Read Nyishi 1 KORINTI 3 Bible Online

1 KORINTI 3 - Nyishi bible

1 KORINTI 3

¹Ngoqg vbw-bor tulu, ngo nulam jvqtw jaqb yalwg nyi tulungam benam hvb bema, hvbmabde nulam ngo soq gvda gvt soqg nyiib nulv nyijaqkam Kristog gab ko hoiyin gon begdvn hvb bedwb nyiknum.

²Nulv vcin ator boam dvnyimab, ko hoiyin nyigam gab ngo nulam gwwiyam hoonum, hoggab nulv atorbo dvsam dvnyi yooma daqnum. Sijakam nulv dvlaq yooma da.

³Hoggab sija godab nulv soq gvda gvt soqg nyi tulug nyinam hvb nyil dooxiqdo. Nulug pengko ho budy-seky hang baql akwn akwn lvgab yolu dumin sunam si, soq gvda gvt soqg nyi tulu hvb nyima dvn i?

⁴Nulug pengko hoqgv akgon begamv, “Ngo Poul gv,” akin begamv, ngo Apollos gv,” hvb nyid nyiloqkam, nulv soq gvda gvt soqg nyi tulug nyinam hvb nyima dvn i?

⁵Hvnyiloqkam, Apollos hiyv? Poul hiyv? Ngulv hvbaloqkam Pwnbog nyerangv hoo nulam Pwnboam mwwjw mvdwb nyig bov, bekinbov. Ngulv vxiv At Swg ngulam bon nyim dvb jinam mam nyidwn.

⁶Ngo aaxiam liinum, Apollos svvnam iss jinum, hvbmabde Pwnbov svvnam swwrab dvb jinum.

⁷Aaxy liinbo hvvkam hoo iss jinbo hvvkam hog xinam gob nyima, hvbmabde swwm dvb jinbo Pwnbog nyinam si xinam go, hoggab mwv svvnam swwrab dvb jido.

⁸Aaxy liinbo akwg la iss jinbo nyi vnyig pengko ho hiyv nvkam xibin yaadwb nyima, hvbmabde Pwnbov vnyi vnyig nyijongam jidynam mam Atwg bon nyinam mam hinglwql jitayin.

⁹Ngulv Pwnbog lvgab Pwnbo gab bonam nyibam bov hoo nulv Pwnbog rongongv.

¹⁰Ngam Pwnbog lvqc cinam mam ngo nam mvlaq lvqwrbo nammam diirab tukun, hoqgv akgon nammam mvrab gvdku, hvbmabde nam mvnbo nyi vxiv hengab jaqb atwg nam mvtaqho mvdwb nyiky dvn.

¹¹Hoggab Pwnbov Jisu Kriston rwwda ann gob mwwgwnv nammam mvrab pakun, rwwda dasaq go sija diigab dukub nyikma.

¹²Nyi tuugin hun, nyi tuugin rup, tuugin wlw xinam ho nammam mvrab nadwn, hoqgv tuugin svvdangam, tuugin wwngam, tuugin am piilam mvrab nadwn.

¹³Nyi vxig bonam al koram Kriston kaapa dvk aalam cingxiqtayin. Hoq aalam wmv lengtayin, nyi vxig bonam nyinam mam wm lvgab baal kvvdy tayin ho al kornam mam cingxiq tayin.

¹⁴Hiyvg nyiv diirabko jaqb nammam mvpan ham wmv guram, ho nam mvnbo akv mvjongam naatayin.

¹⁵Hvbmabde hiyv gam gutayin hoq nyi hv mwwg mvjongam kaaparam, hvbmabde mwv wm hoqgv kelinam hvb atv ywwtayin.

¹⁶Nulv jvqtw jaqb cengdwn, nulv Pwnbog doogw kov hoo Pwnbog yalv nulug uraho doodwn.

¹⁷Hoqgab hiyv nyi akgon Pwnbog doogw koam mudup dvn, Pwnbov kam mwam muiyutayin. Hoggab Pwnbog dookv dvrwqdvn. Nulv atv Pwnbog doogw kob nyidwn.

¹⁸Hiyvkam atam atv paca dvb mvmab. Nulug pengko ho hiyv atam ngo cengbin sviya nvbo hvl gvda gvt sam kaal benbo nyi ak hv paca cookur gvdkul dengky nyiib swwto.

¹⁹Hoggab gvda gvtwg vnyiq kaaga lo cengbinbo nyiv Pwnbog kaaga lo paca bo nyiib nyidwn. Dvrwqbo Potangv bedwn, “Pwnbov cengbinbo nyi tulungam bulug surub nyikho nootu dvn”;

²⁰hoo Dvrwqbo Potangv akta bedwn, “At Sw cengdwn, cengbinbo nyi tulug hang mwwnamv niqtuq dooma dvn”;

²¹Hoqgab hiyvkam nyi tulug bon nyinam pagoqho paqs dvb nyidwb nyima dvn. Hog mwlw luuxiv nulgab doodwn.

²²Poul, Apollos hoo Pitor, soq gvda gvt si, swwgv kam sigv, swnyw-soolo kam kuiyum mamkam, soq mwlw si nul gv.

²³Nulv Kristo gab doodwn, hoo Kristo Pwnbo gab doodwn.