Read Nyishi 2 KORINTI 3 Bible Online

2 KORINTI 3 - Nyishi bible

2 KORINTI 3

¹Ngulv lokta atam paqs dvb nyirab duk yiqn i? Hvbmab nyi tulu gon nyinam hvb, nulam hvbma, nul galoqkv kaacinnan potalo xinam nyiv hvl ngulv naadwb nyikin pan i?

²Nulv atv vpv ngulug hang uraho xeqpwl apnam potangv, hiyv poory dvb cengdwn bulug vxy gab doodo.

³Soq si jvqtwngv Kristo mwv atv soq pota sam xeqnum, hoo ngulam jisiql jipan. Soq sam siya xi lvgab xeqma pan, hvbmabde sima bo Pwnbog Yalwg lvgab xeql ap pan, hvbmab wlw pataq hookam xeqpwl ap maanum, hvbmabde nyia kog hang uraho xeqpwl ap pan.

⁴Ngulv Pwnboam mwwxaml mwwjwdvn, hoggab Kristo galoqkv ngulv sam kaapa pan.

⁵Ngulug atv hog bon ak nyita yinbo hvl gaqn nan atorgo dooma. Ngulug bon nyin nan atorv Pwnbog galoqkv haadwn.

⁶Pwnbov mwv sulak ngulam nit pvvbam tal swwm dvb atoram jipan. Soq si axor lvgab xeqnam pvvb ma, hvbmabde Yalv. Axor lvgab xeqnam pvvbv sigam kaakin dvn, hvbmabde yalv swwgam jidwn.

⁷Axor lvgab wlw pataq aoho xeqnam sigbo pvvbam jidwk ho Pwnbog yuunam hutongam kaapanum, ho hoq hutongv Mojesg nyuqm ao hoqgv kokw so nyiileq subakam, Israel nyi tulungv hoq hutongv huuceq ko-gab bulv Mojesg nyuqm mam vnyiqkv kvvrwq nyomanum. Sig lamtangam kaakin bo pvvbv hoqhvb huuceqnan hutongv dood nyiloqkam,

⁸Yalwg hutongv hog hwdgo ham laabo yaab atorv dookin pa i?

⁹Sigam doogbo huto lvlaqkv hwdgo huuceq dvnyiloqkam nyi tulungam sigbo pvvbv yuudub nyin mvnyiloqkam, ywwnbo pvvbv hog hwdgo ham laabo yaab yuudub nyitayin.

¹⁰Hoggab soq yuunam huto si otuqg huto ham huubin yaagam gab, hoq otuqg yuunam hutongv niinkun.

¹¹Apo gobtwq huunbo hutongam yuudub nyin mvnyiloqkam kol nwrba cwtam nagub huudy bo yuunam hutongv hog hwdgo ham xibin yaadwb nyikin do.

¹²Ngulv soq sam mwwgw dvn, hoggab ngulv haakam alwb bedwn,

¹³Mojesg hvb dooyu deema bo hutongam Israel nyi tulungam hoq huto ham nyiinam mam kaapa mvma dvb mwwg nyuqm mam pomciqnam hvb ngulv nyima dvn. Hoggab bulug hangam vdw dukub mvnum, hoqgab sool godab bulv kolwg otuq hoqg kucuq birnam pvvb potangam poory sujaqkam tacin maadwn, hoggab kolwg hoq pomciqnanam naaxa maadab doodwn. Soq pomciqnan sam hiyv nyi akgon Kristog dookub dooba tayin Kristo aro twqku naaxa deenbov.

¹⁴Bulug mwwnamv, hvb sutwl mutubnum, hoo soolo nagub bulug mwwjwngv pulub tvl doodo otuq hog pomciqnamv, hwdlo bulv kolwg birnam potangam poory yukam, ho pomciqnamv lwqko dvn hwdlo nyiingv Kristog dookub haaikukam.

¹⁵Soolo kam Mojesg pvvbam bulv poory yukam, bulug hangam sija godab hoq pomciqnan hv pomciqtvl doodwn.

¹⁶Hvbmabde dvrwqbo potangv Mojesg pagoqkam bedwn, “Mwwg pomciqnanam mwv At Swg dookub mwwkur haad kukho ham naaxa jiknum.

¹⁷Sija soq begdvn si “At Sw yalv” hoo hogloqho At Swg yalv doodwn, hoqho swwgvkam doodwn.

¹⁸Ngul mwlwngv ngulug nyuqm mam pomciq maas jaqkam At Swg yuunam mam vnyiq asarv kaapal ngulam oksub swly dvb mwwg hvbjaq kalam kvvyw kacdvb mvnbo At Swg yuunam mam akwn kokwb akwn ham koi koi yaadwb mwlwngam kaapa tukun.