Read Nyishi PILIPI 2 Bible Online

PILIPI 2 - Nyishi bible

PILIPI 2

¹Jisu lvgab swwnamv nam ator bvla ho hemp anyangam doogdo. Dvrwqbo yal lvgab no dooba do ho akwn akwn pengko ho anyangv la ho aya mwwpanamv doodo.

²Ho nulam ngo bedwn, nulug aiyin mwwnam, aiyin abiam jimin sunam hoo hvvjw-hara lo mwwnamv akinam hoqgv ngam hemp mvtwb.

³Nulv at gab aro mwwnam si niqtuq dooma ho atam paqsnam hoqgv akukam hvb nyimabv, hvbmabde akwg akwg pengko lo atam anyo gob mwwminsul ho asaqkv nam alyadwn hvb mwwl nyito.

⁴Hoo noqg hang mwwlwq arob nyimabv, no asaqg hang mwwlwq kamrub mwwg dvl nyito.

⁵Nulug hang mwwnam nyinamv Jisu Kristo nyinam hvbkalam nyito:

⁶Mwv looxiam Pwnbo hvb nyil doonum, hvbmabde mwv Pwnboam aiyin sudub nyitws mwwmanum.

⁷Mwv hvb ya nyinum mwv atv mwwsnv mwwg hog mwlw doognam mam jinyub jinum, hoo mwv nyera hvb ya nyiknv nyia ko gob nyil kaakinum.

⁸Mwv atam anyo gob la ho hindy jaqb tabnv, mwv daapo aoho sinam xaqb nyil wnum.

⁹Hoqgab Pwnbov mwam mwlwngam koi yaanbob mvpakun, hoo mwwg eminam mwlwg emin hoqgv koi yaadwb jiknum.

¹⁰Hoqgab Jisu eminam mvnyi-moyul ao lvpwtol doonbo luuxiv, swcw nyodo so doonbo hoo ked ura bol doonbo mwlwngv, mwwg lvpia lwkwho xumdvb nyitayin,

¹¹hoo mwlwngv Jisu Kristo At Swv bo hvl, Pwnbog Abam yuum dvb bepor tayin.

¹²Hoq gabnvl, ngoqg tumanam ajin tulu ngo nulug lvgab dooba yukho hoggub nyiv ngam looxiam tanum, ho sija ngo aado dooleq jaqkam hindib tanam mam ngo vigo xidwn. Bosil tvmdwr gvdwl bon nyig dvl no atam ywwlin kodwb nyilinto,

¹³hoggab Pwnbov nulam nyis tulungam nyim dvb la ho mwwg pagoqkam hindib tamdvb looxiam nulug lvgab bonam nyidu do.

¹⁴Hog mwlwngam nulv haqma jaqb nyito,

¹⁵hoggab nulv yolu doog maanbo la ho Pwnbog denky dvrwqbo kob soq gvda gvtwg kacbo hoo nyicbo nyi tulug pengko lo albo nyiib nyitayin. Nulv doonyi aog pengko lo takar huunam hvbkalam huuto,

¹⁶noqg swwnam hoqgv bulam kaakinto. Nulv hvbnyiloqkam Kristog hvvd Aalam ngo nulam paqdwb pagoqkv dootayin, hoggab ngoqg hog mwlw bon nyinamv nyisam ram hvbmabde hog mwlwngam kaapa tayin.

¹⁷Hvbmabde ngoqg swwgnan uiyam pwr jinam hvb nyijaqkam ho nulug Pwnboam mwwjw jinam gab ngo hemp do hoo ngoqg hempam nulug pengko ho bekin dvn.

¹⁸Hvbkalam nulvkam hemp poto ho nulug hempam ngam kam kaakinto.

¹⁹At Sw Kristo mwwlwq panyiloqkam ngo Timotin nulug dookub kanam nvmlwqtayin hoggab ngokam nulug pui sootangam tapa gvdwl hemp nwnwdo.

²⁰Mwv arotwq ngoqg mwwnam vs-axaqkam svka dvn hoo mwv nul gab vcjaqb mwwj dvn.

²¹Jisu pagoq gab mwwk maab, mwlwngv at at hang mwwlwqko pagoq aro gab mwwnyia twqdo.

²²Hoo nulv atv cengs nyiado mwv hoggub mwwg kvtaqnam mam kaakinl hoggub ngunyiv ab ko nyu hvb mwv la ngo tugu pui pagoq gab bon nyiba sunum.

²³Ngo hoggub nyis yiyv ngo mwam kaapa kvlam nulug dookub kanam tayin.

²⁴Ngo mwwgwdo ngokam nyorib haadub nyiyi nvpv.

²⁵Ngoqg mwwnamv bor Ipapraditasnvn kam nulug dookub kanam nongkur kimpanyi mwwdwn, mwv ngoqg bonam nyibam ajinv, sipai ajin hvb nyidwn hoo nul gab daaxar xarl ngoqg vs-axaqkam svkanum.

²⁶Mwv nul mwlwngam kvvnw jaqpaku hvvdo hoo nulv tapa sudco mwwg vcgab mwv vigo hentwr nyelinum.

²⁷Mwv sisv twqb vcnum. Hvbmabde Pwnbov anya mwwpanv mwam twqma hvbmabde ngoqg gab rub mwwnv hentwr ao hoqgv mwwg swwgam ywwlin kunum.

²⁸Ngo vnwqjaqb mwam nul gab kanam jinwdo hoggab nulv mwam hwdlo kaapa tvl hemp mvdwb ho ngoqg hentwr nyelinam kam niim dukub.

²⁹Mwam At Swg bor hwiywb hemp lvgab svgagvrwqto. Svk nyiam mvnyi-moyul kaakinto,

³⁰hoggab mwv atwg sig-dorgam mwwpaqtvl Kristog pagoq gab bonam nyibnv nulug ngam svka nyomanam mam kam ngam svka kaado.