Read Nyishi 2 KORINTI 11 Bible Online

2 KORINTI 11 - Nyishi bible

2 KORINTI 11

¹Ngo mwwdwn, ngo paca pan hvb nyis wsjaqkam, nulv ngam cwqyi nvp hvl ngo mwwdo. Aya mwwpa tvb.

²Pwnbov nulam kaabynam hvb ngo kam nulam koong aldo, hoggab nulam jidkub hvl nyem begaql Kristo gab birwl ap kunam nyem nyijwr hvb nyidkun.

³Ngoqg mwwgamv nulv Kriston apaq tukul, nulug hangv al kumab nyiknv Kriston xuml aljaqb mwwxaml swwnam mam apaq kumaco hvl ngo mwwdwn, hoggab tvbv surjaqb nyil Ibwn xaalyo lyopaqnam hvb nyik maaco mwwdo.

⁴Hoggab nulv hvb alwb nyi gotwq bolo haal nulug dookho ngulug bekinam mam nulv mwwjw kunam Jisu haam maab asaq Jisu ak bekinam mam hoo ngulug nulam pui bekinam nulug tvjw kunam tugu pui haam maab, asaq tugu pui ak nyiv bekin daqyikam, nulv ham nyory alwb loomin gvl, ngul galoqkv kaapanam yal ham apaq tvl yal asaqgo naado.

⁵Ngo mwwma dvn ngo nulug xuqnam tulu ngvk hvl benam tulungam anyo yaadwn, hoq simp gob nyima dvn hvl mwwma dvn.

⁶Ngo agam gooklo goolaq majaqkam, hvbmabde cengnam pagoqho anyo maadwn. Soq pagoq sam nulam ngulv bid lalal bedar banv looxiam la nyitaq mwlwho bekin tukun.

⁷Ngo Pwnbog Tugu Puiyam nulam bekin dvkho ngo nul galoqkv hog gokam kotma. Ngo atam anyo gob, hvbmabde nulam koi gob mvnum. Hoq ngoqg nyinam hv nyixiaq pan i?

⁸Ngo nulug pengko ho bon nyidul doodwkho ngo dvrwq namlo asaq hoqgv nyijongam naanum, bul galoqkv naareq banv nulam svka dvb ngo nyinum hvl bejaqkam alv.

⁹Ngo nulug lvgab dood ditaqho ngoqg twngkv pwwmab nyisbakam ngo nulam bidwq-bek maanum. Hvbmabde Mesidoniya alo vbw-bor tulungv ngam hog mwlwngam ngoqg pwwmanam mam baqa jinum. Otuqg hvbkalam kokwngam kuiyum mam ngo nulgab mwwdwq namgob nyiram.

¹⁰Jvqtwjaq Kristog jvqtwngv ngoqg lvgab doob nyiloqkam, ngo bedwn, ngoqg soq paqsnam si hoglo doojaqkam nywywngam Akaiya gvdaho nyiram.

¹¹Nulam ngo soq sam aby boma ko-gab i bedwn? Pwnbov ngoqg nulam abynam mam cengdwn!

¹²Sija ngo hognvkam nyidu dvn ham hvraqb asaq xuqnam tulungam bulug atam paqsnam hoqgv apaq mvdwb hoo bulv kam ngulug bonam nyinam akinam nyidnvk hvl benam mam apaq mvdwb ngo nyitayin.

¹³Hoq nyi tulu si jvqtw jaqb xuqnam nyi ma, bulv xaalyo bo xuqnam nyi tulungv, bulv vm mvvl bonam nyidwn hoo kaaga-tagab bulv atam Kristog xuqnam bonam nyinbo nyiv hvl bedwn, ho gwwlyw bov.

¹⁴Swrgob mwwdwb nyima dvn, hoggab Uiyv kam kwlwq-kvlaqbo ao gumtw hvb nyil gwlynan atorv doodwn.

¹⁵Hoqgab mwwg nyerangv nyiidarbo nyi hvb gwilynam hv hog nyimanam go nyinam ma, hvbmab, bulv kokwngam bulug hoq nyijongam kaapa tayin.

