Read Nyishi GALATI 3 Bible Online

GALATI 3 - Nyishi bible

GALATI 3

¹Damabo Galati nyi tulu nulv! Nulam hiyv bikul sulum pan! Nulug vnyiq kaagaho Jisu Kristog daapo tolo sinam bvrwq puiyam kaad lalab doogtvl nulam hiyvjaq bikul sulum pan!

²Ngo nulam tox dvn; nulv ngam bekin tvb; pvvbwg nyis tulungam nyitwk hvl gaml jigam gab ham nyik gab nulv Pwnbog Yalam kaapa pan i hvbmab Tugu Puiyam tatwl mwwjw ko-gab kaapanum?

³Nulv hoggub nyil hwdgo paca dvn i? Nulv Pwnbog Dvrwqbo Yal galoqkv swwrab layil sija nulv nulug atwg gv ator hoqg lvgab niqtuq nyilin dvb nyinya dvn.

⁴Nulug hwdgo hentwr henknam mam niqtuq doom maadkub i hoq mwlwngam nyitkun? Ma, hog ak xinam go dooky banpv!

⁵Pwnbov nulam mwwg Yalam jitwl nulug pengko ho swrdorxeq nyis tulungam nyinam hv nulv pvvbwg nyis tulu gaml jinam mam tal nyigam gab ma, hvbmabde Tugu Puiyam tatwl mwwjw ko-gab sulak.

⁶Soq si Dvrwqbo Potangv Abraham gv pagoqkam benam hv sulak, “Mwv Pwnboam mwwjwnum hoo mwwg mwwjw ko-gab Pwnbov mwam nyiidar nyiv hvl looknv xuqlinum.”

⁷Hoqgab nulv cengdwb nyidwn, mwwjwngam doogbo nyi tulungv jvqtw jaqb bulv Abraham gv ko hosiq loodangv.

⁸Dvrwqbo Potangv kol otuq hoqgv Nyoodo nyi tulungam bulug mwwjw ko-gab bulam Pwnbov mwwg lvgab al dukub mvtayin hvl bekin conum, Hoqgab Dvrwqbo Potangv moodv haama daab Tugu Puiyam Abrahamnvn bekin conum, “Noqg galoqkv Pwnbov gvda gvt so doonbo nyi mwlwngam lvqc citayin.”

⁹Abraham mwwjwnum, hoqgab mwam Pwnbov lvqc cinum; hoq hvbkalam Pwnboam mwwjwbo nyi mwlwngam Abrahamnvn lvqcnam hvb mwv lvqc cidwn.

¹⁰Pvvbwg nyis tulungam bugil svqgwl swwnbo nyi mwlwngv Pwnbog beenamv, hoggab Dvrwqbo Potalo xeqnamv doodwn, “Hiyv nyiv pvvb potalo xeqpwl apnam pvvb mwlwngam tal swwma bov Pwnbog beenam nyi tulug uraho doodwn!”

¹¹Sija tvdy paku hiyv nyiam kam pvvbv Pwnbog lvgab al dukub mvnyiram; hoggab Dvrwqbo Potangv bedwn, “Hiyvn Pwnbog lvgab al dukub mvpa kun mwv mwwjwko hoqgv swwtayin.”

¹²Hvbmabde, Dvrwqbo Potangv bedwn, “Hiyv pvvb gaml mwlwngam tal swwdwn mwv hoq niqtuq hoqgv swwtayin.” Hvbmabde pvvbv mwwjwnam aoho hog nyis dooma dvn.

¹³Hvbmabde Kristo nulug beenam ak gob nyiknv mwv ngulam pvvbwg beenam bwdw hoqgam naalin pakun. Dvrwqbo Potangv bedwn, “Hiyv nyiam svvn aoho paqyinl ap pan hoq nyi ak hv Pwnbog beenam nyiv,”

¹⁴Kristog soq sib nyinam si Pwnbog Abrahamnvn birnam mam Jisu Kristo galoqkv Nyoodo nyi tulungam jidub hoo ngulv Pwnbog birnam Yalam mwwjwnam hoqgv kaapa mvdwb jinamv.

