Read Nyishi 1 KORINTI 8 Bible Online

1 KORINTI 8 - Nyishi bible

1 KORINTI 8

¹Ui pan nannam dvnam dvma pagoqkam nulv pota xeqnam. Bvrwqkv si, Ui pan nannam dvnam pagoqkam ngulv mwlwngv cengdwn. Nyijwqkv jiqmur dvn hvbmabde aby bonamv bobuq dvn.

²Hiyv ngo cengs dvnbo mwwnbo nyi akv mwv jvqtw jaqb hog gokam mwwg cengdynam ham kam cengma dvn.

³Hiyv nyiv Pwnboam abydvn ham mwv cengdwn.

⁴Hoqgab ui pan nannam dvnam bvrwqngam ngulv cengdwn, murtiv hvbaloqkam gvda gvt so jvqtw jaqb dooma boam xumsamnamv; hvbmab ngulv cengdwn Pwnbov akin gotwq doodwn, hoq aoho asaq gook ak dooma dvn.

⁵Swcw nvg aoso ho ao gvda tolokam pwnbo tulug emin naanbov vigo doodwn, ho pwnbov kam naleqdo, ho atv kam naleqb doos jaqkam

⁶hvbmabde ngulug gab nyiloqkam Pwnbo Abv akin gotwq, mwv hog mwlw hoolu luuxiam Twrw-tvnbov, ngulv mwwg gab swwl doodwn, At Swv akin gotwq, hoq ak hv Jisu Kristo, mwv hog mwlwngam pwnum ho mwwg galoqkv ngulv swwdwn.

⁷Hvbmabde soq si jvqtwngv hvl mwlwngv cengma dvn. Nyi tuugin kolwg otuqg nyicwngam nyil sija godab doogam gab bulv ui pan nannam dudul doodo, ho bulv ui pan nanv hvl cengtwl ham dvnam gob mwwl dvdo, hoggab bulug mwwdynan hangv ator ma, hoqgab bulug dvnamv kac dubur dvn.

⁸Hvbsujaqkam ngulug dvnam hoqgab ngulam Pwnbov loomab haqpaqram, ho ngulv dvmab nyijaqkam ngulug gab hog nyiram ho dvjaqkam ngulv hog kaaparam.

⁹Hvbsujaqkam nulv hengab to, nulug soq mwwjwnam ator sam mwwjwl ator maanbo gab duqtup ter gob nyil nyic nyim maab.

¹⁰Hoggab hiyv nyi gon mwwdynan ator dooma bov bor ak gonam xumk nam uraho ui pan nannam dvl doonam mam kaapa baloqkam mwv nam kaagwl ui pan nannam dvram i?

¹¹Hoo soq bor ak si mwwg mwwjwngv ator maak gab, nam kaagwl nyita tanv hiyv gab Kristo siknum hoq nyi akv noqg cengk gab yuupaq taram i?

¹²Soq sam nyik gab nulv nulug vbw-bor tulug agaho nyic nyil bulug hang mwwdy nannam nyimur ko-gab nulv Kristog aga hookam nyic nyidwn.

¹³Ngoqg dvnamv ngoqg bor gab almab nyiloqkam ngo nywywngam vdin dvkram, hvb nyil ngoqg boram nyic nyim dvb jiram.