¹⁶Ngo lokta bedwn, nulv hiyvkam ngam damabo gob mwwmab. Hvbmabde nulv ngam hvb mwwb nyiloqkam, hvb jaqkam ngam damabo nyi akgob svgagvrwq to, hoqgab ngo atam anyo kvtaq go paqs dvb nyitayin.

¹⁷Hvbsujaqkam, ngoqg sija begdvn si At Sw betwk hvl begam gab ngo bema; atam paqsnam bvrwq so, ngo jvqtw jaqb gvda gvt soq gonam damabo nyi hvbjaq goodu do, atam paqs bov nyiv vigo doodo. Hvbkalam ngo kam nyitayin.

¹⁸Hvbmabde nyiakog bicw gab atam paqsbo nyiv vigo doodwn. Hvbkalam ngo kam nyitayin.

¹⁹Nulv atv mwwlaq cenglaq albo nyi gob nyigam gab nulv damaboam aljaqb himw do.

²⁰Hoggab nulam nyiv nyera boojaqkam, nyiv koonyub jaqkam, nyiv nyumwb bool wg jaqkam wr-oo gombub haam jaqkam, kanyi-taiya jaqkam ho nyuqm mam pitaq jaqkam nulv ham himw do.

²¹Loklo ngo sam bed bvkam hvnyw yaadwn, ngulv ham nyidwb ator dooiya maanum. Hvbmabde hiyv akgon pagoq goqg golo atam paqs dvb mwwd loqkam ngo kam hoq pagoq goqho paqs dvb hampeql haakamb mwwdwn, soq pagoq so ngo damabo nyi hvb bedwn.

²²Bulv Hibru nyiv i? Ngo kam Israel nyiv, bulv Abraham gv ko hosiqkv i? Ngo kam mwwg ko hosiqkv.

²³Bulv Kristog nyerangv i? Ngo rugaqbo nyi hvb bedwn. Ngo bulam koi yaadwn, soq pagoq sam bebaloqkam, bon nyiklo ngo nyibin yaapan. Pvtwq haabin yaapan, nyi alaqlo laqm mam xila maadwb naleqgo baqbin yaapan, lwywngam sitanum.

²⁴Cammum leq kiya gogaqb ngam lvng go xipwql jwwnum,

²⁵Luum go Roman nyi tulungv ngam oso sobungv jwwnum, lok wlwngv ngam hurnum, luum go iss jaaj nuudubnam hentwram henum, iss aoho aal loog ai yubg dootkun.

²⁶Hoqgv vigo ngoqg nyiody booklo hentwr hent kun, diidwr issiv totumnum, dvcobo alaqho haanum. Ngoqg atwg Juhudi nyi tulug alaqlo ho Nyoodo nyi tulug alaqho ngo sitanum nyoro hookam, nampam hookam, iss swnyiq hookam hoo xaalyo bo ajin tulug alaq hookam lwwywngam sitanum.

²⁷Aiyam yuma karmab bon nyil dvma-twwmab kano hvngwr hengl vigo dwc-twwpw maab nyil vj koopa maab swkwrb doonum.

²⁸Hog mwlw luuxiam apaq tvl ngoqg sija mwwdwq dwqg dvn si dvrwq namlo tulu gab mwwdwqnam poot gob nyido.

²⁹Hiyv akgon ator maai nyiloqkam, ngo kam ator maadwn. Hiyv akgon nyic nyipa nyiloqkam ngo muur aldvn.

³⁰Ngo paqdwb nyibaloqkam, ngo hogloq pagoqho ngo ator maadwn hoqgab paqtayin.

³¹At Sw Jisug Ab Pwnbog eminv kol nwrba gob koi alwb doonka. Ngo xaalyob bema dvn ham mwv cengdwn.

³²Ngo Damaskas nampam uraho doodwkho Lvpw at Aretaswg bor Laat saabv ngam nootu dvb nampam haaga viyapho nyemaq rvky boam apnum.

³³Hvbmabde ngam paaxa uraho soolwq tvl nampamg cwqc uko galoqkv soocoq jinum hoo ngo mwwg alaq hoqgv keleq kunum.