Read Nyishi 1 KORINTI 2 Bible Online

1 KORINTI 2 - Nyishi bible

1 KORINTI 2

¹Ngoqg vbw-bor tulu, ngo nulug dookub Pwnbog ura jvqtw puiyam bedho ngo nulug agaho nyijwq-nyegam mam tacin lamanam agam benam mam ho cingngwr-cingtwr yaagub agam bemanum.

²Ngo nulug dookho lokub doodwkho hog mwlwngam mwwpa kumab Jisu Kristog la mwwg daapo ho sinam bvrwqngam mwwgab twql yvnum.

³Hoqgab nulug dookub ngo wdwkho ngoqg ator doomanum, hoo bos banv gv dorpwngv tvmdwr hwqnum,

⁴hoqgab ngoqg tomswrnamv la tugu pui bekinam torab hv nyia kog belaq-wlaqbo nyi benam hvb ngo benyi maanum, hvbmabde Pwnbog yalwg ator lvgab tvjw swsw dvb ator kaapanum.

⁵Ho nulug mwwjwnam nyia kog belaqko aoho hingw dvb nyima dvn, hvbmab Pwnbog ator aoho hingw dvb nyidwn.

⁶Hvbsujaqkam ngo yal lo axa kunbo nyi tulu gab pumb rwnam puiyam bekin dvn hoo soq gvda gvt sam benyioq dvb pumb rwnam ma, ho Atwg atoram soopaqbo ator ma.

⁷Ngoqg begdvn si Pwnbog uraho pumb rwnam puiyam bedwn, hoqham Pwnbov kol otuqho birwql apnum ngulam yuutaq nannam.

⁸Gvda gvt sam bvvl swwgbov tulungv hiyvkam soq sam mwwlaq maanum, bulv mwwlaqnam gonyiloqkam, bulv At Swg yuunam mam daapo ao tolo mengmab nyikam suba co.

⁹Hvbmabde, dvrwqbo potalo xeqpnam hvb, “Hiyvkam lok kam kaaka taka maata, ho hiyvkam nywywngam hvb nyiyi nvpbo hvl mwwmanam mam, Pwnbov mwam aby bonbo nyi tulu gab mwx-mvaql ap pakun.”

¹⁰Hvbmabde soq sam Pwnbov ngul gab hvl mwwg hangam ngulam cengm dvb mwwg yalwg svkangam jipan, yalv hog mwlwngam meexo yarol miyum kamab meegaq dvn, ho Pwnbog hang ura jaqlo doonbo pvvsil apnam bvrwq pagoqkam twq hublin dvn.

¹¹Nyi akgonwg hang uraho mwwnam mam hoq nyi ak hoqg yalv cingtwq dvn, hoq hvbkalam Pwnbog Yalv twq Pwnbog hog mwlw pagoqkam cingtwq dvn.

¹²Ngulv soq gvda gvtwg yalam kaapa ma, hvbmab Pwnbo ngulam jipoqnam hog mwlwngam cengm dvb ngulv Pwnbog jipoqnam Yalam kaapa pakun.

¹³Hoqgab ngulv nyia kov hang mwwnam agam tomswrnam hvb agam goomab, Yalv agam tomswrnam hvb yal doogbo nyi tulungam Yalwg jvqtw agam mam bekin dvb ngulv nyidwn.

¹⁴Hiyv nyiv Pwnbog Yalam doog maadwn hoq nyi hv Pwnbog Yalwg lvqc jipoqnam mam kaapa nyoma dvn. Ho yal kaapa maanbo nyiv yalwg jvqtw puiyam kam tacin maadwn, hoggab hvk nyi gab soq si dengky maanbov, ho yalwg pagoqkam yalv cengdwn.

¹⁵Hiyv nyiv yalam doogdvn hoq nyi hv hog mwlwngam pw-hwwdwb pagoqkam cengdwn, hvbmabde hiyvkam hoq nyi ak ham pw-hwwnyiram.

¹⁶Dvrwqbo Potangv bedwn, “At Swg hangam hiyv cengdwn? At Swn hiyv tomswr nyotayin?” Hvbmabde, ngulv Kristog mwwjam mwwdwn.