Read Nyishi GALATI 4 Bible Online

GALATI 4 - Nyishi bible

GALATI 4

¹Hvbmabde ngo bedwn, ko tuupv mwwg abwg gumnam nvvsiq tayin ho hog mwlwngv mwwg gab doos dvn, hvbsujaqkam, mwv koi maadab himy anyo xiqyikam mwv nyera hvb nyidwn.

²Mwv anyo xiqyikam, mwam mwwg abv alaq gvqlwq maady deedib mwam kvvyw-tada bo nyiv doodwn.

³Soq sib kalam ngulv kam gvda gvt sam bvvnbo yalwg alaqho doonum; nyera swwl Yalv akam maadab doodwk apoho doonum.

⁴Hvbmabde mood jaqkv haad kukho Pwnbov mwwg Ko Tuupam kokw so kanam kunum. Mwv nyia kog nyem ak galoqkv mwam dwrbuqknum, ho mwv Juhudi tulug pvvb alaq uraho swwl doonum,

⁵pvvb alaqho doonbo nyi tulungam naalin tukul ngulam Pwnbog ko gob swwm dukub nyimnum.

⁶Nulv mwwg ko tulub nyidkun hvbnv Pwnbov mwwg Ko Tuupwg Yalam ngulug hang uraho jilwqpan. Hoq Yalv bedwn, “Ab, ngoqg Ab.”

⁷Hoqgab no sija nyerab nyil dook ma, hvbmabde mwwg ko tuupv ku. No mwwg ko tuupwb nyigam gab nam Pwnbov mwwg doognam mwlwngam ko tuup tulungam jitayin.

⁸Kol otuqho nulv Pwnboam cengma daqdwkho nulv jvqtw pwnbo maab asaq pwnbo tulug nyerab swwl doonum.

⁹Hvbmabde nulv sija Pwnboam cengm paku ho hvlkam ngo bedwn, sija nulam Pwnbov cengm pakun, hoqgab nulv hog nyitwl ator maanbo, aya kaapa dvb nyinbo dookub wkurl hoqg nyerab lokta swwnw dvn.

¹⁰Nulv xixo xirwl mwwgab lalal aal ata go, Pool ata go, mood ata go hoo vnyw go xidwn!

¹¹Ngoqg hangv nulam hodo! Ngoqg hwdgo nulgab bon nyiknamv hog niqtuq dooram namgo mwwdo!

¹²Ngoqg vbw-bor tulu, nulam ngo xumdwn, ngoqg hvbkalam nulv nyito. Hoggub betlakam, ngo kam nulug hvb nyidwn. Nulv ngam hog gokam nyimur nyiyeq maasu.

¹³Ngo nulug agaho otuqjaqb Tugu Puiyam bekinam mam nulv mwwgab sudco; soq si ngo vc ko-gab nyinum.

¹⁴Hvbsujaqkam nulv ngoqg gv vcnamv pooka-yirkanam hvb nyisbakam ngam haaxaq xaql oyum la haqpaq maanum. Hvbmab nulv ngam Pwnbog ao gumtw akgon hwiywb svgagvrwqnum; ho Jisu Kriston svgagvrwqnam hvbjaq nulv ngam svgagvrwqnum.

¹⁵Nulv hemp poma vrram ponum! Nulug hoq nyinamv sija hoggub nyinkun? Ngo atv nulug pagoqkam sam bedwn, nulv ngam nulug atwg hangam kam pudwb nyinyiloqkam pulin ngam nulv jitanum!

¹⁶Ngo nulam jvqtwngam begam gab sija ngo nulug ceebiob swwdku i?

¹⁷Hiyv nyi tulungv nulam aldvn hvb nyidwn hoq nyi tuluhv nulam jvqtw jaqb almadwn, hoggab bulug hang uraho mwwnamv alwb mwwma dvn. Bul mwlwngv nulam ngoqg galoqkv boopin dvb mwwdwn, ho bulv hoggub nulam mwwdwn hoq hvbkalam nulam kam bul gab mwwm dvb mwwdwn.

¹⁸Soq sib aal looxiam albo bon pagoq gab mwwbil mwwnam si aldo, hvbmabde ngo nulug ogumho dooiyam soq sam nyitwq maadwn.

¹⁹Ngoqg tumanam ko tulu, nulug uraho Kristog vnyiq hang baqnam mam nulam kaapa maady deedib ko bwwta yukam annv cinc cinam hvbkalam ngo vc cidul doodwn.

²⁰Ngo sija nulug lvgab ogumho doolakam nulam agam oksub binw-wnw do; hoggab ngo nulam hinc yooma.

²¹Pvvbwg gamlam tal bugil swwnbo nyi tulungam ngo tox dvn; nulug pvvbv hog hvl bedwn ham tapa maad i?

²²Pvvbv bedwn, Abraham nyega ko vnyi go doonum, akwn hv paqn kov, ho akwn hv nyet nyem hoqg kov.

²³Mwwg paqn ko ak ham nyia ko ko bwwcwb bwwnum, hvbmabde nyet nyemwg ko ak ham Pwnbog birko jaqb mwam dwrbuqnum.

²⁴Soq sam ngulv kvvyw-kaacnam hvb kaaka tuj: soq nyem vnyi si pvvb vnyingv. Akwn si Sinai Puutu hoqgv haanbo, paqnwg imiqho dwrbuqlinam; mwnwg eminv Hagar.

²⁵Hoggab Arab agam lo Hagar hvgdvn hv Sinai Puutu, ho Hagar sijag nyerab doonbo Jerusalem nampam la hoqg uraso nyi doonyia bo nyerangv.

²⁶Hvbmabde ao gvdag Jerusalem si nyetbov hoo mwn ngulug annv.

²⁷Hoggab Dvrwqbo Potangv bedwn, “Twrngum bo nyem akv hemp poto! Hemp alwb sogoql beto, no nywywngam ko cinc vcam cikama! Nyol boomabo nyem akv, nyol boonbo nyem akam, ko vigo doobin yaatayin.”

²⁸Ngoqg vbw-bor tulu, sija nulv Aisak hvb Pwnbog bir kunum ko tulu ngvku.

²⁹Kol hoq moodho nyia kog soodin lo ko bwwcwb bwwnam akv Pwnbog Yalv dwr buqnam ko akam mvnyi-mviyanum. Sijakam ham hoq nyinam akinam nyidwn.

³⁰Hvbmabde Dvrwqbo Potangv hog hvl bedo? “Paqnam la mwnwg ko tuupam ruqxa to, hoggab paqnwg ko tuupv abwg gumnam nyet nyemwg ko tuupwg lvgab gumnam naabaq dvb nyiram.”

³¹Hoqgab ngoqg vbw-bor tulu, ngulv nyera paqnwg ko tuup kuma, hvbmabde nyet nyemwg ko tuupv ku.