Read Nyishi 1 KORINTI 7 Bible Online

1 KORINTI 7 - Nyishi bible

1 KORINTI 7

¹Nulv ngam pota xeql toxnam pagoqkam ngo bedwn; nyegangv nyem naamanamv alyadwn.

²Hvbmabde nyis-nyipeql yocu-yabio nyinam mam nyima dvb nyega vxiv at atgab nywxw lo naal doogto, ho nyem vxiv atv atgab nyol loq doogto.

³Nyegangv atwg nyem mam jidynam mam, ho nyemv atwg nyegangam jidynam mam jiminsul akwn akwn hang xumin sudub nyiba suto.

⁴Nywxwngv sija mwnwg gv ayaqngv at gab nyik maadwn, hvbmabde nyol gab doodkun; hoq hvbkalam nyegangv kam mwwg gv ayaqngv mwwg gab dook maadwn, hvbmab mwwg nywxw gab doodkun.

⁵Nulv akwn akwn apaqmins maabv, hvbmab Pwnboam swgw dvb goobwq mins gvdwl hoq mood aro gab aado minsul oyu yooma go dootwqto, ho kokwngam otuq hvb lokub nywxw nyol boominsul dooto; hoggab cwqla maab nyita kolo Uiyv lokam supdvn.

⁶Ngo nulam soq sam ngoqg hang mwwnam mam bedwn, hvbmab gaml jimala i hvbmab tomswrnam gotwq su.

⁷Nyi mwlwngv nulv ngoqg sib asarb doodwb doonyi loqkam al kinbanyi hvl ngo mwwdo; hvbmabde nyi vxiv mwlwngv Pwnbog galoqkv at atgab lvqc cinam mam ak maalo ak asaq asaqb kaapa pakun.

⁸Nywxw naama bo hoo xwwmy nyi tulungam ngo bedwn, sija doodwn hvb hvraqb nulv vpwb ngoqg sib swwl doob nyiloqkam alyatayin.

⁹Hvbmabde nulv cwqla manyiloqkam nyegangv nyem naato ho nyemv nyol naato. Cwqla maab hog looma twqb nyim mam lingsam nyem naanamv la nyol naanamv alyatayin.

¹⁰Nyem-nyega naakbo nyi tulug gab ngo gaml ak jidwn, soq si ngoqg galoqkv ma, hvbmabde, At Swg galoqkv. Nyega dook bo nyemv atwg nyolam apaq maabv.

¹¹Nyemv nyolam apaq kubloqkam mwv asarb vpwb doodwb nyitayin, hvbmab loqkam mwwg nyol lvgab lokta anyab doobam dvb nyitayin. Nyolv kam mwwg atwg nywxwngam apaq dvb nyiky maadwn.

¹²Asaq nyi tulungam ngo bedwn, (At Sw gaml jima su) Kristan nyi ak mwwjw maanbo nyem ak nywxw boopa loqkam, hoq nyem ak hv mwwg lvgab dooba tayin hvl bebaloqkam mwnwn doogto, apaq dvb nyiram.

¹³Kristan nyem ak mwwjw maanbo nyi ak nyol boopa loqkam, hoq nyega ak hv hoq nyem lvgab lokub dooba tayin hvl looba loqkam hoq nyem ak hv mwam apaq dvb nyiram.

¹⁴Hoggab mwwjw maanbo nyega akv mwwg nywxw lvgab lvkin gob dooba ko-gab nyega akam Pwnbo dvrwqbo hvl loorwq dvb nyidkun; hoq hvbkalam mwwjw maanbo nywxw akv Kristan nyol bogam gab mwwg nyol galoqkv mwam Pwnbov loorwq dvb nyipa kun. Hvb nyima loqkam bulug ko tulungv dvrwq maanbo nyi gob nyid nvpv, hvbmabde bulv Pwnbog kaagaho sija dvrwq dukun.

¹⁵Hvbmabde mwwjw maanbo swwbamnam akv Kristan ajin akam apaq dukub mwwbaloqkam mwam mwwg mwwkwb nyimto. Soq svk pagoq so Kristan akv, nyem suge nyega suge atwg mwwlwqkob nyidub nyidwn. Hoggab Pwnbov nulam swrsomalob swwm dvb dvgoq goqpa kun.

¹⁶Kristan nywxw no, hoggub nyil noqg nyolam ywwny ram hvl hoq pagoqkam cengdwn i? Ho Kristan nyol no, hoggub nyil noqg nywxwngam ywwny ram hvl hoq pagoqkam cengdwn i?

¹⁷Nyi vxiv mwam At Swg lvqcnam hvbkalam mwam Pwnbov goqdwkho hoggub nyinum hvb nyil swwto. Soq tomswrnam akin sam ngo dvrwq namlo mwlwngam tomswr swrkin yin.

¹⁸Pepaql-muxnam nyi akgon Pwnbov dvgoq goqnam mam tvrwq panyiloqkam mwv pepaql-muxnam un paiyam mvxia dvb nyimabv, ho hiyv ak gon pepaql-mux maanam nyiam Pwnbov dvgoq goqpa kun, mwv pepaql-mux mvdwb nyikram.

¹⁹Pepaql-muxnam jaqkam pepaql-mux majaqkam hog nyiram, hvbmabde Pwnbog gamlam bugil tal swwnamv sala jaqkv.

²⁰Nyi vxiv Pwnbov mwam hoggub nyidub dvgoq goqpan hoq hvbkalam dooto.

