Read Nyishi 2 KORINTI 6 Bible Online

2 KORINTI 6 - Nyishi bible

2 KORINTI 6

¹Ngulv Pwnbog lvgab bonam nyibambo nyiib nyil, ngulv nulam mvnyi-moiyul xuml bedwn, Pwnbog anyangam kaapa bo nyi tulu, nulv ham almadwb mvmab.

²Pwnbov hog hvl bedwn ham tato: “Nam aya kaapa dvk moodv haad kukho, ngo noqg xuml benam mam tatkun; nam ngoqg ywwd moodv haad kukho, ngo nam ywwt kun.” Tagabto! Pwnbog ayangam kaapa dvk moodv sija ku; soolog aal siku ywwk de moodv!

³Ngulug bon nyinam sam nyixiaqpa hvl hiyv nvkam bet sago ngulv mwwma dvn, ho ngulv kam hiyv akgonwg pagoqkam nyitum wtum jidwb mwwk maadwn.

⁴Hvbmab hog mwlw luuxy nyitaqlo, ngulv cwqma vrram cwql hentwr hemangam henl hoo vs-axaq mwlwngam cwqbnv ngulv Pwnbog nyerangv bo hvl kaakin dvb nyidwn.

⁵Ngulam jwwnum, pvtwq lwqnum, hur-marab dugnum, bon nyilv yaanum, yuma karmab, ho dvma-twwmab dootkun.

⁶Ngulug hang dvrwqnam gab, cenglaq ko-gab, cwqnam gab hoo ayangam Pwnbog nyerab nyil kaakin ko-gab, Dvrwqbo yal gab, jvqtw aby ko-gab,

⁷ngulug jvqtw pui gab, Pwnbog ator gab, laqc-lvqbwqb Pwnbog dvrwqbo nwwxo-uppuqngam bvvtwl nyemaqngam mengdvb la ngulv atam ywwn dvb doogdvn.

⁸Ngulam xis jaqkam, xima jaqkam, ngulam hvnyw bisu jaqkam hoo paqs jaqkam, ngulam xaalyo bo gob bes jaqkam, hvbsujaqkam ngulv jvqtw agam mam bedwn,

⁹cengma jaqkam, ngulam mwlwngv cimpw pakun, sisv-sisv twqb nyisjaqkam, simab hvraqb turl doodwn, ngulv laqm baqs jaqkam, ngulam sidwb mvma;

¹⁰nyiqs-tanap lengs jaqkam looxiam hemp pol doodwn, jwwgw-homabo nyi hvb nyisjaqkam ngulv nyet mvdwb vigo nyi tulungam jipan, ngulv hog gokam doog maanbo nyi hvb nyisjaqkam ngulv jvqtw jaqb hog mwlwngam luuxiam doogdvn.

¹¹Korintiho doonbo tumanam ajin tulu! Ngulv nulam hog mwwsi-saqpeq maab xaada-xara dvb agam gootkun, ngulug hangv pwt alwb mwwtkun.

¹²Ngulug hangam nulgab putum bov ngulv maslak; nulv sulak nulug hangam ngul gab putum bov.

¹³Ngo sija nulam ngoqg ko tulungam benam hvb bedwn, ngulv nulgab mwwdwqnam hvbkalam nulug mwwnam mam ngulam kaakin to. Nulug hang pwt aldvb mvto!

¹⁴Mwwjw maanbo nyi tulug lvgab lvkin gab nyibam maab, hoggab hvb nyingam maadwn, hoggub nyi albov la almanbov lvkin gob bon nyijiq mins latayin i? Hoggub nyil hutongv la kanv lokub doojiq tayin?

¹⁵Hoggub Kristo la Uiyv gamkin gob loomin sutayin? Mwwjwbo akv la mwwjw maanbo lvgab hognvkam lokub nyiyin akin nyikin dvn?

¹⁶Pwnboam xumk nam lo hoggub nyil ui panbov, murtiam xumn bov lokub xumjiq tayin? Hoggab ngulv turl doonbo Pwnbog xumk nammv! Pwnbov mwv atv benum, “Ngo ngoqg nyi tulug lvgab dooba tayin, hoo bulug pengko lo dootayin. Ngo bulug Pwnbob nyitayin, hoo bulv ngoqg nyi tulub nyitayin.

¹⁷Hoqgab At Sw bedwn, “No bulam ludum dukub nyiky paku, hoo no atv bul galoqkv lengtku. Kacboam issiqmabv, hoo ngo nam svgagvrwq tayin.

¹⁸Ngo nulug Abwb nyitayin, hoo nulv ngoqg ko tuup tulu bvla nyem ko tulub nyitayin, hvl mwlwngam At ator yaanbo At Sw bedwn.”