyem tulungv dookum uraho cooikab doodwb nyidwn. Bulv agam goodwb nyima dvn, hoggab Juhudi tulug pvvbv bedwn, bulam dvrwq namlo lo hog nyim dvb jima maadwn.

³⁵Bulv hog cengdwb mwwba loqkam bulv namho bulug atwg nyolam toxto. Nyem nyobv dvrwq namlo uraho agam goongam maadwn.

³⁶Nulug pengko hoqgv i Pwnbog agamv lengnum? Ho nulug dook bwtwq i Pwnbog agamv haanum?

³⁷Hiyv nyiv atam atv nyiqry kaanbo gob, Pwnbog puiyam baqnbo gob ho yalwg lvqcnam mam kaapa pan mwwnbo nyi akv ngoqg soq nulam pota xeqnam si At Swg gamlv bo hvl cengdwb nyidwn.

³⁸Hvbmabde mwv sam hog xima baloqkam, mwam kam ximabv.

³⁹Hoqgab, ngoqg vbw-bor tulu, luusaq agam benam mam bitur maab bemto,

⁴⁰nyinam mwlwngam kvtaq alwb, nyicwjaqb nyil hindib nyiky dvb doodwn.