Read Nyishi PILIPI 4 Bible Online

PILIPI 4 - Nyishi bible

PILIPI 4

¹Hoqgab ngoqg vbw-bor tulu, ngoqg nywywngam tula maanam, ngoqg looxiam kvvnwnam tulu, nulv ngam hog hwdgo hemp podwb jinum; nulv ngoqg gumnv. Ngo nulam hentwl hog hwdgo xitor alwb mwwdwn. Hoq hvb nyigdvl ngoqg tumanam vbw-bor tulu, nulv biimab At Swg alaq tolo dooto.

²Iuodiya la Sintike, nunyiam ngo mvnyi-moiyul bedwn, akwn akwn At Swg emin gab hang pwkin gob nyil swwbam tvk hvl bedwn.

³Ngoqg lvgab mwwjwl bonam nyibambo, namkam ngo bedwn, no kam soq nyem vnyi sam svka to. Hoggab Pwnbog swwg potalo emin xeqpwl ap kunam Klement la nyi asaq nyi tulug pengko lo Tugu Puiyam nyi tulungam tapa mvdwb bon nyiklo ngoqg lvgab soq nyem vnyi si kam ator alwb nyibanum.

⁴Nulv At Swg tolo looxiam hemp poto. Ngo nulam lokta bedwn, nulv hemp poto!

⁵Mwlwngam nulug hang nyumnyum mwwnam mam kaakin to. Hoggab At Sw vnwqb haata duku.

⁶Nulv hog gokam mwwdwq maab, hvbmabde nulug swgwnam mwlwho nulv hognvkv pwwma dvn ham bekin gvdwl Pwnboam koto. Mwam koi kam looxiam paqyalinco hvl hangv hemp alwb mwwl paqto.

⁷Nyia kog mwwc lamanam mam Pwnbog mwwcin nanv nulug hangam la mwwnanam Jisu Kristog swrsomalongv nulam rvkil daqg tayin.

⁸Bitwr benya so, ngoqg vbw-bor tulu, nulug hangam hognvkv jvqtw dvn, hognvkv poqkum dvb nyidwn, hognvkv kvtaqdvn, hognvkv dvrwqdvn, hognvkv anya dvn, hoo hognvkv xikum dvb nyidwn hoq mwlw gab mwwnto.

⁹Hognvkv ngoqg galoqkv kaag-tag pan hoo cengpan ham nyito, hoo ngulam swrsomalongam jinbo Pwnbov nulug lvgab dooba tayin.

¹⁰Hwd oyug go dootar peekul sija nulv lokta ngoqg swwg alko gab mwwdwq dwqgam gab ngo At Swn hemp al mwwpal paqdwn. Ngo soq sam benam si ngo nulam ngoqgab mwwdwq kumab mwwpa maab nyipan hvl bema, hvbmabde nulv ham nyimo dvb nyimanum.

¹¹Ngoqg pwwma cima ko-gab ngo nulam bema, hvbmabde pww ge pwwma ge hog mwlwho ngo atam mwwcum sul xumt dvb cengdkun.

¹²Pwwma cimanamv hognvkv hoo naleq-baleqnamv hognvkv ham ngo cengdwn. Hoggab hog luuxiam, mood gotwq bolo, kepongv bwjaqkam, bwma jaqkam, kano jaqkam, hvngwr jaqkam, naleqb doojaqkam, anyo go doojaqkam, koi ge anyo ge ngoqg hangv xumt dvb ham ngo cengnum.

¹³Ngam Jisu Kristo ator jigam gab ngo soq mwlw hentwr sam hendwb ngoqg atorv doodwn.

¹⁴Nulv ngoqg nyelin-dorsib nyidwkho ngam svka jinum.

¹⁵Pilipi nyi tulu, nulv atv cengl doodo, ngo Tugu Puiyam beka beral berab duk apoho Mesidoniyangam apaqpel wleq dwkho nulug dvrwq namlo arongv ngam svka kaabnv nulv arotwq ngoqg al koram hembanum.

¹⁶Nulv lok lwnyi go ngo Tissolonika ho doodwkho svka bo doomab hog looma twqb nyidu dukho nulv ngam ngoqg pwwmanam mam pwwdwb jilwqnum.

¹⁷Ngo nul galoqkv akiam nvvtwq dvb mwwma dvn, hvbmab nulug nyijongam vijaqg kaapa mvdwb mwwdwn.

¹⁸Hoqgab, soq si ngoqg nul galoqkv naanam nulug jinam hoqg mwlwngam xipwl apnamv. Nulug ngam jinam aky torab pv ngoqgab naleq baleq gob nyinum. Sija ngoqg pwwmanam mwlwngam nulug aky jilwqnam mam Ipaproditas bvqc jipa ku, si alv ku. Soq torab si Pwnboam aky jinam sungam albo Pwnboam guun nanv mwwg naadynam mwwg hang tolo xumn bo hvb nyipa.

¹⁹Hoqgab ngoqg Pwnbov mwwg nyetam Jisu Kriston hentaql nulug hog mwlw pwwmanam mam mwv xitor alwb nyil mwwg eminam yuum dvb nulam jitayin.

²⁰Ngulug Pwnbo la Ab gab yuunamv nwrba cvtam hoqgv nwrba gob doonka! Amen.

²¹Jisu Kriston mwwjwbo Pwnbog nyi tulu mwlwngam salam jito. Ngoqg lvgab doonbo vbw-bor tulungv mwlwngam bulv salam jilwqdo.

²²So doonbo Pwnbog nyi tulu mwlwngv salam jido, ho lvpw at tulug Bir abwg namlo lo doonbo nyi tulungv nulam vcjaqb salam hvvtwngam jilwqdo.

²³At Sw Jisu Kristog anyangv nul mwlwg lvgab dooba nvka.