Read Nyishi 1 KORINTI 15 Bible Online

1 KORINTI 15 - Nyishi bible

1 KORINTI 15

¹Ngoqg vbw-bor tulu, ngo sija nulam ngo nulug agaho tugu pui bekin kunam mam ngo nulam bepadvn. Hoq puiyam nulv nvvrwqnum hoo ham mwwjw jwwxaml hvraqb doodu do.

²Hv sulak ngoqg nulug agaho tugu pui benam puiyv. Nulv ham nootul doog panyiloqkam nulv hoq galoqkv ywwt ywwnam mam kaapa tayin, hvbmab nyiloqkam nulug mwwjwnamv kam niqtuq dooma.

³Mwwjwngam xibin yaanam ngoqg gon kaapanam mam ngo nulam jisiq tukun, hoqhv dvrwqbo potalo xeqpwl apnam hvb Kristo ngulug nyic gab sinkun.

⁴Dvrwqbo potalo xeqnam hvb mwam nyubuho liiknum hoo aal loum deen aalho turab mvdwb jinum.

⁵Kokw so mwv Pitornvn la mwwg buu wyw leq vnyiam kaakinum.

⁶Kokw so mwv mwwg buu lwwg laleq agalo turab kunam mam lokub kaakinum. Ham kaanbov mvqlw yaanv sija godab turl dooxiqdo, tuugin sin kuba.

⁷Kokw so Jemsnvn la mwwg buu mwlwngam kaakinum.

⁸Mwlwngam kokw jaqso ko bwwd maadab ko bwwnam hvb nyinbo akam mwv ngamkam kaakinum.

⁹Buu mwlwg pengko lo ngo mwlwngam anyo yaadwn. Ngo buungv hvl goqd bvkam simp gob nyima dvn, hoggab ngo Pwnbog dvrwq namlongam mvnyi-mviyanum.

¹⁰Hvbmabde Pwnbog anyako galoqkv sija ngo siib nyidwn. Ho Pwnbog ngam anya nyanamv niqtuq doomab bonam maanum. Hvb nyistvl, ngo mwlw buu mwlwngam laabo yaab, ator yab bonam nyibin yaatkun, hvbsujaqkam soq nyinam si ngo at galoqkv nyima, hvbmab Pwnbog anyangv ngoqg lvgab nyibanum.

¹¹Hoqgab ngoqg galoqkv tapa jaqkam, bulug galoqkv tapa jaqkam, ngulv mwlwngv akinam bekar dvn, hoo nulv hoq akinam mwwjwto.

¹²Ngulug puiyv, Kriston siknam hoqgv turkur dukub mvpan hvl benam mam tatwl nulug pengko ho hoggub nyil sik bov turkur kuram hvl bedwn?

¹³Hoq benam hv jvqtwngv loqkam, Kristo siknam hoqgv turkur kuma.

¹⁴Hoqgab Kristo sinam hoqgv turkur kuma nyiloqkam, ngulug bekinam hv niqtuq dooma hoo nulug mwwjwnamv kam niqtuq dooma.

¹⁵Hoq aoho ngulv Pwnbog xaalyo bo hvvky gob nyipa ku, hoggab ngulv betkun Pwnbov Kriston siknam hoqgv turab mvknum hvl bekin tukun. Hvbmabde sinbo tulungam swwgwb turkur dukub mvkram hvl benam si jvqtwngv nyiloqkam Pwnbov Kriston kam turkur dukub mvma.

¹⁶Hoggab sinbo tulungam turkur dukub mvma loqkam, Kriston kam turkur dukub mvma pakun.

¹⁷Hoo Kriston turkur dukub mvma loqkam nulug mwwjwnamv kam niqtuq dooma, hoo nulv sija godab nulug atwg nyic nyik lamtaho hvraqb gaqkarl doodu dukun.

¹⁸Soq si hvlakam bedwb nyitado, Kriston mwwjwl sinbo nyi tulungv kam yuupaq nukun.

¹⁹Ngulv Kriston soq gvda so swwdy deedib aro mwwgwl swwd nyiloqkam ngulv gvda gvt so nyi mwlwngam al yaama bo nyi gob nyidwn.

