Read Nyishi IPISI 3 Bible Online

IPISI 3 - Nyishi bible

IPISI 3

¹Soq pagoq gab sulak Jisu Kristog nyuum Poul ngo, Nyoodo nyi tulu nulgab ngo Pwnboam xumdwn.

²Jvqtw jaqb Pwnbo mwwg anyangv ngam nulug alko gab bon nyim dvb jipa kun hvl nulv tapa nukun.

³Pwnbov mwwg hang uraho mwwsil apnam mwwg ura bvrwqngam ngam bekin tukul ngam cengm dvb jiknum. (Ngo soq pagoq sam xiqsuml xeqg yin.

⁴Ngo hognvkv nulam xeqpan ham nulv nyib nyiloqkam ngo Jisu Kristog ura bvrwqngam hoggub nyil cengdwn ham nulv cengtayin.)

⁵Otuqho kolwg moodho nyi tulungam soq ura bvrwq sam bekin maanum, hvbmabde Pwnbov sija yal galoqkv mwwg dvrwqbo xuqnam nyi tulungam hoo nyiqry benbo tulu galoqkv mwv sam kaakin pakun.

⁶Hoq ura bvrwqngv soq si sija Nyoodo nyi tulungv Juhudi nyi tulug lvgab Pwnbog lvqcnam gumnam lokub bvvbam dvb nyidkun. Bulv gv akin hoqg soodinb nyidkun hoo Pwnbov Jisu Kristog aoho birnam mam kam bulv naabam dvb atorv bulv doodkun.

⁷Ngam Tugu Puiyam nyerab swwm dvb Pwnbov aky lvqc cibwq jipa kun, ho mwv ngam mwwg bonam nyinam atoram jipa kun.

⁸Ngo Pwnbog nyi tulug pengko lo mwlwngam anyo yaan bov, hvbsujaqkam Pwnbog nywywngam mwwc lamanam xooma bo Kristog Tugu Puiyam Nyoodo nyi tulug agaho baqkin mvdwb ngam jinum,

⁹hoo nyi mwlwngam Pwnbog ura bvrwqkam mwwrwl apnam mam hoggub niqtuq nyilin pakun ham kaapa mvdwb jipan. Hog mwlw hoolu luuxiam Pwnbo Pwnbov kol nwrba hoqgv mwwg soq ura bvrwq sam hiyv nvkam cengm dvb jimab kvsil apnam.

¹⁰Sijag mood so dvrwq namlo galoqkv mwwc lamanam Pwnbog mwwlwqnam ao gvdag lvpw lo doonbo ao gumtw tulug gora abwb ator doogbo tulungam cengm dvb deedy luuxib nyil kaakin pakun.

¹¹Soq sam Pwnbov kol nwrba hoqgv mwwtwl apnam nwrba cvtam gab nyidynam pagoqkam At Sw Jisu Kristo galoqkv niqtuq nyilin deenam gob nyiknum.

¹²Jisu Kriston mwwjwl mwwg lvgab lokub doogam gab ngulv Pwnbog dookub haakam alwb mwwl bosmab haadwb atorv doodkun.

¹³Hoqgab ngo nulam mvnyi-moiyul bedwn, ngoqg nulgab hentwr henam mam kaatwl nulv hang homab, hvbmab soq mwlw si nulgab swwg alko gab nyidwn.

¹⁴Soq pagoq gab ngo Abwg agaho lwbw kumpwl xumdwn,

¹⁵ao gvda tolo jaqkam hoo gvda gvt so jaqkam imiq dvpar pvrxiam jvqtw eminam nvvrwq dvn.

¹⁶Pwnboam xuml mwwg yuunam gumn noosu hoqgv nulam mwwg yal galoqkv nulug hang uraho ator mvdwb atoram jit bvk hvl ngo kodwn,

¹⁷hoo mwwjw gvdwl Kriston nulug hang uraho doodwb nulv mwam dook jito. Ngo xuml bedwn nulv Kristog abyko uraho rwwda diilwq pan hvb hwngkw jaqb dooto,

¹⁸ho nul mwlwngv lokub Pwnbog nyi tulug lvgab Kristog abynamv hog hwdgo taqt dvn, aaso dvn, ao dvn hoo ura dvn ham mwwcin nan atoram jitwl cengm dvb nyitayin.

¹⁹Nulv mwwg abynam pagoqkam cingyum nyoma jaqkam meeg cengd kunpv, hoqgab nulv Pwnbov hognvk vnyiq hangam baqdwn ham pwbw jaqb baqto.

²⁰Ngulug hang uralo dootwl mwwg ator lvgab bon nyidul doonbo ho ngulv kodwb mwwnam mam laabo yaab bonam nyinbo, ho ngulug mwwnam mam koi yaab jinbo:

²¹Pwnbog eminam dvrwq namlo hoqgv ho Jisu Kristo galoqkv nwrba cvtam hoqgv nwrba gob ko hosiq-hosiq xaqb yuunka! Amen.