Read Nyishi IPISI 2 Bible Online

IPISI 2 - Nyishi bible

IPISI 2

¹Kol nulv otuqho nulug atwg nyimur ko-gab la nyic nyik gab yvj yal lo sil dooknum.

²Hoq apoho nulv gvda gvtwg almanbo lamtab wmin gvl doonum, ho doa nvg aoho doonbo pwnbog benam mam tama bo nyi tulungam bvvnbo yalwg alaqho doonum.

³Ngul mwlwngv bulug hvb nyinum, hoo ngulv hognvkv nyinwnam ham nyikil swwl doonum hv jvqtwngv, ho ngulug hangv kam, ngulug gv ayaqngv nyidwb mwwnum ham mwwtaqb nyikarnum. Ngulug nyic pagoqho bebaloqkam ngulv kam asaq nyi tulug hvb Pwnbog hang lengnam laqm mam baqdwb nyinum.

⁴Hvbsujaqkam Pwnbog ayangv koi alko gab, hoo mwwg abynamv ngul gab mwwc lama dvb doogam gab,

⁵ngulv Pwnbog benam mam tama gab yal lo sis kubakam mwv ngulam swwgam Kristog lvgab swwm dvb jipa kun; Soq si Pwnbog anyangv nulam ywwpan.

⁶Ngulv Jisu Kristog lvgab alko gab lvkin gob alwb dook gab mwv ngulam mwwg lvgab ao gvdag lvpw haty lo lvpw sa hemba mvdwb purab pakun.

⁷Mwv ngulam Jisu Kristo galoqkv mwwg abynam mam kaakin namsi mwwg anyangv hog hwdgo koidvn ham kaakin dvb nyinum.

⁸Pwnbog anyako pagoq gab, nulug mwwjw ko-gab nulam ywwt ywwpa kun. Soq si nulv hog ak nyigam gab ma, hvbmabde Pwnbog jinyinamv.

⁹Hiyvg nyiamkam paqs mvma dvb; hoqgab soq si nulug nyis tulungam nyik hoqgv kama.

¹⁰Pwnbov ngulam pwnbov, hoo ngulv Jisu Kristog lvgab lokub doogam gab mwv ngulam albo nyis tulungam nyil swwm dvb ho ngul gab mwx-mvaql ap kunam nyis tulungam nyim dvb ngulam mwv pwpan.

¹¹Atam ngulv kol pepaql-mux mvnamv hvl benbo Juhudi tulu, hoo Juhudi tulungv nulv lak pepaql-mux mvmanamv hvl benam Nyoodo nyi lo dwr buqnam nyi tulu-nulv hognvk nyiib nyil otuqho doonum ham mwwkato.

¹²Otuqho nulv Kristog agam hoqgv aado ho doonum. Nulv Nyoodo nyiib nyinum, ho nulv Pwnbog xuqnam nyi tulub nyimanum. Ho nulv Pwnbog loornam mwwg dingrnam Juhudi nyi tulug lvgab nyibam-wbam dvb nyingam maanum. Nulv Pwnbo doomabo hoo hog hingwnam gokam doog maanbo nyiib nyil soq gvda so doonum.

¹³Hvbmabde sija nulv, Jisu Kristog lvgab lvkin gob doogam gab otuqho aado ho doos jaqkam Kristo swlyw kunv ngulam Pwnbog ogumb boa pakun.

¹⁴Hoggab Kristo mwv atv Juhudi tulungam la Nyoodo nyi tulungam nyob luukin gob swwm dvb mvtkul mwv ngulam swrsomalongam jipa kun. Kristo mwwg daapongv ngulug pengko ho doonbo cwqnanam ngulam ceebio baqmin sudub jinbo cwqcam naaxa pakun.

¹⁵Mwv Juhudi tulug pvvbam ho hoqg gamlam la nyicwngam saxia tukul nyob luunyiam luukin gob nit nyob akin gob mvtkul mwwg lvgab lokub swwm dvb swrsomalongam jipa kun.

¹⁶Kristo daapo aotv siknv bulug ceebio baqmin sunam mam mvpaq gvnkun. Mwwg daapongv nyob luunyi luunyiam luukin gob mvtkul bulam Pwnbog dookub bookurl haag pakun.

¹⁷Hoqgab Kristo ipoqkunv Pwnbog hoqgv aado ho doonbo Nyoodo nyi tulungam la Pwnbog ogumho doonbo Juhudi tulungam bul mwlwg agaho swrsomalo Tugu Puiyam bekinnum.

¹⁸Soq si ngulv Kristo galoqkv sulak mwlwngv Juhudi lajaqkam hoo Nyoodo nyi lajaqkam yal lo akin gob nyil Ab Pwnbog dookub haadwb kaapa pakun.

¹⁹Hoqgab Nyoodo nyi tulu, nulv sija Nyoodo nyiib, ho nyiinwb nyima dukun, hvbmabde Pwnbog nyi tulu lvgab doobam bo nyiv hoo Pwnbog imiq dvpar parkin hoqg nyiib nyidkun.

²⁰Nyiqry benbo tulu ngvla xuqnam nyi tulungv cuukiqlo diigab apnam nam mwwgwnan rwwda annv, Jisu Kristog lvgab nulam kam diigw napan.

²¹Mwv nam nvmpwngam torl daqgbov hoo sam At Sw gab dvrwqbo xumkub nyil swwrab mvdwb At Swn jipaq pan.

²²Nulamkam mwwg lvgab lokub doobal asaq nyi tulu lvgab mwlwngam mvtaql nam namkin gob mvpan ho Pwnbov yalwb nyil hoq uraho doodwn.