²⁰Hvbmabde Kriston sinam hoqgv turkur dukub sinbo tulug pengko lo otuqjaqb turkur dvb mvnam si jvqtwngv, hoq hvbkalam sikbo tulungam kam turkur dukub mvtayin.

²¹Hoggab sinamv nyi akin galoqkv haanum, hoq hvbkalam siknam hoqgv turkur kunamv nyi akin galoqkv haadwn.

²²Adam galoqkv nyi mwlwngv hoggub siknum, hoq hvbkalam Kristo galoqkv mwlwngv swwgwb turkur dukub nyitayin.

²³Hvbmabde nyi vxiv at atwg sik hoqgv turkur tayin. Kristo otuqjaqb turkur cobv, hoq kokwb mwv haaikukam, mwwg nyi tulungv.

²⁴Hoq kokwb gvda gvtv niita yukun, Kristo yalam bvvnbo lvpw-hatwg atam, hoo hoqg atoram mwlwngam mviya tukul lvpw-hatiam Pwnbo Abwg alaqho gvqlwql jipaq tayin.

²⁵Hoggab Pwnbov mwwg ceebio ui nyemaq mwlwngam Kristog lvpia niikumho cooyul caatin maady deedib Kristo lvpwngam bvvl doog dvb nyitayin.

²⁶Mwlw jaqkam kokwb nyemaq mviya deenam akv sinam.

²⁷Hoggab Dvrwqbo Potangv bedwn, “Pwnbov hog mwlwngam mwwg lvpia niikumho ap pakun.” Soq si jvqtwngv, mwlwngam Kristog lvpia niikumho ap gvnkun, hengnam si hog mwlwngam Kristog lvpia niikumho apbo akam Pwnboam betaq ma.

²⁸Hvbmabde hog mwlwngam Kristog niikumho aptvl Kristog alaqho baqm dvb jixo kokwngam mwv atv ko tuupv atam Pwnbog alaqho hiyv hog mwlwngam mwwg lvpia niikumho ap jinbo Pwnbog alaqho dootayin, hoq kokwb Pwnbov hog mwlwngam mwwg alaqho bvvtayin.

²⁹Hvb nyiloqkam, sikbo nyi tulu gab baptijum naanbo nyi tulungv hoggub nyitayin? Sikbo tulungam turkur dukub mvkram nyiloqkam hoq nyi tulungv hog pagoq gab bul gab baptijum naapa kun i?

³⁰Hvnyiloqkam hog gab ngo mood vxiam sig-dorg ungho doodwn?

³¹Ngoqg vbw-bor tulu, ngo looxiam sig ungho doodwn, soq sam ngo ngulug At Sw Kristo Jisug tol nulam paql dingl bedwn.

³²Ngo nyia ko hangwb baql Ipisi so sudum svr lvgab nyob podul dooloqkam ngoqgab hognvk niqtuqkv dookin pa i? Hvbmabde sinbo tulungam turkurl swwm dukub mvma baloqkam, niitin ak tingamv bedwn, “Kuj dvt-twwtuj, hoggab aram mam ngulv sitai yuk.”

³³Booxar komabv, “Almanbo ajinv swwgam sooi yu dvn.”

³⁴Dvrwqbo nyiib mwwdar gvdkul nyic nyinam mam nyik maab apaq tuku. Ngo nulam bidil bedwn, nulug pengko lo tuugin Pwnbog agam mam cengmabov doodo! Ngoqg benam sam tatwl nulv meeg hvnyw mwwpa tvka.

³⁵Hvbmabde nyi akgon hvl tox tayin, “Hoggub nyil sikbo tulungam swwm dukub purab nyotayin?”

³⁶Bulv hoggub nyinbo gv soodinam baql turkur tayin! Damabo nyi no! No aaxiam liiyikam, hoq aaxiv sima lo svvnwb nyil swwrab maadwn.

³⁷Noqg liinam hv aaxy arongv, swwnbo ma, hoq aaxy hv amv kamsco ho asaq aaxiv sukamco, ho no ham svvnwb nyidwb swwrab dvb liima dvn.

³⁸Hvbmabde Pwnbov mwwg atwg mwwlwqkob aaxy cirxiam mvm doodwb jidwn, ho aaxy cirxiam hoq aaxy luu hoqg svvn gv vpam gvdwb jidwn.

