Read Nyishi 2 KORINTI 9 Bible Online

2 KORINTI 9 - Nyishi bible

2 KORINTI 9

¹Judiya gvdalo doonbo Pwnbog dvrwqbo nyi tulu gab kanamnam svka ko pagoqkam ngo jvqtw jaqb nulam xeqd bvkam nyima su.

²Ngo cengdo nulv svka dvb mwwl doodo hoo ngo nulam paqs banv Mesidoniya nyi tulug agaho bepekun. Akaiya gvdalo doonbo vbw-bor tulungv mwnyw galoqkv svka dvb hvl nyix-nyiaql doodu dukun hvl ngo bekin tukun. Nulug kwrwb mwwsnamv bulug hangam vigo nyebia sora dvb mvpa ku.

³Sija ngoq soq bor tulu sam nulug dookub kanam gviyin ho ngulv nulug pagoqkam paql benam mam niqtuq dooma dvb agam rooxo gob besam mvmab; hvbmabde benam jaqhvb, nulug svka deenam mam mwx-mvaql ap paknwp hvl kanam pan.

⁴Hoggab Mesidoniya aloqgv nyi tulungv ngoqg lvgab haaba baloqkam, hoo nulam hog mwx-mvaql apnam mam kaapa maabloqkam, nulam hwdgo hingw kunamv, nulug hvnywnam bvrwqngam apaq tvl, ngulv hog hwdgo hvnyw kimpa.

⁵Hoqgab ngo soq bor tulu sam nulug dookub ngoqg wma daab otuqb kanam namcotvl nulug jibwk hvl birnam akiam mwx-mvaql ap yamdvb benam si al kimpa mwwl nyipan. Ngo nulug dookho wc yukam nulug jib mwwgam gab jinam, hvbmabde jidwb nyigam gab ma, ham mwx-mvaql ap yinwp mwwdo.

⁶Hoqgab soq agam sam mwwgab dvb nyipa; hiyv nyiv anyogo vly liidwn, mwv anyo kalam go dvn naadwn, ho hiyv nyiv koigo vly liidwn, mwv koi kalam go dvn naadwn.

⁷Hoqgab vxiv mwwg jib mwwbwqnam mam mwwkur tamab jito, hvbmabde hoq jinam ham jidin dootwl jidwb jigdvn mwwl jimab, hoggab Pwnbov hemp alwb hang mwwl jinbo akam abydvn.

⁸Hoq Pwnbov nulug hog mwlwho pwwma koho pwwdwb ham laabo yaab jitayin, hoqgv nulug pwwma cimanam mam looxiam hog mwlwngam pwdwb nulgab naleq dvb nulam jidynam mam vxiam albo pagoq gab jitayin.

⁹Dvrwqbo Potangv bedwn, “Mwv jwwgw nyi tulungam roto alwb jidwn; mwwg ayangv nwrba gob dooky dvn.”

¹⁰Ampaq paqnbo akam ampaqngam hoo wtwngam dvdwb jinbo Pwnbo akv nulam hog mwlw ampaqngam nulam jidynam mam jitayin hoo ammam ko bwwm dvb jitwl naleq dvb am swwm dvb jitayin hoo dvrwqbo aaxiam xeedwb jitayin.

¹¹Mwv nulam looxiam nyet tvl jiga al mvdwb mvtayin, hoggab nulug aky jinam mam ngulug galoqkv bulv kaapa tvl nyiv vigo Pwnboam nulug aky gab paqtayin.

¹²Hoggab nulug soq bon nyinam si Pwnbog dvrwqbo nyi tulungam bulug pwwmako ho pwwnam gob nyitwq ma, hvbmabde Pwnboam paqklo paqma vrram paqdwb nyipa.

¹³Nulv soq bon sam kvvbw cwkw dvb nyik gab la Kristog Tugu Puiyam mwwjw ko-gab hoo nulug ho rub alwb bul gab mwlwngv aky jikumko gab nyi tulungv vigo Pwnboam paqtayin.

¹⁴Hoqgab bulv hang hvvjw hara urajaq hoqgv nulam Pwnbov xibnv anyangam kaakin ko-gab, bulv nulgab Pwnboam xumj tayin

¹⁵Mwwg kor xila maanam akiam ngulam Pwnbov jigam gab mwam ngulv paqnya laju!