¹⁵Ngoqg vbw-bor tulu, ngo nyia kov looxiam nyikynam lo doocil betis; nyi vnyig pengko lo agam ak bunyiv loorminsul birwl xiqrwl ap kubnyiloqkam hiyvkam ham sapia nyoram hoo hoq aoho hog mwbw nyoram.

¹⁶Kol Pwnbov Abrahamnvn la mwwg ko hosiq tulungam birwl apnum. Soq so “Mwwg ko hosiq tulungam,” hvl bema, hvgdvn si nyi mwlwngam ma, vigo hvma. Hvbmabde si begamv, “Noqg ko hosiq” hvgdvn si nyi akin gonwg Kristog bvrwqngam bedwn.

¹⁷Soq sam ngoqg cengnamv, Pwnbov pvvb ak Abraham gv lvgab dingr minsul birnum, hoo ham juqbo maanum. Vnyw lwpy gola cammum kokw so haanbo pvvbv Pwnbog pvvb mvnam mam sapial mvxia nyoram.

¹⁸Pwnbog akin jinam mam pvvb aoho hingw dvb nyima dvn, hvbmab ham hingw baloqkam mwwg birnam mam hingw dvb nyima dukun. Hvbsujaqkam Pwnbov Abrahamnvn mwv birwl apko gab jinum.

¹⁹Pvvbam hog jikur pagoqgo dootwl jinum? Pvvb sam jinam pagoq si nyimur-wmurnam mam kaakin naadwb, hoo Abrahamnvn birnam mam jidwb hoqgv Abraham gv ko hosiq akv haanam gob doom twqdwb jinum. Pvvb sam ao gumtw galoqkv jisiql nyiig la Pwnbog pengko lo hvvky swwnum.

²⁰Hvvky pootum sam doog kuma jaqkam al supa, hoggab nyiv akin gotwq hvvky swwdy bov hoo Pwnbov kam akin gotwq.

²¹Hvnyiloqkam pvvbv Pwnbog birnam torab pam ceebiob swwdwn i? Ma, nywywngam hvb ma! Hoggab pvvbv nyi tulungam swwgam jinyiloqkam, nyia kov pvvbwg gamlam tal bugil swwl hoqgv Pwnbog lvgab al dukub mvs pakco.

²²Hvbmabde Dvrwqbo Potangv bedwn, gvda gvt mwlwngv nyiig alaqho doonum hoo Jisu Kriston mwwjwl bulam Pwnbog birwl jidkub apnam mam kaapa mvdwb jipa kun.

²³Mwwjwnam moodv haama daab ngul mwlwngam pvvbv pvtwq uraho nyumwb tuml mwwjwnam moodv haanam gob apnum.

²⁴Hoqgab pvvbwg alaqho ngulv doonum hoo Kristo haanam gob pvvbv ngulam kvvyw-tada bogub nyil doonum. Soq bvrwq si hvbaloqkam ngulug mwwjwnam lvgab ngulam Pwnbog lvgab al dukub mvdkub nyinum.

²⁵Sija mwwjwnamv haapa ku ho ngulv sija hoq kvvyw-tada bo pvvbwg alaqho dooma dukun.

²⁶Hoggab mwwjwnam gab nul mwlwngv Pwnbog Ko Tuup Jisu Kristog lvgab lvkin gob doobam dukun.

²⁷Hoggab nulam Kristog lvgab baptijum lvkin gob jitaq pakun. Hoqgab nulv sija Kristog simp hvbkalam xinam gob nyidkun.

²⁸Hoqgab sija Juhudi gola Nyob luusaq, nyet gola nyera go, nyega go la nyem dooma dukun, nul mwlwngv Jisu Kristo tolo akin gob nyidkun.

²⁹Nulv Kristog nyiv nyiloqkam, nulv Abraham gv ko hosiq tulungv, hoqgab hoq niqtuq lo nulv Pwnbog jitayin hvl birnam ham kaapa tayin.