Read Nyishi IPISI 5 Bible Online

IPISI 5 - Nyishi bible

IPISI 5

¹Nulv Pwnbog tumanam ko tulub nyidkun, hoqgab nulvkam mwwg hvb nyil swwdwb mwwto.

²Kristo ngulam aby bonum ho nulgab mwv atam jipaq kunum hoo Pwnbog hangam xumdwb mwv ngul gab sungam albo guun nan hwiywb atam hirin rin gvnkun.

³Nulv Pwnbog nyi tulungv ku, hoqgab nulug pengko ho yocu-yabio, dvconam, almab nyinam, roogumnam bvrwqngam bepa maabv.

⁴Hvbmabde kacbo, dengky maanbo, almanbo agam mam nulug pengko ho goomab, hvbmab nulv Pwnboam paqdwb nyidwn.

⁵Nulv soq sam jvqtw jaqb cengtka, hiyv nyiv yocu-yabio nyidwn, dama dvn, roogum dvn (Hoggab roogumnamv ui panam hvb nyidwn) hoq nyi tulungv Kristog la Pwnbog lvpw haty lo hog kaaparam hoo nywywngam haanyiram.

⁶Niqtuq doomabo almanbo agam lvgab nulam hiyv nvkam vm mvvk maabv, Pwnbog hang lengnamv mwwg benam mam tamab bugil swwma bo nyi tulug aoho haatayin.

⁷Hoqgab hoqhvb nyinbo nyi tulug lvgab nulv akukam hog nyiba maabv.

⁸Nulv kam atv otuqho kan uraho doonum, hvbmabde sija nulv At Swg nyiib nyidkun ho huto uraho swwdkun. Hoqgab nulv huto lo doonbo nyi tulungv swwnam hvb nyil nulv swwto.

⁹Hutongv lak hog mwlw luuxy alboam nyiidarnam, hoo jvqtwngam kaakin dvn.

¹⁰Hognvkam nyibnyiloqkam At swg hangv xumtayin ham nyito.

¹¹Kan uraho doonbo nyi tulungv niqtuq doomabo nyis tulungam nyikho nulv nyiba maabv, hvbmab bulug nyixiaqnam mam kaakin to.

¹²Bulug nyisil nyinam mwlwngam jvqtw jaqb bed bvkam hvnyw dvb nyido.

¹³Hog mwlwngam huto lo boa kubnyiloqkam bulug tvkam hindib kaadar taikun.

¹⁴Hoggab hognvkam kaadar pakun hoqhv huto hvb nyidkun. Hoqgab soq sam bepnamv doodwn, “Yubn bo, huurab tuku Sinam hoqgv gorab tuku! Kristo nam hutongam jitayin.”

¹⁵Hoqgab nulv hoggub nyil swwdwn ham hengab to. Damabo nyi tulug hvb nyimab, hvbmab damnbo nyi tulug hvb nyil swwto.

¹⁶Albo moodam xuqlin gvdwl bon nyito, hoggab mood tulu si almanv.

¹⁷Hoqgab nyi paca bo nyi hvb nyimabv, hvbmabde At Sw nam hognvkam nyim dvb mwwdwn ham no meelin to.

¹⁸Roo alangam twwxum kotwl atam muiyu kosmab. Hvbmabde Yalam hang uraho swrwq rwql doomto.

¹⁹Akwn akwnwg lvgab bemin beto, bemin ho dvrwqbo beminam beto. Bejumlo la bemin bel At Swn nulug hang uralo paqto.

²⁰Hog mwlw gab Pwnbo Abwn ngulug At Sw Jisu Kristog emin gab paqto.

²¹Kriston bosil nulv akwn akwnwg benam mam tal xuml swwto.

²²Nywxw tulu, nulv At Swn hentaql nulug nyol tulug benam mam tal swwto.

²³Hoggab nyolv mwwg nywxw akwg atwb nyidwn, hoq hvbkalam Kristo dvrwq namlo aoho atwb swwdwn hoo Kristo mwv atv su dvrwq namlo hoqg gv vpv ho dvrwq namlongam ywwn bov.

²⁴Hoqgab nywxw tulungv bulv bulug nyol tulungam, dvrwq namlongam Kriston bugil swwnam kalam hvb nyil swwdwb nyidwn.

²⁵Nyol tulu, Kristo dvrwq namlongam abybol atam jipaqnam hvbkalam nulv nulug nywxw tulungam aby boto.

²⁶Soq sam Pwnbov mwwg agam bepnam dvrwq namlongam Pwnbog alaqb iss uraho hwrxaqtvl jipaq dvb benam bvrwq gab nyinum.

²⁷Ho dvrwq namlongam mwwg at gab hindib kangam alwb, dvrwq dvb la dengky dvb, ho nyuqmv tiql mookeq dooma dvb, ho un pai dooma dvb, ho dvrwq dvb la timb dvb nyima boam jidwb nyidwn.

²⁸Nyega tulungv atwg gv vpam hog hwdgo aby sudwn hvbkalam bulug nywxwngam aby bodwb nyidwn. Hiyv nyegangv atwg nywxwngam aby dvn mwv atamkam aby sudwn.

²⁹Hiyvkam atwg gv vpam oiyum suma dvn. Hvbmabde mwv gv vpam dvdwb dvs jidwn hoo hoqham hingkib sodwn; hoqhvb Kristo mwwg dvrwq namlongam kaadwn.

³⁰Hoggab ngulv mwwg gv hoqg nyiib nyidwn.

³¹Dvrwqbo Potangv bedwn, “Soq gab sulak nyi akv atwg ann-abam apaqpel mwwg nywxw akwg lvgab akin gob nyitayin hoo bunyiv vnyi akin gob nyitayin.”

³²Soq Dvrwqbo Pota benam si jvqtwngv ho soq ura si tacin maanam agam go doodo. Sam ngo tacinum, Soq si Kristog la dvrwq namlo pagoqho jubdo.

³³Hvbmabde soq si nulgab jubtaqdo, nyol vxiv atwg nywxwngam atam aby bosnam hvbkalam aby dvb nyidwn, hoo nywxw vxiv atwg nyolam modu dvb nyidwn.