Read Nyishi 1 KORINTI 4 Bible Online

1 KORINTI 4 - Nyishi bible

1 KORINTI 4

¹Nulv ngulam Kristog nyerangv ho Pwnbog hvvjw hara uraho hang mwwnam mam Pwnbog jvqtw gumnam bvvl doogbov hvl cengtwb nyido.

²Soq sib nammam kaaya bo nyera ak si nam atbog mwwjw hingjwnam hingwnam nyera gob nyidwb nyidwn.

³Sija ngam nulv jaqkam, ma hiyv lajaqkam pw-hwwnam pagoqkam ngo mwwdwq ma, hvbmab nyia kog pw-hwwk gab kam mwwdwq ma. Ngo atv kam atam pw-hwws maadwn.

⁴Ngoqg hangv dvrwq supa, hvbsujaqkam ngoqg soq mwwnam si ngo atam dvrwq sudnvbo hvl benyiram, ngam pw-hwwdy bo akv At Sw doodo.

⁵Hoqgab nulv hiyv ak gonwg aoho hiyv nvkam pw-hwwmabv hoggab pw-hwwd mood jaqkv hvvc maada. Pw-hwwtwr hwwnya aalv At Swg haanam gob kaayal doodwb nyitayin. Mwv haak bolo kan uraho kvsil apnam, nyi tulug hang uraho mwwsnam mam huto kob bvvlin taikun. Hoq aalam nyi vxiv Pwnbog galoqkv vjaqbo hvl paqdy konbo nyiv mwwg galoqkv paqk tayin.

⁶Ngoqg vbw-bor tulu, nulug al ko-gab ngo atam la Apolloswn doocil nulam bekin dvn ho nulam soq niitinam pagoqkam cengm dvb bedwn, “Swwg pagoqkam kvvdil swwto.” Nulug pengko ho hiyvkam akin xitwl akin bepaq taiyaq maabv.

⁷Nam hiyv nyiv asaqkam koi yaadwb mvpan? Noqg doog gvdwn mwlw ham Pwnbov jimab nam nyinum i? Hvnyiloq alpa, no hoggub nyitwl nyeram yaagub nyi galoqkv hog naama pan hvb bedwn.

⁸Nulv hog mwlwngam kaapa paku i? Nulug aiyaqngv sija bwpaku i? Nulv nyet paku i? Ngulv dooma jaqkam nulv lvpw atwb swwnyia paku i? Ngo mwwgamv ngulv kam nulug lvgab lvpw at swwba dvn, nulv jvqtw jaqb lvpw at swwnyiloqkam aljaq bade.

⁹Ngoqg kaanamv ngulam xuqnam nyi tulungam Pwnbov nyi mwlwg kokw jaqb sim dukub mwwrwl ap kunam hvb mvpa ku, hoggab ngulv gvda gvtwg agaho ao gumtwg kaagaho la nyia kog kaagaho kaabia dvb kaanam poot gob nyipa ku.

¹⁰Kristo gab ngulv pacangv, hvbmabde nulv nyijwq-nyegam cenglaqbo nyiv, ngulv ator maanbov, hvbmabde nulv atorbov, ngulv ximanamv, nulv xinamv.

¹¹Sija nagub ngulv kano hvngwrb vj koopa maab, nyi tulug jiikumnam, nam doomab gaqkar yvnbov,

¹²ho atwg alaqngv kwrwb bonam nyil vj orioq kosdvn. Ngulam beenbo nyi tulungam ngulv bulam lvqc cidwn, ngulam mvnyi-mviya boam ngulv ham himw gvdwn.

¹³Ngulam nyi tulungv tob buikam ngulv bulam aya alwb agam goorwq dvn. Ngulv gvda gvtwg kusuq-taram ho kac-kanyiaq olum gob sija godab nyil doodu dvn.

¹⁴Ngo nulam hvnyw xeqpa dvb mwwl soq sam xeqma, hvbmabde, nulam ngoqg atwg tumanam ko tulu jaq hvb mwwl tomswr dvb bedwn.

¹⁵Hoggab nulam kvvyw-tada bov lwwyw go doosjaqkam, nulug abv ab akin gotwq doodwn. Hoggab Jisu Kristog uraho lokub swwk pagoqho ngo nulam Tugu Puiyam baqa jikgab, ngo nulug abwb nyidkun.

¹⁶Hoqgab ngo nulam xuml bedwn, nulv ngoqg nyinam wnam mam kaagwl swwto.

¹⁷Soq pagoq gab ngo nulug dookub, ngoqg atwg ko tuup tumanam, mwwjw albo Kristan Timotinvn kanam gviyin. Mwv nulam ngoqg wtaqlo dvrwq namlo tulungam biswrnam, ngoqg nyicwngam Jisu Kristog uralo nit swwgam kaapal swwnam gamlam bepa yinpv.

¹⁸Nulug pengko lo nyi tuugin ngo nulam kaatab haakram mwwbnv ab bokum gob nyil doodo.

¹⁹At Sw mwwl kanam baloqkam, ngo nulug dookub vnwqb haatayin, ho ngo atv soq nyi tulug ator tornam mam bulam kaakin tayin. Bulug agam benam mam twq taram.

²⁰Hoggab Pwnbog lvpw hatig bvrwqkv agam goonam arongv twqma, hvbmabde ator bvrwqngv doodwn.

²¹Ngam nulug dookub dvvp bwtwl haato hvl bed nvi yv, hvbmab abynam hang ho hang nyinyiaqnam mam baql haato hvdwn? Hogloq ak ham nulv mwwbwq pa?