²¹Pwnbov nam goqdwkho no nyerab swwl doonum i? Hvb nyipaloqkam ham mwwdwq maabv, hvbmabde nyera swwnam hoqgv lengd kub nyito, nyet nyi gob nyito.

²²Nyerab swwl doonbo nyi akam At Sw dvgoq goqpa nyiloqkam mwv At Swg nyedar darlin kunam yolu doomabo nyet nyiv. Hoq hvbkalam hiyvn yolu doomabo nyet nyiam Kristo dvgoq goqpa kun hoq nyi ak hv Kristog nyerangv.

²³Pwnbov nulam xinam jaqkv rvlin napa kun. Hoqgab nulv nyi tulug nyerab swwmabv.

²⁴Vbw-bor tulu nulam Pwnbov hoggub nyil doodub goqnum hoq hvbkalam nyil vxiv Pwnbog lvgab lokub dooto.

²⁵Nyem mvvngam tulug pagoq so nulv ngam pota xeqnum; hoq pagoq so ngo At Swg galoqkv hog gaml jima su, hvbsujaqkam ngoqg hang mwwnam mam At Swn mwwjwl anyanam nyi akgon nyil bedwn.

²⁶Apo soqg nyelin dors sam mwwka yukam ngo mwwnamv nyem naama daqnbo nyiv hvb asar doonam si alyado.

²⁷Noqgv nywxw doos i? Dood nyiloqkam ham apaq dvb mwwmab. No nyem naama da i? No naama da nyiloqkam, nyem naatnvp mwwl nyem meegaq maabv.

²⁸Hvbmabde no nyem naagam gab no nyic nyima dvn, ho nyol booma daqnbo nyemv nyol boonamv nyic nyima dvn. Hvbmabde bulv gvda gvt soqg nyelinam hendvb nyitayin. Nulam ngo aya mwwpa do, ho soq nyelin soqgv ngo nulam naalin dvb mwwdo.

²⁹Hvbmabde, ngoqg vbw-bor tulu, ngo sam nulam bedwn, moodv oyu kuma; sija galoqkv nywxw boonbo nyi tulungv nywxw boomabo nyi hvb nyil doodub nyitayin.

³⁰Nyiqs tanap lengn bo nyi tulungv hog hvvdwq maanbo hvb, hemp ponbo nyi tulungv hemp poma bo hvb, kor rvnbo nyi tulungv bulv kor rvma pan hvb,

³¹ho gvda gvt soqg nyet-nyeram doogbo nyi tulungv bulv hog gokam doog maanbo hvb nyitayin. Hoggab soq gvda si dooyuram, oyu maadab niitayin.

³²Ngo nulam mwwdwq dwqnam hoqgv aado mvdwb mwwdwn. Nywxw booma daqnbo nyiv At Swg bon nyig pagoqkam mwwdwq dvn, hoggab mwv At Swn hoggub nyil hang xumdub nyitayin ham mwwgab dvn.

³³Hvbmabde nywxw doonbo nyiv gvda gvtwg pagoqkam mwv mwwdwq dvn, hoggab mwv mwwg nywxwngam hoggub nyil hang xumdub nyitayin ham mwwdwq dvn.

³⁴Hoqgab mwwg hangv luunyi gob mwwdwn. Nyol booma daqnbo nyem nyijwrv mwv At Swg bon nyikor pagoqkam mwwdwq dvn, hoggab mwv mwwg hang uraho ceceq jaqb mwwdwq dvn. Hvbmabde nyol bookbo nyemv gvda gvtwg bon nyig pagoqkam mwwdwq dvn, ho mwwg nyolam hoggub nyil hang xumdub nyitayin ham mwwdwq dvn.

³⁵Ngo nulam soq begdvn si nulam svka dvb mwwl bedwn. Hvbmabde ngo nulam bitur dvb bema, hvbmab ngo nulam albo ho nyikinam bonam nyim dvb mwwdwn, ho nulam atam At Swg bon gab hog gokam mwwsil pvvkur maab jipaq mvdwb mwwdwn.

³⁶Nyem begaql ap kunbo nyega akv nyem naakram hvl betwl, mwv si alwb nyima mwwl, mwv cwqla maab nyiloqkam, ho mwv nyem naadkub mwwb nyiloqkam, bunyig mwwlwqkob nyem naamin sumto. Soq nyik so nyic dooma dvn.

³⁷Hvbmabde hiyv nyiv, hiyvkam bemab, atwg hangv nyem naama dukub mwwbwql, atwg hangv jvqtw jaqb cwqdwb mwwr kunbo nyi akv begaql apnam nyem akam naama jaqkam alpa.

³⁸Hoq nyem begaq kunam mam naanbo nyi ak hv alwb nyipa, hvbmabde begaql apnam nyem akam naama bo nyi ak hv ham al yaanbo bonam nyidwn.

³⁹Nyol doonbo nyemv nyolv simab dood deedib mwnwg mwwkwb nyidub nyima dvn, hvbmabde nyolv siro baloqkam nyem akv nyega asaq ak mwnwg mwwlwqkob naadwb nyidwn. Hvbmabde Kristan swwnbo nyegangam naadwb nyidwn.

⁴⁰Hvbsujaqkam mwn nyol naatin maab doob nyiloqkam mwn gab alyatayin. Soq si ngoqg hang mwwnamv, ngo mwwjwdvn, ngo Pwnbog yalam doogtvl sam bedwn.