Read Nyishi IPISI 6 Bible Online

IPISI 6 - Nyishi bible

IPISI 6

¹Ko tulu, nulv Kristan swwgam gab nulug atwg ann abam bugil bulug benam mam tal swwnamv nulug nyidynam jaqkv.

²Hoggab, “Nulug annam la abam bugil swwto” hvl benam si gaml jiconam jaqkv, ho soq aob akta birwl apnamv doodwn.

³“Hoqgab hog mwlwngv noqg gab al mvdwb hoo no soq gvda so meeg oyu go swwyul dootayin.”

⁴Ann-ab tulu, nulv ko tulungam hang biluql bulam hang lengdwb bemabv. Hvbmabde bulam albo Kristan nyi kvtaqb nyil swwm dvb bulam hingkib tomswr gvdwl sorabto.

⁵Nyera tulu, nulv nulug gvda gvt soq nyia kog at tulungam hangv mwwk-mwwya maab, hang pwkin gob mwwl bulam tvmdwr hwql bos sol bulug benam mam tal, Kriston nyidwn jaqhvb bugil swwto.

⁶Bulv vnyiq kaai arongam bulam kaatwl alwb nyido mwwl xik dvb nyimab, hvbmabde hangv kwrwb mwwl Kristog nyerab nyil Pwnbov hognvkam nulam nyim dvb mwwdwn ham nyito.

⁷Ngulv nyi tulu aro gab nyera swwma dvn, hvbmabde At Sw gab nyera swwdwn mwwl nulug bonam nyidynam mam hemp alwb mwwg dvl nyito.

⁸Mwwgabto, At Sw nyi vxiam nyet ge nyera ge mwlwngam mwwg albo bon nyijongam jitayin.

⁹At tulu, nulv hoq hvbkalam nulug nyera tulungam nyilam-nyicam hoo bos belam maab hingkib beto. Soq sam mwwgabto, nulv la nulug nyera tulungv, nyi vxiam anyo koi ximab ao gvda tolo doonbo at aking nyiv.

¹⁰Mwlw jaqg kokwb, nulv At Swg lvgab lokub alwb doobal mwwg xitor-xilo ator hoqgv nulv ator torabto.

¹¹Nulv Pwnbog jinam svtam soruq mwlwngam gvto. Nulv uiyig almanbo surub nyil nyob panam ham ceetor naadwb kooto.

¹²Hoggab ngulv soq gvda gvtwg nyia kog lvgab nyob pamin suma dvn hvbmabde doa nvg ao tolo nyic nyia atoram, pvvb bwwl doogbo tulungam, gora abwb nyinbo tulungam hoo kan nyook soqg atoram ceebiob baql nyob podu dvn.

¹³Hoqgab nulv sija Pwnbog svtam soruqngam gvto! Ho kokwngam almanbo moodv haajaqkam nulv hoq nyemaq kam dvqrwql patur nyotayin, hoo kokwngam nyobam pvtwr nagub panam gob nulv hvraqb biimab keg sumab daqtayin.

¹⁴Hoqgab hengabl mwx-mvaql hingx-heaql dooto, jvqtwngam tamaqb hwwpo ho gvtwl, dvrwqngam soruqb kootwl,

¹⁵hoq kokwb swrsomalog Tugu Puiyam luxuqb lvpia ho gvtwl pui berabto.

¹⁶Ho looxiam mwwjwngam svtamb bvvtwl yvgto. Hoq lvgab almanbo uiyig morto omiv abjaqkam ham nulv ceetor naadwb altayin.

¹⁷Hoo ywwt ywwnam mam dumpo ho yoqdwr bopya hwiywb bento, hoo yalwg nulam jinam Pwnbog gumnam lyoqr orioqb bvvto.

¹⁸Soq mwlw sam Pwnboam swgwl, Pwnbog galoqkv svkangam kol nyito. Nyitaq mwlwho Pwnboam swgwl yalwg nyignam mam nyito. Soq pagoq gab hengabl dooto, nywywngam mwwpa maab nyimab; looxiam Pwnbog gab Pwnboam xumto.

¹⁹Nulv ngoqg gabkam Pwnboam xumto. Ngo goorab tayikam Pwnbov ngam mwwg pui hvvtwngam haakam alwb bem dvb jitwl tugu puiyig ura bvrwqngam cengdwb jimto.

²⁰Soq tugu puiywg pagoq gab ngo sija pvtwq uraso doojaqkam swcw nvg gumtw hvvkiv. Hoqgab ngoqg bedynam pagoqkam haakam alwb ngam goodwb jim dvb nulv Pwnboam xumto.

²¹Ngulug tumanam bor Taikikas, At Swg bonam mwwjwl haagab alwb nyinbo, mwv nulam ngoqg hog mwlw puiyam, ngo hog mvdu dvn hog mwlwngam bekin tayin.

²²Ngul mwlwngv alwb doodwn hoqham bekin mvd bvs lak mwam ngo nulug dookub kanam nvmlwq gviyin; ham tatwl nulam hwrcw tapa mvdwb mwwdo.

²³Pwnbo Ab hoo At Sw Jisu Kristo nulam swrsomalongam la abynam mam mwwjwnam lvgab jignvka.

²⁴Pwnbog anyangv ngulug At Sw Jisu Kriston nywywngam topaq majaqb aby bonbo nyi tulu mwlwg lvgab dooba nvka.