Read Nyishi 2 KORINTI 1 Bible Online

2 KORINTI 1 - Nyishi bible

2 KORINTI 1

¹Pwnbog mwwlwqkob xuqnam, Jisu Kristog nyera, hvvky ho ngulug bor Timoti galoqkv Korintiho doonbo Pwnbog dvrwq namlo ho Akaiyag gvdaho doonbo Pwnbog nyi tulu gab.

²Ngulug Ab Pwnbo la At Sw Jisu Kristog nulam anyangam la swrsomalongam jignvka.

³Ngulug At Sw Jisu Kristog Abam paqlaju, mwv ayabo Pwnbov, mwwg galoqkv ngulv hog mwlw svkangam kaapa dvn.

⁴Mwv ngulam hog mwlw hentwr-kanyi, bwdw hota boam tooky paturbov. Hoqgab ngulvkam hentwr kanyi henl doonbo nyi tulungam bulug hentwr henklo svka kamin sumdvb Pwnbo galoqkv kaapanam ayangam aya yvvsiq natju.

⁵Ngulv Kristog hentwr henklo hemin gvdwb nyinam hvbkalam ngulv Kristog galoqkv Pwnbog svkangam kaapa dvn.

⁶Ngulv hentwr henam si nulam ywwnamv hoo ngulv Pwnbog galoqkv hog svka ak kaapa paloqkam hvvkam ngul gab svkangv, hoq svka hv nulam ngulug hentwr henam akinam cwqn nan atoram ngulam jinam kalam hvb jipan.

⁷Hoqgab ngulug nulam mwwgwnam si nywyw biiram. Nulv ngulug hentwr henklo henmin gvnam hvbkalam nulv ngulug jampko lo nulvkam jamp pomin gvdwb svka kaapanam sam kam kaapa mingtayin.

⁸Hoggab, ngoqg vbw-bor tulu, Asiya gvda alo ngulug nyelin hentwr henam mam lokta nulam bepadvn, ho soq pui sam nulv cengdwb nyido. Nyelin looda hentwr henam gab ham henla kumab nyiknv ngulv sig-dorg gam ludum apaq kunum.

⁹Ngulv mwwnum, ngulam sim dukub gaml jilin paku ho sigam mvkbo hvl mwwr kunum. Hvbmabde hoggub nyila bwdwq ngulv atam mwwgw sumab, sik boam turdkub purabo Pwnboam svqgw twqdwb nyitwqnum.

¹⁰Sig ung koijaq hoqgv mwv ngulam naalin pakun, hoo hvraqb ywwtayin. Ho ngulv mwwg aoho mwam mwwgwl mwv ngulam lokta ywwtayin hvl hingw dvn, hoggab nulv ngul gab Pwnboam xuml ngulam svka pan hoqgab,

¹¹ngul gab mwlwngv Pwnboam swgw ko-gab hoq swgwnam mam Pwnbov birwq tayin hoo ngulam ayatayin, hoqgv ngul gab nyiv vigo Pwnboam paqyalinco hvl paqtayin.

¹²Ngulv ngulug hangam paqs dvn, hoggab ngulug hang mwwnamv ngulam mwwdar mvdwb jinum. Mwlwngam betwl nulug lvgab ngulug nyiba-wbanam mam Pwnbog jinam hang mwwdy nannam hoo mwwjw swswl Pwnbog jinam anyanam ator lvgab soq gvda so ngulv swwl dood deedib swwm dvb jipan, hvbmab nyia kog mwwlaqko nyijwq-nyegam belaqko gab ma.

¹³Sija ngulv nulam, nulv hognvkam poory ricin dvn hoo tacin dvn ham xeqdwn. Hvbmabde nulv sija ngulug pagoqkam pwbw jaqb cengma, hvbmabde nulv ngulam pwbw jaqb cengdwb nyipa, hoggab At Sw Jisu Kristog Aalv haaikukam nulv ngulam hempwl paqtayin hoo ngulv kam nulam hempwl paqtayin.

¹⁵Ngo otuqjaqb nulam kaatab wdwb hvl hangv mwwl dooknum, hoggab nulam lwnyi dvb Pwnbog ayangam kaapa mvdwb mwwnum.

¹⁶Ngo nulug dookub wpeq layil nulam kaapel Mesidoniyab wdwb mwwnum, hoqgv Mesidoniyab aloqkv wkur yukam ho wpeq dvb mwwnum, ho Judiyab wdwb nulug galoqkv svka naadwb ngo mwwnum.

¹⁷Soq sib ngoqg hang mwwnam si kvtaq yooma i? Hangv vdw ma i? Hvbmab ngoqg nyinam-wnamv, hang mwwnamv ngoqg atwg mwwlwqkob i nyidwn, hvbmab bedaq akinam agamv, vv, hoo ma, hvl bedwn i?

¹⁸Pwnbov hog hwdgo jvqtw agam mam goodwb goodwn, ngo hvbkalam nulam vv hvlakam bema, ma, hvlakam bema.

¹⁹Hoggab nulug pengko lo pui bekinam Pwnbog Ko Tuup Jisu Kristog pagoqkam benbo pengko lo Silas, Timoti la ngo atv ngulvkam “Vv, Ma,” hvl bema bov. Hvbsujaqkam, mwv Pwnbog vv hvl benamv.

²⁰Hoggab mwv jaqlak Pwnbog birnam mwlw agam gab “Vv” hvl benam ak jaqkv. Hoqgab lak ngulv mwwg emin gab “Amen” hvl Pwnboam yuum dvb bedwn.

²¹Kristog lvgab ngulug swwgam lokub doom dvb ngulam la nulam mvnbov Pwnbov. Ngulam oksub xuqbwq xuqlin bov.

²²Ho ngulam mwwg nyiv ku hvl muxul ap kunbov, hoo ngulam Dvrwqbo Yalv ngulug hang uraso jitkul kaacin dvb muxul ap pakun.

²³Ngo Pwnboam kaato hvl bedwn, mwv ngoqg hangam cengdwn. Ngo nulam aya mwwpa ko-gab Korinti wmab apaq pan.

²⁴Ngulv nulam ham mwwjwto hvl bilwqbo nyi ma. Hvbmabde ngulv nulug lvgab nulam hemp pomdvb bonam nyiba dvn. Ngulv cengdwn nulv mwwjwl biimab dood nvbo hvl mwwdwn.