Read Nyishi 2 KORINTI 4 Bible Online

2 KORINTI 4 - Nyishi bible

2 KORINTI 4

¹Pwnbov aya mwwpal ngulam soq bon sam nyim dvb jigam gab ngulv ham nyidub mwwram maadwn, hang homa dvn.

²Ngulv hog mwlw nyis nyipeqnam hoo hvnyw-harnam bonam apaq tukul ngulv xaalyonam mam nyima dvn, hvbmab Pwnbog agam mam paiya dvb biku-belal beg maadwn. Likub-lexeql bema dvn, hvbmab jvqtwngam bekinl Pwnbog kaagaho la nyi mwlwg hang mwwlwqkob vnyiq kvvlwq dvb nyil kaakin dvn.

³Hoggab ngulug bekar yvgnam tugu pui sam pvvs dvb nyib nyiloqkam hoq si yuupaq kunbo nyi tulug pagoq gab tugu pui sam pvvsil apdvb nyidwn.

⁴Hoggab bulv tugu pui sam mwwjw maadwn, hoqgv bulug hangam soq gvda soqg ui kan urahv pvvsil ap pakun. Uiyv bulam hutongam kaapa mvma dvb hutongam mutum apko gab nyidwn. Hoqgv ao toloqgv ipoqbo Tugu Pui hoqgv haanbo hutongv Kristog pagoqkam yuudub jinbo, Pwnboam gussbo, Pwnboam kvvyw tacdvb, Pwnbo jaqhvb nyinbo tugu pui hoqgv lengdwn.

⁵Hoggab ngulv atam pui bekar maadwn, hvbmabde Jisu Kriston At Swv hvl ngulv Jisug emin gab nulug nyerangv hvl bedwn.

⁶“Kan ura hoqgv hutongv huulin tayin!” hvl benbo Pwnbo akin hv sulak ngulug hang uralo mwwg hutongam Jisu Kristog agam hoqgv lengm pakun.

⁷Hvbsujaqkam ngulv deekam pwcw lo yalwg gumnam doogko gab ngulug Pwnbov mwlwngam ator yaadwn hvl kaakin dvb nyidwn, hvbmab ngulv atv ma.

⁸Hog nyitaq mwlwho ngulv hentwram hendwn, hvbmabde ngulam munyiub lama dvn, lok lokob hinc maadwn, hvbsujaqkam nywywngam hang homa dvn.

⁹Ngulam mvnyi-mviya sujaqkam, ngulug ajin doomab nyima dvn, hurpaq sujaqkam twrma dvn.

¹⁰Jisug swwnam mam ngulug sidbo gv soqgv kaapa mvdwb ngulv looxiam Jisug svmangam ngulug gv si baqkar yvgdvn.

¹¹Ngulug swwca so Jisug emin gab looxiam ngulv sig ungho doodwn, hoggab ngulug sidbo gv ayaq soodin soqgv Jisun kaapa mvdwb nyidu dvn.

¹²Soq sib sigv ngulug gab, hvbmab swwgv nulug gab bonam nyidul doodwn.

¹³Dvrwqbo Potangv bedwn, “Ngo mwwjwnum, hoqgab ngo agam goodwn.” Hoq hvbkalam ngulv mwwjwnam yalam kaapa ko-gab ngulv kam bedwn ngulv mwwjwdvn.

¹⁴Ngulv cengdwn, At Sw Jisu sik boam swwdwb turkur dukub purabo Pwnbov, mwv sulak ngulam kam Jisug lvgab swwgwb, nulug lvgab lvkin gob turdkub, mwwg dook ogumho boatayin.

¹⁵Soq mwlw jaqsi nulgab nyidwn, hoqgv Pwnbog anyangam nyiloq koi koi gota kaapa mvdwb, hoo bulam Pwnbog yuunam mam kaapal Pwnboam vigo xuml paqm dvb nyidwn.

¹⁶Hoqgab sulak ngulv hang homa dvn, hoggab ngulug gv ayaqngv loog-loog yaiya nyiis jaqkam, ngulug yalwg swwgv looxiam nit-nit yab nyidwn.

¹⁷Hoo soq dooyu deema bo anyo ko ngulug hentwr henam si ngulam kuiyum mam swsw yuupwnam nwrba cwtam swwgam sijag hentwr henam sam alyanbo koi albo yuunam mam kaapa dvb jitayin.

¹⁸Vnyiq kaapanam ham ngulv tuugab maadwn, hvbmab vnyiq kaapa maanam ham tuugab dvn. Hvbmabde vnyiq kaapanam hv dooyu maadwn, hvbmab vnyiq kaapa maadanam hv nwrba cwtam gob dootayin.