Read Nyishi 1 KORINTI 6 Bible Online

1 KORINTI 6 - Nyishi bible

1 KORINTI 6

¹Nulug pengko ho ak gonwg aoho yolu besv dooikam nulv hognvk haakamv, nulv nyi Nyoodo nyiig bvrwq benbo ogumho, Pwnbog nyi tulungam yolungam pvvb pam taab wdwn?

²Pwnbog nyi tulungv aal golo gvda gvtam nyel dool pw-hwwtayin hvl nulv cengma dvn i? Nulv gvda gvtam pw-hwwdwb ator dood nyiloqkam, anyoko bvrwq ham pvvb panyi maadwn i?

³Ngulv ao gumtw tulungam pw-hwwdwb nyitayin ham nulv cengma dvn i? Hoqgab ngulug soq swwg pagoqkam pw-hwwma dvb ham bedwb nyima.

⁴Hvnyiloqkam hoq hvk bvrwqngam nulv Pwnboam cengmabo, dvrwq namlo agaho doonbo nyi tulungam bvrwqngam pvvb pam dvb nulv bulug dookub wtayin i?

⁵Nulam ngo mvg hvnyw mvdwb bedwn. Nulug doobam pengko lo nulug yolungam pvvb pady bo nyijwq-nyegam bvrwq belaqbo nyi akukam vbw-borgo dooma i,

⁶hvb bonam apaqtvl nulv akin ceebiob akin nyel pukumho yolu betab mwwjw maanbo nyi tulungam nulug yolungam mvl pvvb pam dvb jikub dvn!

⁷Nulv akwn akwn mwwkur tamab mvmin suk gab hog mwlwngv yuupaqnam gob nyipa. Soq sib nyita maab, nulam nyinyi-nyianam mam nyimuram cwqma dvn yv? Hvbmab nulam roqxinl naareq mvknamv alyapa i?

⁸Hvbmabde nulv atv atv akwn akwn nyimur-wmurl doom mam lingsam.

⁹Nulv jvqtw jaqb cengl doodo almanbo nyi tulungv Pwnbog lvpw-hatiam kaapa nyoram. Yocu-yabio bov, murtiam xumn bov, nyiig nyem mam yocu-yabio bov, nyemv nyem mam, nyegangv nyega kalam mam nyimin sun bov, dvcobov, nyiig dvrab pam kaaby bov, roogum bov, twwxum bov, tob-tai bov hoo lvpwg pvvbam tama bov mwwg buu pengko hoqgv hiyv akgon kam Pwnbog lvpwngam kaapa nyoram.

¹⁰Dvco bov, kiic bov, twwxum bov, tob-tai bov, hvk nyiv Pwnbov lvpw tol haalaram.

¹¹Nulug pengko lo hvb nyil tuugin swwnum. Hvbmabde nulam sija nulug nyicam nyedar darxaq pakun ho nulam Pwnboam jipaq pakun, hoqgv Pwnbog lvgab alwb swwm dukub At Sw Jisu Kristog emin gab ngulug Pwnbog yalv nulam kvtaq dvb mvpa kun.

¹²Akgon betayin, “Ngo hog mwlw luuxiam nyijaqkam alv.” Hvbmabde luuxy cirv ngoqgab al maadwn. Ngo kam bedwn, “Ngo hog luuxiam nyingam su,” hvbmabde ngam kokwngam nyera bodybo ham ngo nywywngam nyiram.

¹³Nyi tuugin bedwn, “Dvnamv kepo gab ho kepongv dvn dvb doodwn.” Vjaqsu; hvbmabde Pwnbov soq vnyi sam lok dooma dvb mvtayin. Nyiig gv vp si yocu-yabio dvb ma, hvbmabde At Sw gab bon nyindvb doodwn, ho At Sw gv dvsam jidwn.

¹⁴Pwnbov mwwg atwg ator hoqgv At Sw Jisun sik boam turab dukub jinum, ho hoq hvb ngulam kam mwv turab dukub jitayin.

¹⁵Nulv cengdo nulug gv all alaq torab pv Kristog all alaqb nyidwn. Hvnyiloqkam Kristog all alaqkam baqtwl ham yocu-yabio nyikar natayin dvn i? Hvbram, hvb nyima buj.

¹⁶Lokam nulv cengmab nyimaco, yocu-yabio nyikarbo lvgab hiyv nyiv yvba dvn, hoq nyi ak hvvkam hoq nyem lvgab gv ayaqkv akin gob nyidkun. Dvrwqbo Potangv bedar cekarl bedwn, “Gv vnyiv akin gob nyitayin.”

¹⁷Hvbmabde hiyv atwg gv ayaqkam At Swg lvgab jitayin, hoq nyi hv yalv At Swg lvgab akin gob mwwg lvgab swwtayin.

¹⁸Yocu-yabionam mam apaqto. Hog mwlw nyic nyinamv gv soodin gab hog nyima dvn, hvbmabde hiyv yocu-yabio nyinam nyic nyidwn, mwv atwg gv ayaqngam ceebio baql nyic nyidwn.

¹⁹Nulug gv vphv Pwnbog doogw kov bo hvl nulv cengma dvn i? Pwnbog jinam Dvrwqbo yalv nulug uraho doodwn ho nulug gv vphv Pwnbog doogw kov hvl nulv ham cengma dvn i?

²⁰Nulv atwg mwwkwb nyimab, hvbmabde nulam mwv xinam jaqkv rvn pakun. Hoqgab nulug gv ayaqkam Pwnbog gab nyin wnto.