Read Nyishi 1 KORINTI 16 Bible Online

1 KORINTI 16 - Nyishi bible

1 KORINTI 16

¹Judiya lo doonbo Pwnbog dvrwqbo nyi tulungam svka naadwb twngk kokumnam pagoqkam nulam xeqnum ham ngo sija bedwn, Galati dvrwq namlo tulungam nyim dvb ngoqg gaml jinam hvbkalam nulv nyito.

²Ngo nulug dookub haaikam nulv ngam kaatwl akiam kokum tamab, nulv nyi vxiv doonu de aalam, nulug twngk pookumnam hoqgv aky gab nvvbwql apto.

³Ngo nulug dookho wc yukam nulv xuqlinam nyi tulungam pota xiqlwql nulug aky jikumnam mam Jerusalem baql wwm dvb kanam tayin.

⁴Hvbmab aky jikumnam twngkv koi kvtaq baloqkam, ngo kam wdwb nyibaloqkam wtayin, ho bulv ngoqg lvgab wdwb nyitayin.

⁵Ngo Mesidoniyab wpeq layil hoq kokwb nulug dookub wtayin, hoggab ngo Mesidoniyab wpeq dvb nyipa.

⁶Ngo nulug dookho nulug lvgab apo gob dootayin, lokam tapam pool bumpwngam doodwb nyikam yinpv. Hoq kokwngam ngoqg wdyko nyookub hogloq wtayin hoqb nulv ngam wlwq ming yinpv hvl ngo mwwg dvn.

⁷Ngo nulam wpeql kvvtwq dvb mwwma, hvbmab At Swg anyangv doodwb jibaloqkam nulug lvgab lokub apo go doodwb mwwdwn.

⁸Ngo Ipisi so Pentikost aalv haanam gob dootayin.

⁹So jvqtw jaqb nyis poot jaqgo hoo xinam bonam koigo nyisv doopa, hvbmabde nyemaq uiyvkam vigo doos do.

¹⁰Timoti nulug dookub haaba nyiloqkam mwam nulv ayab nulug dookho doogto, hoggab mwv kam ngoqg nyinam hvbkalam At Sw bonam nyidu dvn.

¹¹Hiyv nyiv kam mwam mwwnyi-saqya mabka, hvbmabde nulv mwwg nyiody boonam mam swrso alwb boom dvb svka to, hoqgv mwam ngoqg dookub bor tulug lvgab wkur mvdkub jito, hoqgab ngo mwwg wkurnam mam kaayal hingwl doodu dvn.

¹²Bor Apolloswg pagoqho, ngo mwam nulug dookub bor tulungam boolayil nulam kaatab wtwk hvl vigo biywr-bebial betkun, hvbmabde mwv sija aposo wnw ma, kokwngam mwv wb mwwikam haasongam wi nvpv.

¹³Hengab dooto, hwngkw aljaqb biima mwwjwl dooto, haakam alwb mwwto, ator alwb mwwto.

¹⁴Nulug bon nyinam mwlwngam hang uraho abynam galoqkv nyito.

¹⁵Ngoqg vbw-bor tulu, nul mwlwngv Istepanaswn la mwwg imiq nyi tulungam cengdo, bulv atv atv Pwnbog dvrwqbo nyi tulungam kaadwb hvl bonam gvqbwql naag nukun. Bulv Akaiya gvdaho otuqcob Kristan swwco bov,

¹⁶nulv mwlwngv hoq hvk nyi tulug benam mam, bulug lvgab bonam svka kaamin gvl nyimin gvnbo nyi tulungam bugil swwto.

¹⁷Istepanas, Portunatus hoo Akaikus bulv haabnv nulv doomako gab bulv ngoqg vs-axaqngam kaagam gab ho pwwma boam pwwdwb nyigam gab ngo hemp al mwwpa dvn.

¹⁸Bulv nulug yalam biywr-bebianam hvbkalam ngoqg yalam kam biywr-bebial ap pakun. Soq sik nyi tulungam nulv kaacin to.

¹⁹Asiya gvda lo doonbo dvrwq namlo tulungv nulam bulug salam mam jilwqdo. Akiula la Prisilla, hoqgv bulug namho dookum bo Pwnbog nyi tulungv nulam At Swg emin gab tangam albo salam mam jilwqdo.

²⁰Vbw-bor tulungv kam salam jilwqdo. Akwn akwnam moopup pumin sugdvl vbw-bor jaqhvb nyil swwto.

²¹Soq ngoqg salam pota sam Poul ngo ngoqg atwg alaqngv xeql jilwq pakun.

²²Hiyv nyiv lajaqkam At Swn aby bomabov hoq nyi ak hv beenam gob nyinka! Maranata—Ngulug At Sw haato.

²³At Sw Jisu Kristog anyangv nulug lvgab dooba nvka.

²⁴Ngoqg Jisu Kriston aby bonnan abiv nul mwlwg lvgab dooba nvka. Amen.