Read Nyishi 2 KORINTI 8 Bible Online

2 KORINTI 8 - Nyishi bible

2 KORINTI 8

¹Ngulug vbw-bor tulu, ngulv nulam Pwnbog anyangv hoggub Mesidoniya gvdag dvrwq namlo tuluho doomin gvnum ham bekin nwdwn.

²Bulv henla maanam hentwrv bulam pooka-yirka sujaqkam, bulv hemp aljaqb hemp ponv jwwgw homabo nyi tulu hvb nyisjaqkam alaqngv jiga alwb akiam jinum.

³Ngo nulam jvqtw jaqb bekin dvn, bulv hog hwdgo jidwb mwwnum ham koi yab aky jinum. Hvbsujaqkam bulug mwwlwqkob jinum.

⁴Hoqkv bulv ngulam Judiya gvdalo doonbo Pwnbog nyi tulungam svka kaam dvb jitbvk hvl xuml benum.

⁵Bulv hog hwdgo ngulam jiyi nvp mwwnum ham koi yab jiknum; otuqjaqb bulv atam At Sw hoo Pwnbog alaqho jipaq suknum; hoq kokwb bulv Pwnbog hang mwwlwqkob atam ngulug alaqho gvqlwq jiknum.

⁶Hoggab ngulv Taitasnvn bon nyirab boam hvraqb nyigdvl nulam hindy alwb niqtuq nyilin gvdwl soq nyidynam abynam bon poot sam nyitwk hvl mvnyi-moiyul benum.

⁷Hog mwlwho nyet jaqb swwdo, mwwjwnam ho, agam gookho, nyijwq-nyegamlo hoo ngulam abil svka kaak pagoqlo nulv kwrw al jaqdo. Hoqgab nulam hangv meegta roto alwb mwwl soq abynam bon nyis sam nyit sago hvl ngulv mwwdwn.

⁸Ngo nulam soq pagoq so gaml jima. Hvbmabde nyi asaqkv hoggub nyil svka dvb mwwdwn ham kaakinl nulv jvqtw jaqb ngulug abynamv hog hwdgo koidvn ham piol kaaka dvb ngo sam bedwn.

⁹Nulv ngulug At Sw Jisu Kristog anyanam pagoqkam cengl doodo mwv nyet bibaq subakam, mwv atam nulgab jwwgwbo nyi gob nyil nulam nyet mvdwb mwwg jwwgw gwk hoqgv jipan.

¹⁰Ngoqg mwwnam si, nulug bon nyirab kunam mam sija ham nyija kubnyiloqkam al kimpa hvl ngo mwwdwn. Nulv jaqlak otuqjaqb nyitwqbo ma, hvbmabde bonam nyidwb mwwlwqko lvgab nyinbov.

¹¹Nulug mwwlwqkob hoggub nyidwb mwwl apnum hvbkalam sija bonam nyinya tuku.

¹²Jidub mwwbwql mwwrwl ap baloqkam ator doomabo jinyi maanbo hvb nyiram, hvbmab jidub ator doonbo hvb jinyitayin ho Pwnbov jidub mwwsil jinbog akiam nvvrwq tayin.

¹³Nyi tulu gon swrsob doom tvl, nulam hentwr hem dvb ma, hvbmabde nul gv naleqb sija doodo, hoqgab nulv pwwma cimabo nyi tulungam svkanamv aldo. Hoqgab aky sam kogdvn. Ho nul gv pwwma cima yukam bulv nulam svka kaakaminsul svka kvvlwq mins dvb nyido.

¹⁵Hoggab Dvrwqbo Potangv bedwn, “Hiyv vijaqgo dorkum apnum, mwwgv vi haajaqg dook maanum, hoo hiyv anyogo dorkum apnum, mwwgv anyo haajaqg dook maanum.”

¹⁶Ngulv hog hwdgo nulam svka dvb mwwdwn hvbkalam Taitas hang uraho hwrcwb mwwm dvb Pwnbov jigam gab Pwnboam paqdwn.

¹⁷Mwv ngulug tomswrnam mam vv hvl lotwq ma, hvbmabde mwv atv hwrcw alwb mwws banv mwwg mwwlwqkob nulug dookub wdwb hvl wnum.

¹⁸Mwwg lvgab ngulv dvrwq namlo mwlwngv tugu pui bekarko gab poqkuml xikumnam bor ak kanam namtaq gviyin.

¹⁹Hoq aoho soq nyi ak sam dvrwq namlo tulungv ngulug lvgab wgaql abynam bonam At Swn yuunam hoo ngulv svka dvb hang mwwnam hangam kaakin dvb bon nyiklo nyiba mvdwb xuqlin kunv bon nyim dvb jipa kun.

²⁰Hiyv nvkam ngulam yolu bvk maadwb ngulv hingkub sugdvl soq mwwpaq lamanam aky jinam pagoq sam kaat ju.

²¹Ngulug bon nyitanam niqtuqkv, albo bonam nyidwb; At Swg vnyiq kaagaho twqma, hvbmabde nyi tulug kaagaho kam albo bonam nyidwb nyidwn.

²²Hoqgab ngulv ngulug boram bulug lvgab kanam nvmlwq gviyin. Ngulv mwam vigo hubdil hengka pan, hoo ngulv mwam kaanamv mwv looxiam svka kaaklo nyebia alwb nyido ho mwv nulam hwngkw alwb mwwjwdo.

²³Taitas bvrwqngam bebnyiloqkam, mwv ngoqg bonam nyibam bov hoo nulam svka dvb ngoqg lvgab kwrwb bon nyinbov hoo mwwg lvgab wba bo bor tuluhv dvrwq namlo tulug hoqgv ho bulv Kristog yuugw nanv.

²⁴Bulam nulug abynam mam, anyangam kaakin to. Hoggab bulam hvb nyil kaakinamv dvrwq namlo tulungam kaakinam hvb nyidwn ho hvb nyibaloqkam bulv nulam ngulug paqnam si jvqtw jaqb paqdin golo paqdnyi hvl cengtayin.