Read Nyishi KOLOSI 1 Bible Online

KOLOSI 1 - Nyishi bible

KOLOSI 1

¹Pwnbog mwwlwqkob xuqnam Jisu Kristog pui baqnbo Poulwg hoqgv la ngulug bor Timoti galoqkv—

²Kriston mwwjwl Kolosiho doonbo ngulug dvrwqbo Pwnbog vbw-bor tulu gab. Ngulug Ab Pwnbov nulam anyangam la swrsomalongam jignvka.

³Ngulv nulgab xumd moodam, ngulug At Sw Jisu Kristog Ab Pwnboam looxiam paqdwn.

⁴Hoggab nulug Jisu Kriston mwwjwnam pagoqkam hoo Pwnbog nyi tulungam nulug aby bonam mam ngulv tapa do.

⁵Jvqtw puiyv nulug dookub otuqb haadwk ho, hoq tugu puiyv nulug hingwnanam bekinam mam nulv tapanum. Hoqgab nulug mwwjwnamv la abynamv nulv hognvkam hingw dvn hoq aoho dvqgw dvn, ho soq sam nulgab ao gvda tv cumciq jaqb ap jipan.

⁶Hogloq hv nulgab haapa kun, jvqtw jaqb gvda gvt uraso hoqhv aaxy xeedul hoo swwdul doodo—hogloq hv nulug pengko lo nyidu dvn, hwdlo aalho hoqham tapa kunum hoo Pwnbog anyangam jvqtw ho cengknum.

⁷Nulv soq sam ngulug tumanam ngulug bon nyibam Epapras galoqkv tapanum. Mwv nulug nyidub Kriston mwwjwl bon nyinbov.

⁸Mwv ngulam yalv nulam abynam bvrwqngam bekinnum.

⁹Hoqgab ngulv nulug puiyam tapa dvk aal hoqgv nulgab looxiam xumdu dvn. Ngulv Pwnboam xuml kodu dvn, Pwnbov mwwg hang mwwnam mam nulam cengm dvb hog mwlwngam mwwlaqnanam hoo mwwcin nanam Yalam tacin nanam jitwk hvl xumdwn.

¹⁰Homolo nulv At Swg hang mwwlwqkob swwla tayin hoo nulv looxiam mwv hognvkam hang xumdwn ham nyilaqtayin. Ho nulug swwnam mwlwngv albo bonam nyinamv niqtuq dootayin hoo Pwnbog gonam cengl swwtayin.

¹¹Hog mwlwngam haakam alwb cwql swwm dvb mwv nulam mwwg xitor-xilo yuunam atoram jitwl nulam ator aldvb mvgnvka.

¹²Pwnbov mwwg nyi tulungam jidwb huto ko lvpw haty lo pvvbwql apnam gumnam kaapa dvb nulam jinbo Abam hemp alwb nulv paqto.

¹³Hoggab mwv ngulam kanbo ator hoqgv naalin kunv cumciqb booknv mwwg tumanam Ko Tuupwg lvpw hatib boa pakun,

¹⁴ho mwwg alaqngv ngulam naalin pakun hoo ngulug nyic mwlwngam axia jipa kun.

¹⁵Kristo kaapa maanam Pwnbog nyuqtuq moorv. Mwwg pwnam mwlwg pengko hoqgv mwlwngam koi yaanbo dwr buqconam Ko Tuup vbwngv.

¹⁶Hoggab mwwg galoqkv swcw-nyodo soq doonbo hog mwlwngam pwnum, kaapa ge kaapa maanam ge, hoqg uraso yalwg atoram kam, gora ab tulungam kam, lvpw pwl doogbo tulungam kam, bir ab tulungam kam hoo xitor-xilo bo tulungam kam Pwnbov mwwg galoqkv pwmnum, hoo mwwg gab doodwn.

¹⁷Mwv hog mwlwngam lengma daab otuq hoqgv doodwn; ho mwwg alaqb hog mwlwngv doodwn hoo mwwg alaq uralo doog gam gab hog mwlwngv bulug doodyko dootaq lo doodwn.

¹⁸Mwv dvrwq namlo hoqg atv hoo mwv gv vpwg swwgv; ho hog mwlwg pagoqho otuqjaqb mwv doodwb hvbnv mwv sikbo tulug pengko hoqgv otuqjaqb turdwb purab kunam Ko Tuup vbwngv.

¹⁹Hoggab soq si Pwnbov atv mwwlwq sul mvknam Ko Tuupwg nyinam-mvnam hog mwlwngv Pwnbog nyinam-wnam kalam hvb nyim dvb jinum.

²⁰Hoggab Pwnbov Ko Tuup galoqkv gvda gvt mwlwngam mwwg dookub bookur dukub mwr kunum. Pwnbov swrsomalongam mwwg Ko Tuupwg daapo ao tol sik hoqgv, ho hog mwlwngam gvda gvt soqgv ao gvda toloqgv mwwg dookub boa kunum.

²¹Mood golo nulv Pwnbog galoqkv aado ho doonum hoo nulv atv almanbo bonam nyigam gab la mwwgam gab, alwb mwwma ko-gab nulv atam Pwnbog ceebiob mvsnum.

²²Hvbmabde sija Pwnbog Ko Tuupv nyia kog soodinb nyil sigam gab Pwnbov nulam mwwg ajin swwm dukub mvpa kun, dvrwq dvb, kac dooma dvb hoo yolu dooma dvb, nulam mwwg dookub boa pakun.

²³Hvbmabde nulug mwwjwl hwngkw alwb hindy lalal rwwda diilwqnam hvb nulug mwwjwngam apdvb nyiky tayin. Hoo nulv Tugu Puiyam tapa dvk aalho nulv hingw sanam gaml ak tapanam mam biim maab nulv atv hengabl ap suto. Soq tugu pui gab sulak, Poul ngo nyera swwdkun; ho soq tugu pui sam gvda gvt so doonbo nyi vxig dookho vxiam bekin pakun.

²⁴Sija ngo nulug pagoq gab hentwr kaanyi henam sam mwwngam alwb mwwdwn. Kristog hentwr kaanyi hengongam mwwg hend sanam mam ngoqg gv soodinv hentwr kaanyam hendwn hoo soq mwlw nyigdvn si dvrwq namlo gab.

²⁵Hoo Pwnbov ngam dvrwq namlo gab nyera swwm dvb mvpa kun, hoo nulug alko gab ngam soq bon sam nyim dvb mwv jipa kun. Soq nyis siiloqkam mwwg puiyam dardar aljaqb bekar dvb,

²⁶nyia kog mwlwg kaaga hoqgv kvsil ap kunam hvbmabde sija mwv soq sam mwwg nyi tulungam kaakin pakun.

²⁷Hoqgab soq si Pwnbog mwwgwl mwwgab ap kunam mwwg nyi tulungam, mwwg kvsil apnam ura gonam bekin dvb mwwnam gumnam hoo xitor albo ura gonam nyi mwlw gab mwv doogdvn. Hoq ura gon si hvbaloqkam, Kristo nulug urahv doodwn, hoo nulv Pwnbog xitor albo gumnam naaba tayin.

²⁸Hoqgab ngulv Kristog puiyam nyi mwlwngam bekin dvn. Ngulv nyi vxiam ngulug nyegam cengnam mwlwngam tomswr swrl yvtw padwn, hoo nyi vxiam Pwnbog agaho Kristog lvgab nyi akam gob nyil swwm dvb nyidwn.

²⁹Soq nyis tulungam nyidwb ngo moommab Kristog ator jinam ngoqg uraso doonbo lvgab ngo nyin dvn.