Read Nyishi GALATI 2 Bible Online

GALATI 2 - Nyishi bible

GALATI 2

¹Vnyw nywyw leq nywpig kokw so ngo Barnabaswg lvgab Jerusalem ngoqg lvgab Taitasnvn boolayil wkur kunum.

²Ngoqg wnamv hvbaloqkam ngam Pwnbov wnwk hvl kaakin ko-gab ngo wnum. Nyigbo nyi tulug lvgab vpwb dootwl dookum dook golo ngo bulam hoggub nyil Tugu Puiyam Nyoodo nyi tulungam bekinum ham hindib xwwkinum. Ngoqg otuqho bon nyiknam mam la sijag bon nyinam tulungam ngo niqtuq lengma bvsv hvl akukam mwwma dvn.

³Ngoqg ajin Taitas mwv Gwrik nyiib nyisjaqkam mwam mux mvtwk hvl hiyvkam gaml bemanum.

⁴Hvbmabde nyi tulu gon vbw-borvk hvl dvparho dooba banv mwam mux mvm dvb hvnum. Soq nyi tulu si ngulug urab piqlwql ngulug Jisu Kristog lvgab lokub alwb dool nyet swwnam mam mvqky-maqlam swwl pui mvlin taab haanum. Bulv ngulam nyera bvvdwb mwwnum.

⁵Ngulv tugu puiyig jvqtwngam nulgab niqtuq doom dvb mwwnv bulug benam mam vcwr gokam tamanum.

⁶Nyiilo nyib swwnbo tulungv ngoqg hog xinam ma, hoggab Pwnbov nyi tulug agam mam kama dvn; hoq nyi tulungv ngam hog gokam biswr maanum.

⁷Hvbmabde Pwnbov hoggub Pitornvn Juhudi tulungam Tugu Puiyam bekin mvdwb emin mimbwql xuqlinum, hoq hvbkalam Nyoodo nyi tulu gab Tugu Puiyam bulam bekin mvdwb mwv ngam jiknum.

⁸Pitornvn Juhudi tulungam Tugu Puiyam bekin mvdwb xuqlinam hvbkalam Pwnbov mwwg atorv ngam Nyoodo nyi tulungam Tugu Puiyam bekin mvdwb xuqlinum.

⁹Jems, Pitor hoo Jon bulv nyig wgbo nyiib nyinbo nyi tulungv ngam Pwnbov soq xinam bon sam nyim dvb jipa kunyi hvl cengtwl hoqgab bulv Barnabasnvn la ngam alaq irwqnum, hoq dvpar hoqg bon nyibambo gob mwwknum. Hoqgab ngulv kokw so loormins kunv, ngulv mux mvmanam Nyoodo nyi tulug pengko lo bon nyidub hoo bulv pepaql-muxnam Juhudi tulug pengko lo bon nyidwb bemin suknum.

¹⁰Bul mwlwg benamv ngulv jwwgw homabo nyi tulungam mwwgab dvb ngulv nyidnvk hvl benum, ngo soq pagoq sam kwrw aljaqb nyidub nyitanum.

¹¹Kokw so Pitor Antiokwb haadwk ho ngo mwam nyi mwlwg rolu agaho yolu ruqnum, hoggab mwv kaad lala dvb nyixiaqnum.

¹²Jems nyi tulu go kanamnum, hoq nyi tulungv hvvc maadab Pitor Nyoodo nyi tulug lvgab dvba twwbal doonum. Hvbmabde hoq nyi tulungv hvvc yukho, Pitor mwv hoq nyi tulug dook hoqgv wleqnum hoo bulug lvgab dvba twwba dvb mwwmanum, hoggab hoq nyi tulug pengko ho tuugin Nyoodo nyi tulungam pepaql-mux mvdwb nyido hvl benbov doogam gab mwv bulam bosnum.

¹³Hoo Juhudi vbw-bor tulungv ruqb bos sodiqbo nyi hvb Pitorg lvgab nyiba tanum, hoqg lvgab Barnabasnvn kam bulug bos sonam dooiyv nuug nukun.

¹⁴Kokw so ngo tugu puiyig jvqtw lamta jaqb bulv nyima wmanam mam kaapa tvl ngo Pitornvn bul mwlwg tagaho tadwb benum, “No Juhudi nyiv, hvbsujaqkam no Nyoodo nyi gon nyidwn hvb nyil swwdo, Juhudi nyi hvb nyiyo ma. Hvb nyibaloqkam, no hoggub nyil Nyoodo nyi tulungam Juhudi hvb nyil swwtwk hvl benyi tayin?”

¹⁵Ngulv, jvqtw jaqb Juhudi nyob ho dwrbuqnam nyiv, nyic nyinbo Nyoodo nyi ma.

¹⁶Hvbsujaqkam Jisu Kriston mwwjw ko-gab nyiv Pwnbog lvgab al dukub mvpa kun, hvbmab pvvbwg nyis tulungam bugil hoq gamlam tal swwk hoqgv ma. Ngulv kam Jisu Kriston mwwjw pakun ho ngulv Kristog tol mwwjw ko-gab ngulam Pwnbog lvgab al dukub mvdkub nyipan, hvbmabde pvvbwg nyis tulu gamlam tagam gab ma. Hoggab hiyv nyiv kam pvvbwg nyis tulu gamlam tal bugil swwgam gab Pwnbog lvgab al dukub mvdkub nyima dvn.

¹⁷Hvb nyiloqkam ngulv Kristog uraho doobal Pwnbog lvgab al dukub nyita koolo ngulv atam Nyoodo nyi hvb nyinbo gob nyidkun. hvnyiloqkam hoqgab Kristo nyig bov i? Hoggub nyilakam hvbma!

¹⁸Ngo atv sapia kunam mam ham ngo lokta mvdar baloqkam, ngo pvvbam juqbo dvn.

¹⁹Pvvb bvrwqngam bebaloqkam, ngo sidkun, pvvbv ngam mengknum, ho Pwnbog gab swwm dvb jipa kun. Ngam Kristog lvgab mwwg daapo aotv mengpa kun,

²⁰ho sija ngo at gab swwl dook ma, hvbmabde Kristo ngoqg ura si doodwn. Ngoqg sijag doog gvdwn swwg si ngam abil ngoqgab mwwg atwg swwgam jipaqbo Pwnbog Ko Tuupam mwwjwko hoqgv kaapa pan.

²¹Ngo Pwnbog anyangam haqxia maadwn. Hiyv nyi ak gon pvvbwg svkangam naal hoq galoqkv Pwnbog lvgab al dukub mvpa kunyiloqkam, hvnyiloqkam Kristo sidin kamab sisam nukun.