Read Nyishi IPISI 4 Bible Online

IPISI 4 - Nyishi bible

IPISI 4

¹Jisug emin gab pvtwq uralo nyumwb doonbo, ngo nulam xuml bedwn At Sw nulam xibnv dvgoq goqnam hvb nulv Pwnbog kaagaho xinam gob nyil swwto.

²Looxiam nulv mvnyi-moiyul, hang nyinyiaqbo ho cwql swwnbo nyiib nyil swwto. Nulug abynam mam akwn akwn svka kaminsul kaakin to.

³Yalv jinam hang pwkin gob nyil swwnam mam hindy aljaqb ap dvb ho nulam lvkin gob doom dvb jinbo swrsomalongam haagab apto.

⁴Gv vpv akin dvn, yal akin dvn, hoo Pwnbov nulam dvgoq goqnam hingwnamv kam akin dvn.

⁵At Swv akin dvn, mwwjwnamv akin dvn ho baptijumv akin dvn,

⁶ho nyi mwlw gab Pwnbo Abv kam akin dvn, mwv mwlw jaqg Atv, hog mwlwngam mwv nyidwn, mwlwngam koi yaadwn hoo hog mwlwho doodwn.

⁷Ngulam vxiam lvqc xinam jaqg aky go Kristog hvbkalam aiyin kalam hvb mwlwngam lvqc cipan.

⁸Dvrwqbo Potangv bedwn, “Mwv ao gvdab caadwkho, mwwg lvgab nyuumv vigo bool wgnum, mwv nyi tulungam lvqc cinum.”

⁹Hvbnyiloqkam, “Mwv aob caanum” hvgdvn si hoggam begdvn? Hvgdvn si mwv otuq ipoq dvkho mwv swcw nvg urajaq so ipoqnum.

¹⁰Hoggab hiyv ipoqnum hoq akinv aob caanum, hoo doa nvg ao jaqb, hoq ao yab caanum, ho swcw-nyodongam mwwg atoram hempa mvdwb nyinum.

¹¹Nyi tulungam lvqc cinbov mwv sulak; mwv nyi tulungam asaq asaqb lvqc cinum, nyi tuugin hvvky swwm dvb, tuugin nyiqry benbo tulu gob, tuugin Tugu Pui bekarbob, tuugin rvky bob la biswrbob nyil swwm dvb mvnum.

¹²Mwv soq sam Pwnbog nyi tulungam Kristan bonam nyim dvb bulam mwx-mvaql ap jinum, ho Kristog gv vpam koi mvdwb mvnum.

¹³Hoo ngul mwlwngv lvkin gob nyil ngulug mwwjwnam hoq akin gab mwwjwl Pwnbog Ko Tuupwg gonam cengtayin, ho ngulv nyi akambo nyi gob nyil Kristog hvbkalam nyiipwb nyitayin.

¹⁴Hoqgab ngulv sija himy vjw hvb nyik yooju, iss xupiqkam dooiyv nuukub-nuuxeql nuunam hvb, ho xaalyo bo nyi tulungv tomswr swrk-swryanam, swrdorxeqb nyignam nyi hvb nyima dukun.

¹⁵Hvbmabde aby bonbo yal lvgab jvqtwngam bel, ngulv nyitaq mwlwho ngulug Atwb nyinbo Kristog tolo swwrab dvb nyiky dvn.

¹⁶Atwg gamlam tal gv dorpwg hoolu luuxiv lvkin gob dooba dvn, hoo gv dorpwngv dumpo lvgab riisiq riimeql doodwn. Hoqgab gv soq doonbo hoolu luuxiv atwg nyidynam bonam nyiyikam gv dorpwngv swwrab dvn, hvbkalam bulv atvkam abyko uraho swwxy dvn.

¹⁷Hoqgab ngo nulam bitwram soq sam At Swg emin gab beky gvdwn; kan uraho hangam apbo ho niqtuq doomabo mwwnam mam mwwnbo Nyoodo nyi tulu hvb nyil sija akukam swwk maabv.

¹⁸Bulv Pwnbog swwg jinam mam kaapa ming dvb nyima dvn, hoggab bulv hog gokam cengcin ma hoo bulug hangv vdw dvn.

¹⁹Bulv hog mwlw hvnyw-har mwlwngam mwwpa kumab nyiknam, ho bulv atam mwwpa sukmab kac-tanyiaq bo bonam nyidwb hoo nyikin maanam mam hingkurl mwwkur saqxy majaqb nyinum.

²⁰Soq sam nulv Kristog galoqkv tapanam ma.

²¹Nulv jvqtw jaqb mwwg pagoqkam mwwg buu tulungv Jisu jvqtwngv hvl nulam tomswrnam mam nulv tagab pakun.

²²Hoqgab nulv otuq hoq kolwg dwiywq-twiywql hoo nyis-nyipeql nyinam mam apaq tuku,

²³nulug hangam la yalam nit dukub mvdar dvb nyikin paku.

²⁴Hoqgab nulv, nulam Pwnbov mwam guss dvb pwnam mam mwwl nulv jvqtw jaqb nitib nyil nyedarbo nyiib swwl albo nyiib nyil dvrwq alwb swwnam mam kaakin to.

²⁵Hoqgab sija galoqkv nywywngam xaalyo lyokmabv. Nyi vxiv atwg gutu-gora lo doobam nyi tulungam jvqtwb agam goodwb nyidwn, hoggab ngul mwlwngv Kristog gv akin hoqg nyiv.

²⁶Nulv hang lengjaqkam nulug hang lengnamv nulam nyic nyim dvb jikmab; hoo aal loopwngam hang lengl doomab, hvbmab nulug hang lengnam mam doonyiv haama daab apaq tuku.

²⁷Uiyam pagoq kaacoql bon nyim dvb mood jimab.

²⁸Dvcobo akv dvco conam mam apaq tukul mwwdil at gab dvsam bonam nyinwr sudub nyirabto hoo jwwgw boam svka to.

²⁹Agam gook lo nulug agam hoqgv almanbo agam mam lengm maabv, hvbmab albo agam mam bedynam jaqkam bel nulug benam mam tanbo nyi tulungam tor mvma dvb, tangam bo agam gooto.

³⁰Pwnbog Dvrwqbo Yalam bimur maabv; hoggab yal si Pwnbov nulug aoho nulam mwwg gvku hvl muxul apnamv, ho aal loog golo nulam mwwg nyi tulungv hvl naalin tayin hvl birnamv doodwn.

³¹Hoolu mwlw bec-beyangam, hang lengnam mam, haaxaqnam, bej-beparnam, biru-beronam ho almab benam, hang baqnam mwlwngam apaq tuku. Sogoq goql benam mam, tob-taiyil benam mam bek maabv! Oyum kacib mwwnam mam akukam mwwk maabv!

³²Hvbmabde aya to, akwn akwnwg swwg gab mwwto, hoo akwn akwnwg nyimurnam mam Kristog emin gab Pwnbov nulam apaq jinam hvbkalam nulvkam nulug pengko ho nyimurnam mam apaq mins tuku.