Read Nyishi 1 KORINTI 9 Bible Online

1 KORINTI 9 - Nyishi bible

1 KORINTI 9

¹Ngo nit at mas i? Ngo xuqnam nyi maas i? Ngulug At Sw Jisun ngo kaapa maanum i? Nulv ngoqg At Sw gab bonam nyinam hoqg niqtuq ma i? Nyi asaqkv ngam xuqnam akv hvl looma jaqkam nulv ngam svgagvrwql vvbo hvl looky dvb nyidwn. Nulug nyinamv At Swn mwwjwl swwnamv ngo xuqlinam akv hvl kaacin dvb nyil doodo.

²Ngam Nyoodo nyi gab kanam majaqkam, nulgab kanamnamv, nulug hoggv sulak ngo At Swg kanamnam mam nvmlwqpan.

³Ngam toxbo nyi tulungam ngo atam larl sam bedwn,

⁴Ngoqg bon nyijongam ngam dvd-twwdwb jidwb nyima dvn i?

⁵Hvvky ajin tulungv At Swg bor tulu, Pitor ho xuqnam asaqkv bulv atwg nyem mam bool yvgnam hvb ngo kam ngoqg nyem mam bool yvgdvb nyima dvn i?

⁶Hvb nyiloqkam, Barnabas la ngo aro i ngulug atwg kepo gab bonam nyil dvdwb doodwn i?

⁷Sipai swwnbo nyi akv mwv atv hiqsul swwdwn i? Hvbmab hiyv nyiv atwg roo rongo hoqg roo aaxiam dvma bo nyi doodwn i? Ho hiyvg sviya atv mwwg sviya tulug gwwiyam hiql twwmab apaqbo doodwn i?

⁸Nyiakog looxiam nyiswrl kaakinam ham ngo bitwqtvl apaqram, hvbmab pvvbv kam soq benam akin sam bedwn.

⁹Ngulv Mojesg pvvbho pooril kaapa dvn, pvvbv bedwn, “Svv hvvbv am swqyikam svv agam mam puutum maabv. Pwnbov svv hvvb pagoqkam mwwdwqdo i?

¹⁰Soq mwlw sam ngul gab bema pan i? Jvqtw jaqb ngulug gab sam xeqpwl ap pan. Hal beenbo nyi ak hv la dvn noocum bo nyi akv bulv ammam mvpin sudub hvl mwwgwl bon lokub nyibam dvb nyidwn.

¹¹Ngulv nulug pengko lo yalwg ampaqngam paqtkun, hoqgab ngulv sija nulug galoqkv gvda gvt soqg aaxiam punamv nulug gab koi haajaq pa i?

¹²Nyi asaqkv nul galoqkv soq svdgo naadwb nyid nyiloqkam ngulv hoggub nyil ham koi yaag naadwb nyima tayin? Hvbmabde sija godab ngulv nulug galoqkv naadynam naasam naama da. Hvbmab Kristog tugu pui lamtangam swrsob wwm dvb hog duqtup lurup mvma dvb ngulv hog mwlwngam hentwram cwqpakun.

¹³Soq sam nulv cengl doodo. Xumk nam uralo bon nyinbo nyi tulungv bulug dvsam xumk nam hoqgv naal dvdwb nyidwn; ho yugw ho pwr rwwlwqbo akv hoqg galoqkv bulv naadwb nyidwn.

¹⁴Hoq hvbkalam Tugu Puiyam bekarbo nyi tulungv hoq tugu pui bvk hoqgv bulug dvsam naadwb nyitayin, hvl At Sw gaml jipan.

¹⁵Hvbmabde sija godab ngoqg soq naadynam soqgv akin gonkam naama da; ho soq naadynam tulu sam ngoqg at gab naadwb hvl ngo xeql goqma. Ham nyimmam lingsam ngo sinamv al ya. Hiyvkam ngoqg naadynam mam agam niqtuq doomab asar dvb mvnyiram.

¹⁶Ngo Tugu Puiyam bekar bov daqk hvl ngo atam paqs dvb nyima. Hoggub nyila jaqkam, ngam tugu pui bemdvb gamlam jirwl ap pakun. Ngo Tugu Puiyam bekar maab nyik baloqkam ngoqgab vrrv ku!

¹⁷Ngo ngoqg hang mwwlwqkob bon nyinyiloqkam ngo bon nyijongam naadwb mwwiyin pa, hvbmabde ngo sam ngoqg nyidynamv mwwl nyidwn.

¹⁸Hvb nyiloqkam ngo hognvk nyijongv kaapa dvn? Tugu puiyam bejo komab bekar dvb jigam gab ho ngoqg tugu pui gab bon nyijongam naadynam mam gaqma dvb jigam gab alpa.

¹⁹Ngo nyet atv, hiyv nyig nyera ma; hvbmabde nyi lo vigo kaapa dvb ngo atam mwlwg nyerab swwdub mvs pakun.

²⁰Juhudi tulug lvgab dooikam ngo Juhudi hvb nyidwn ho bulam Jisug ogum boadvb nyidwn. Mojesg pvvbam ngo looma jaqkam, ham bugil swwnbo nyi tulungam kaapa dvb ngo pvvbam loonbo nyi hvb nyitkun.

²¹Hoq hvbkalam Nyoodo nyi tulug lvgab dooikam Nyoodo nyi tulug hvb ngo nyil Nyoodo nyi tulungam kaapa dvb nyidwn. Soq sam tatwl ngo Pwnbog pvvbam bugil swwma dvn hvl bedwb nyima, hvbmab ngo jvqtw jaqb Kristog pvvb uraho doodwn.

²²Mwwjwngv ator maanbo nyi tulug dookho ngo kam bulug hvb mwwjwlo ator maanbo hvb nyil bulam kaapa dvb nyidwn. Nyi tuugin Pwnbog ywwt ywwnam mam kaapa mvdwb mwwl ngo deedy luuxib nyil nyika tukun.

²³Ngoqg nyigdvn hoolu mwlw si tugu pui gab nyigdvn, ho tugu pui hoqg lvqc cinam hoqgv dintwqlo naaba dvb mwwdwn.

²⁴Nulv mwlwngv cengdo nyiv xarka suklo, mwlwngv xardwn, hvbmabde akin gontwq bulug pengko hoqgv mwlwngam xaryadvn ho xarjo aminam kaapa dvn. Hoqgab nulvkam amin kaapa dvb xarto.

²⁵Hiyv nyiv gwbw humka suklo ho hoq hvk mvka suklo nyidybo nyiv hog mwlwngam cwql nyinyoql nyika dvb nyigdvn si nywywngam nyamab dooyu deenbo amin gab nyigdvn.

²⁶Hoqgab lak ngo muxul apnam bwqrko ho xarc dvb ngo tingtw jaqb xardwn, hoqgv ngo alaq nwqka suyikam mwv dooi aoho nwqsam nwqyam nwqmanam hvb nyinbo nyiv ngo.

²⁷Ngo atwg gv alo-ayaqkam nugur nunyiaql mvgdvn ho munyiub ap gvdwn hoggab nyi asaqkam mvka sudub hvl goqxo kokwngam haqpaq koma dvb nyix-nyiaql doodwn.