Read Nyishi GALATI 5 Bible Online

GALATI 5 - Nyishi bible

GALATI 5

¹Ngulam nyet swwm dvb Kristo naalin pakun. Hoqgab nyet nyi tulu hvb nyil swwto hoo akukam atam lokta nyerab swwt kunwp mwwl nyimab.

²Poul ngoqg soq benam sam nulv tato! Nulv atv atam pepaql-mux mvk dvb mwwd nyiloqkam, hvb nyiloqkam Kristo nulgab xika kvla maanam ak gob nyipa ku.

³Ngo sam bidil bekin dvn, hiyv nyiv atam pepaql-mux mvk dvb jidwn, mwv pvvbwg gaml mwlwngam tal bugil swwdwb nyiky dvn.

⁴Hiyv xeq nulug pengko hoqgv pvvbam bugil swwl Pwnbog lvgab al dukub nyinbo nyi tuluhv Kristo galoqkv nulv atam aado dukub mvs pakun, ho Pwnbog anya hoqgv aado ho doodkun.

⁵Ngulv nyiloqkam ngulug hingwnam Pwnbov ngulam mwwg lvgab al dukub mvtayin hvl mwwjwdvn, hoo ngulv Pwnbog Yal jinam mwwjwnam ator hoqgv bon nyinam mam kaayal doodwn.

⁶Hoggab ngulv Jisu Kristog lvgab lvkin gob doodkun, hoqgab pepaql-mux mvmanam bvrwqngv hoggub nyilakam asaq dvb mvnyiram. Hvbmabde mwwjwl abynam hoqgv bonam nyinamv niqtuq doodwn.

⁷Nulv hindy alwb nyil swwdul doonum! Hiyv nyiv nulam jvqtwngam bugil swwk maabwk hvl biturbov? Mwv hoggub nyil nulam bigumnum?

⁸Soq si nulam dvgoq goqnbo Pwnbov nyiram.

⁹“Wtwngam goorab dvb mvdwb opap anyo ko go ciqlwq jaqkam huc cipwg wtwngv goobur dvn,” hvl nyiv bedwn.

¹⁰Hvbsujaqkam, ngo sijakam nulug pagoqkam mwwjw swsw dvn, nulv ngoqg benam sam oksub taxiaql taram mwwdo, hoggab At Swg lvgab lvkin gob doogam gab ngo nulam mwwjwdo. Hvbmabde hiyv nyiv nulam nyik-nyiya gvnbo nyi akv mwv Pwnbo galoqkv laqm baqdynam mam baqtayin.

¹¹Ngoqg vbw-bor tulu, ngo pepaql-muxnam bvrwqngam hvraqb bel pepaql-mux mvky dvb nyidnvk hvl bekarl sija godab dook baloqkam, ngo hoggub nyil soolo godab mvnyi-mviyanam mam hindul dootayin? Hvb nyiloqkam Kristog daapo pagoqkam pui benamv hog gokam nyitub-wtub go dooiyin maapa.

¹²Ngo mwwnamv hiyv nyi tulungv nulam bik-beya gvdwn bulam bulug mwwkwb nyimto, ho bulam atwg laanyi maak ho wwm suto.

¹³Ngoqg vbw-bor tulu, nulam nyiloqkam nyet swwm dukub dvgoq goqknamv. Hvbmabde nyet swwdynam mam nulug gv ayaqg mwwbinam hoqg nyerab swwm maab. Hvbmabde nulv akwn akwn aby bogdvl svkal bonam nyimin suto.

¹⁴Hoggab “Noqg gutu-gorangam no atam aby sunam hvb aby boto,” hvl benam si gaml mwlw jaqg gaml niqtuqkv.

¹⁵Hvbmabde nulv akwn akwn cemin gamin sul sudum svr hvb nyib nyiloqkam kaaya to, nulv akwn akwn mengminsul vly kamab twryum tayin.

¹⁶Hoqgab ngo nulam sam bedwn, nulv Yalwg benam mam tal swwto, hvbmabde gv soodin ayaqg mwwbynam mam nyil ham hang xumtwq dvb nyil doomab.

¹⁷Hoggab ayaqg mwwbil nyinamv Yalwg ceebiob nyidwn, hoo Yalwg hang mwwnamv gv ayaqg ceebiob nyidwn. Soq vnyi si ceebio kalamv. Hoqgab nulv atwg mwwkwb mwwtaqb nyidwb nyimabv.

¹⁸Yalv nulam bool wg baloqkam nulv pvvbwg benam mam tadkub nyima dukun.

¹⁹Hvbmabde gv ayaqg nyis mwlwngv cimpwnamv. Soq torab si, yocu-yabio nyinamv, kacbo, al apaqmab nyinam,

²⁰ui panam, hang baqnam, hang lengnam, sootu tunam, nwwdu nwwnam, ceebio hang baqnam, hang pwsaqnam, kaaneqnam, kiic meerab mwwnam, mwwc-mwwyab mwwnam, swwbin yaatws mwwnam, imiq pingsaqnam, dvpar parsaqnam;

²¹nyi mengnam, twwxum-dviyaqnam, roogumnam hoo hoqhvb asaq asaqb nyinam. Ngo nulam otuqho benam hvbkalam sija yvtw padwn, hoqhvb nyinbo nyi tulungv Pwnbog lvpw hatiam kaapa nyoram.

²²Hvbmabde Yalwg niqtuqkv abynam, hempnam, swrsomalonam, cwqnam, ayanam, alnam, dengkynam,

²³yannam, hoo atam cwqsnam. Hoq tulu sam looma bo pvvb akukam dooma dvn.

²⁴Hoqgab Jisu Kristo gab dook bo nyi tulungv bulug gv ayaqg nyinw-wnwnam mam daapo aotv hog mwlwngam nyinwnam mam mengxa pakun.

²⁵Yalv ngulam swwgnanam jipa kun, hoqgab ngulv mwwg alaqho dootwl mwwg benam mam tal swwdwb nyidwn.

²⁶Ngulv xitor ab gob atv mwwdwb nyima dvn, ho akwn akwn nyineq-nyireql ho akwn akwn hang nyiluq mins dvb, ho kvvnw maab nyidwb nyima dvn.