³⁹Turl doonbo mwlwg soodinv aiyin maadwn, nyia kog gv soodinv ok sudwn, sudum svr soodinv asaq dvn, pvta gv asaq dvn hoo ngui vdinv asaq kalam dvn.

⁴⁰Ao gvdag gv ngv doodwn hoo gvda gvtwg gv ngv doodwn, hvbmabde ao gvdag kaabynamv ok sudwn ho gvda gvtwg kaabynamv ok sudwn.

⁴¹Doonyig kangamv ok sudwn, Poolwg kangamv ok sudwn, takar torab kangamv ok sudwn, hoqgv takar torabg pengko lo takar luusaq luusaq kalamv kangamv ok ok sudwn.

⁴²Soq sib kalam sulak sikbo tulungam turkur dvb purab yik aalam nyitayin; Svma liiknam hv sin bov ho sin boam turdkub purabnam hv nywywngam sima bov.

⁴³Svma liiknamv ator kuma dvn hoo kangam maadwn, hvbmabde turdkub purabnamv kangam dvn hoqgv atordvn.

⁴⁴Liinamv gv ayaqngv, ho turkur dvb purabnamv yalwg gv ayaqngv; gv soodinv doogam gab yalwg gv vpv kam doodwn.

⁴⁵Hoggab Dvrwqbo Potangv bedwn, “Otuq pwconam nyi, Adamnvn, turdub pwnum, hvbmab kokw jaq so pwnam Adamnvn swwgam jinbo yalam pwtaqnum.

⁴⁶Otuqb yalv lengco maadwn, hvbmabde gv ayaqkv lengco dvn, hoq kokwb yalv lengdwn.

⁴⁷Otuq pwconam Adam, ked lvgab pwlinum ho ked hoqgv lengnum, hvbmabde pwnyunam Adam ao gvda toloqgv ipoqnum.

⁴⁸Ked hoqgv lengn bo tulungv ked hvb nyidwn, ho ao toloqgv ipoqbov ao gvdag nyi ak hvbkalam nyidwn.

⁴⁹Ngulv ked hoqgv pwlinam nyi gob nyinam hvbkalam ngulv ao toloqgv ipoqbo nyi ak hvbkalam nyitayin.

⁵⁰Vbw-bor tulu ngoqg beta gvdwn si, gv soodinv la gv uiyv Pwnbog lvpw-haty lo haanyiram, hoo sidbo soodinv nywywngam sima bo soodinam kaapa nyoram.

⁵¹Ngo nulam ura pui ak bekin tvs, ngulv mwlwngv siram, hvbmabde tuuly miqtwr miqnyial miqd aalam, ngulv mwlwngv vnyiq nyiqyab kama dab, nyiqcw pel nyiqbio maadab ngulv swly taikun.

⁵²Tuuliv durab kalam sikbo tulungv nywywngam sitin maadkub turkur taikun hoo ngulv mwlwngv swly taikun.

⁵³Hoggab nyanboam nyama dukub swly dukub nyiky tayin ho sidbo tulungam nywywngam sima dukub swly dvb nyiky tayin.

⁵⁴Hoqgab soq sib nyirab yukam sinbo tulungam nywywngam sima dukub swly dvb mvpa kun, hoqgab sam Dvrwqbo Potalo xeqnamv doodwn, sam niqtuq lengm dvb nyitayin, “Sigam twrpa kun, mviyanamv niqtuq lengpa kun!”

⁵⁵“Sig, noqg mviyanamv hoglo? Sig, noqg un gvdwb mvnnan atorv hoglo?”

⁵⁶Sigv nyic hoqgv atoram naalayil un mvg dvn, hoo nyicv pvvb hoqgv atoram naadwn.

⁵⁷Hvbmabde ngulam mviyanan atoram ngulug At Sw Jisu Kristo galoqkv jinbo Pwnboam paqyalinco hvl paqdwn!

⁵⁸Hoqgab ngoqg tumanam vbw-bor tulu, nulv nywywngam biimab dooto. At Sw gab bonam haagab nyigdvl hoq niqtuqkam kaapa dvb mwwl looxiam topaq maab nyito nulug bon nyinamv nyisam ram.