Read Nyishi 2 KORINTI 7 Bible Online

2 KORINTI 7 - Nyishi bible

2 KORINTI 7

¹Ngoqg tumanam ajin tulu soq mwlw sam ngulam birwl ap jinam mam ngulv kaapa paku; hoqgab ngulv atam dvrwq dvb hog mwlw almanbo, ngulug gv ayaqkam la Yalam kacdvb mvnbo luuxy hoqgv dvrwqb dootju hoo Pwnboam bos sol swwnyia tuj.

²Ngulam nulug hang uraho dooklo jitbv, ngulv hiyv nvkam nyimur tvma, hiyv nvkam nyiyu-nyica jitma, hiyv nvkam xaalyo lyot ma.

³Ngo nulam bepaq dvb sam bema, hoggab nulug agaho betkun, nulv ngul gab tula maanamv ho looxiam sijaqkam sibam dvb, turjaqkam turbam dvb doodwn.

⁴Ngo nulam vigo mwwjw aldvn, ngo nulam paqdwn! Ngulug hentwr-kanyi henk mwlwho nulam hentaql ngo haakam alwb mwwdwn ho ngo hemp pomanam mam podwn.

⁵Ngulv Mesidoniya gvdangam wc dvk kokw so ngulv swrsob doongam alwb doomanum, wtaq mwlwho laqm baql hentwr henl doonum, vxiv yolu swcin gob nyinum ho ngulug hang uraho bosnum.

⁶Hvbmabde hang honboam haakam hangam jinbo Pwnbov ngulam hangam haakam mvdwb Taitas haagam gab ngulug hangam haakam dvb bet-belanum.

⁷Mwv haal ngulam biywr-bebia twqma, hvbmabde mwam nulv hoggub biywr-bebial haakam bepanum, hoq mwlw puiyam baqanum. Mwv ngulam bekinnum, ngam nulv vigo kvvnw pak hoo vigo mwwdwq dvnwk hvl benam mam, hoo nulv ngam hog hwdgo ywwdwb mwwl doodwn ham bekinpa ham ngo tatwl, sija vigo hemp yaada dvn.

⁸Ngoqg nulam pota xeqnamv nulam tomur dvb xeqs jaqkam, ngo ham xeqgam gab ngo mwwdwq ma; hoggab ngoqg hvb xeqnamv nulam apo gob aro mwwdwq dvb mvnum ham ngo mwur do.

⁹Hvbmabde ngo sija hemp podwn; nulam tomur dvb begam gab ma, hvbmab nulam tomur dvb mvk hoqgv nulug hangam mwwkur dvb mvgam gab ngo hemp podwn. Nulug mwurnam hv Pwnbog mwwlwqkob nyinum hoo nulam ngulv hog nyimur ma.

¹⁰Hoggab nulug hang mwurnamv Pwnbog galoqkv nyinum, ho hoqg hang mwurnam hoqgv hangam mwwkur maanboam mwwkur mvdwb jitwl nyedarnam mam kaapa dvb jidwn. Hoqham mwwi-mwwmy dvb nyis dook ma, hvbmabde gvda gvt soqg nyia kog mwurnamv sigam kaakin dvn.

¹¹Pwnbov nulug hang mwurnam lvgab hoggub mvpa kun, hoggub dvrwq dvb mvpa kun, hoggub nyimurnam mam apaq mvpa kun, hog hwdgo dvrwqdvn ham nulv kaakin supa, hoggub hingkub sudwn, hang lengnam, hang mwwnam, mwwjwl xumnam ho nyixiaqnam pagoqho nulug nyixiaq maanam mam kaakin paku.

¹²Hoggab ngo pota xeqjaqkam ham ngo nyixiaqbo nyi gab hvbmab nyimurnam nyi gonyi hvl benam hoqgab xeqmanum. Hvbmabde nulv hog hwdgo ngul gab mwwdwq dvn ho jvqtw jaqb xidwn nulug hang uraho ham Pwnbog kaagaho kaakin dvb ngo xeqtkun.

¹³Hoqgab sulak ngulv hemp mwwpa kunum. Ngulv twq hemp pomanum, hvbmabde Taitas kam hangv pwt al mwwpa kunum ho ngulam nulv mwam hog bvxeq biywr-bebial svkanum ham ngulam bekin tvl ngulv haakam al mwwpanum.

¹⁴Ngo nulam paqbnv mwam bekinnum, hoggab nulv ngam hvnyw-har dvb hog bimur maanum. Ngulv looxiam nulam jvqtwngam agam bekinnum hoo nulvkam Taitas pagoqkam ngulug paqkjaqb nyinam mam kaapa paku.

¹⁵Hoo sija nulam mwwg aby bonamv koi yapaku, hoggab mwwg tomswrnam mam nulv hindy aljaqb tagab paku hoo nulv mwam bosil tvmdwr hwql svgagvrwq ko-gab,

¹⁶ngo hemp al mwwpa do, hoggab ngo sija nulam haakam alwb mwwgw swsw dvn.