Read Nyishi PILIPI 3 Bible Online

PILIPI 3 - Nyishi bible

PILIPI 3

¹Bitwr so ngoqg vbw-bor tulu, nulv At Swg lvgab dool hemp pol swwto. Ngo nulam otuqho pota xeqs jaqkam lokta xeqnam akinam xeqjaqkam, soq si nulgab svtam-soruq gob nyidwn.

²Almanbo bonam nyinbo, iky tulungam la mux mvt loodak hvl xaanbo nyi tulu hoqgv hengabl dooto.

³Jvqtw jaqb pepaql-muxnam nyiv ngulv lak, bulv maas lak, ngulv Pwnboam mwwg yal lvgab xumdwn hoo ngulug swwca lo Jisu Kristog lvgab lokub dool ngulv hemp podwn. Ngulv gv soodin aolo hog mvl nyinam mvnam mam mwwjw maadwn.

⁴Hiyv akgon hoq hvb nyinam mam mwwjw baloqkam ngoya lak ham laabo yaab nyidwb mwlwngam doodwn.

⁵Ngam ko bwwxo tvl kvn aal kokw so ngam mux mvnum. Ngo Israel nyobwg Benjaminwg dvpar hoqgv dwr buqnam ko hosiqkv, ho ngoqg gv uiyv jvqtw jaqb Hibru uiyib nyidwn. Juhudi pvvbam bugil swwnam bvrwqngam bebaloqkam ngo Parisi dvpar hoqgv,

⁶hoqgab ngo dvrwq namlongam mvnyi-mviyal hwr alwb nyil yvnum. Pvvbam bugil swwnbo nyi tulug pengko ho nyiidar nyiib dvrwqjaqb nyil swwn bov ngo akgon. Ngoqg hog nyixiaqnam pai ak dooma dvn.

⁷Hvbmabde hog mwlwngam ngoqgab alv ku mwwknamv sija Kristog emin gab hoq mwlw hv hog niqtuq doomabo goknyi.

⁸Hoq mwlw hv hog hvvtw kuma, ngo sija hog hoolu luuxiam xima vrram ngoqg xinamv At Sw Jisu Kriston cengknam emin gab ham ngo mwlwngam al kumanyi hvl bedwn. Mwwg emin gab ngo hog mwlwngam hurpaq pakun. Ngo soq mwlw sam kac gob mwwdkun, ho Kriston kaapanam si ngoqgab niqtuq lengdwn

⁹hoo mwwg lvgab kaqtinl doonamv al paku. Sija ngo pvvbam bugil swwl dvrwq nyiib nyidwb ngo atv hog nyis dookma, hvbmabde Jisu Kriston mwwjwko hoqgv ngam dvrwq nyiib nyim dvb jipa kun.

¹⁰Hog mwlwngam ngoqg cengsv Jisu Kriston, hoo mwwg turkurnam atoram naal mwwg hentwr henam mam hembal mwwg sik ho sibal,

¹¹ngo atvkam sinam hoqgv swwgwb torab dukub mwwgw dvn.

¹²Ngo soq xarka sukso xarya pakun hvl atam paqs ma, ho xarka sul xaryal naasam naapa kun hvl bema, hvbmabde ngo sam naadwb mwwgabnam mam toxa majaqb nyidu dvn, hoggab Jisu Kristo ngam kaapa kunv mwwg pagoq gab nootu pakun.

¹³Hvbsujaqkam vbw-bor tulu, jvqtw jaqb ngo ham atwg ator hoqgv kaapa pakun hvl bema dvn, hvbmabde ngoqg langkwb kookur kumab haabo poqta ho hognvkv doodwn ham kaagabl ngo nyidwn.

¹⁴Hoqgab ngo xigabko jaqb kaagab lalal xars xardal xarl, xaryal ao gvda toloqgv Jisu Kristog emin gab dvgoq goqnam Pwnbog galoqkv swwg aky naasam naadwb ngo nyidwn.

¹⁵Ngul mwlwngv yal lo axa kunbov soq mwwnam akin sam mwwdwb nyidwn. Hvbmabde nulug pengko lo hiyv akgon mwwnam asaqgo mwwd nyiloqkam, Pwnbov mwam ham cengdwb jitayin.

¹⁶Hvb nyisjaqkam ngulv otuq hoqgv hoggub nyil swwca yin hoq hvbkalam ngulv nyinam akinam nyigdvl hvraqb wtuj.

¹⁷Ngoqg vbw-bor tulu, nul mwlwngv ngoqg nyinam sam kaag gvdwl ngoqg kokwb wto. Ngulv nulgab nyikinsv hvvtwngam nyil nulam kaakin pakun. Hoggab sam kaal nyinbo nyi tulungam hindib kaagabto.

¹⁸Otuqho ngo nulam soq bvrwq sam vigo betin betin betkun, ho sija ngo sam nulam xabnv nyiqsv vigo dijoywl betin dvn; nyiv daapo tolo sinbo Jisu Kristog ceebiob baql nyemaq swwn bov vigo doodo.

¹⁹Bulv ui nyook bolo twrtayin, hoggab bulug pwnbov bulug gv soodin gab mwwbynamv; bulv hvnyw-harnam mam xitor yaagub mwwdwn hoo bulv gvda gvt soqg bvrwqngam mwwtwq dvn.

²⁰Hvbmabde ngulv ao gvdag nyiv, hoo ao gvda toloqgv ngulam At Sw Jisu Kristo ipoql ngulam booca deenam mam ngulv hemp alwb kaayal doodwn.

²¹Hog mwlwngam mwwg lvpia niikumho apbo Akv, ngulug ator maanbo gv soodinam kedib nyidybo sam mwwg atorv oksub mvtwl mwwg yuunam gv tvvbkalam nyidwb mvtayin.