Read Nyishi 2 KORINTI 10 Bible Online

2 KORINTI 10 - Nyishi bible

2 KORINTI 10

¹Poul ngo, nyip at jaqkv, nulug vnyiq kaagaho dooi yikho hang nyinyiaqbo hoq ayabo nyi gob nyinum, hvbmabde nulug vnyiq kaaga hoqgv aado ho dooikam ngo nulam agam korwb benbo nyiv.

²Ngo nulam hang nyinyiaqbo Kristog emin gab mvnyi-moiyul bedwn, ngo nulug dookub haaikam nulam agam gamtor alwb bem mvma dvb jitka. Hoggab ngo cengdwn, hiyv nyiv ngulam gvda gvtwg hangam baql nyid wdnvk hvl benbo nyi tulungam agam gamtor alwb bedybo nyiv.

³Ngulv gvda gvt si doodwn, hv jvqtwngv, hvbmabde ngulv gvda gvtwg hangam baql hoqhvb nyob pal mvka suma dvn.

⁴Ngulug nyob pal mvka suklo ngulv gvda gvtwg nwwxo svtam mam bvvtwl nyob pama dvn, hvbmabde Pwnbog ator albo nwwxo svtam mam bvvtwl nywyw biimabo naadwn. Ngulv almanbo agam mam twrdwn.

⁵Hoqgv ngulv Pwnbog bvrwqngam cengm mvma dvb nyitorl ceebiob nyil daqtorbo, duqtup ter gob nyin boam buxa dvn. Ho hoqhvk hog mwlw hang mwwnam nootul Kristog nyumwb mvl bugil swwm dvb mvdwn.

⁶Nulug mwwjwl bugil swwnamv niqtuq dook baloqkam ngulv mwwjwl bugil swwma bo nyi tulungam kaal mvlar dvb mwrwl kaagab doodwn.

⁷Nulv nulug vnyiq kaagaho doonbo kaapanam hoolu aoho kaaka to. Hiyv akgon atam ngo Kristog xuqnam akv hvl mwwdil bedwn, mwam lokta mwwdy lalal mwwg pagoqkam mwwka mvsto, hoggab mwv hoggub nyil Kristo gab doodwn, ngulv kam hvb nyil swwdwn.

⁸At Sw ngulam vigo atoram jipa kun hvl ho nulam swwm dvb mvrab mvdwb jipan hvl bejaqkam, ngo atv hvnyw bos sos dooma, sapia dvb ma, hvbmabde mvrab dvb.

⁹Ngo nulam pota xeql bos belam dvb mwwma, hoqgab Pwnbov ngam hvnyw mvdwb jiram.

¹⁰Nyi tuugin bedwn, “Poulwg pota xeqnam tulungv kor jaqdvn hoo ator aldvn, hvbmabde mwv ngulug lvgab nyiipv lokub dooikam mwv ator maadwn hoo mwwg agamv hog dooma sudnvlak!”

¹¹Hoqhvb benbo nyiv ngulv aado lo dootwl pota xeqnamv la lokub nulug lvgab dootwl agam goonamv hog asaqgo dooma dvn ham cengdwb nyiky dvn.

¹²Hvbsujaqkam, ngulv atam nyiixuq xuqs dvb mwwma dvn, ho atam xisul koigob paqsbo nyi tulug lvgab ngulv atam dooc dvb mwwma dvn. Hoggab nyi tulu gon atam atv paqs dvn, hoq nyi tulug lvgab ngulv xitaq dvb, ho dooc naadwb ngulv hoqg simp ma, bulv atam atv xikal atam atv doocil pw-hwwl cingtwrbo yaagub nyistvl damabo nyi tulug bon nyinam mam nyidwn.

¹³Ngulug atam paqsul xitor gob benam siiloqkam nyitarv doodwn, Pwnbov ngulam nyim dvb jinam bon nyidynam uraho nyitar dvb dootwq tayin, nulvkam soq ngulug bon nyitanam uraso dootaq dvn.

¹⁴Nulug dook ditaqho nagub ngulug bon nyidy kov doodwn, ngulv Kristog Tugu Puiyam pagoqkam nulug dookub baqal haadwk ho hoq vrram wbin maanum.

¹⁵Hoqgab Pwnbov ngulam bon nyimdvb vrr rwl apnam hoqgv nyi asaqkv nyibin la nyilv yaagam gab paqma dvn. Hvbjaqkam ngulv mwwjwdo nul mwlwngv koi alwb swwrab nvka, hoo ngulv meegta ham koi yanbo bonam nyilatai nvbo nulug pengko lo hvl ngulv mwwjwdvn. Hvbmabde Pwnbog bon nyimdvb jinam vrrko uraho nyidub nyitayin.

¹⁶Hoq kokwb ngulv Tugu Puiyam gvda asaqho nulug gvdangam wleq layil bedwb altayin, hoq nyi asaqkv bonam nyinul ap kunam pagoqho paqdwb nyikram.

¹⁷Hvbmabde dvrwqbo potangv bedwn, “Hiyv nyiv paqdwn hoq nyi hv At Sw hognvkv nyipa kun hoqgab paqto.”

¹⁸Hoggab At Sw hiyvn alpa hvl loobwqpan hoq nyi hv xinam jaqkv, hvbmab mwv atv alpa hvl mwwkwb dooma dvn. Hiyv nyiv atam alpa hvl besbov mwv pooka-yirka ko hoqgv lengma da, hvbmabde hiyvn At Sw alpa hvl benam ak hvvmolo pooka-yirka ko hoqgv lengpa kun.