Read Nyishi KOLOSI 2 Bible Online

KOLOSI 2 - Nyishi bible

KOLOSI 2

¹Ngo hoggub nyil nulgab la Laodikia alo doonbo nyi tulu gab hoo ngam pwbwb cengmabo nyi tulu gab moommab bon nyinum mam ngo nulam bekin tvs.

²Ngo soq sib nyigdvn si bulug hangam haakam al mwwpa mvdwb hoo jvqtw jaqb bulam lvkin gob abynam uraho boa dvb hoo jvqtw jaqb mwwcin maanboam nyet swwm dvb ho Kristog tolo Pwnbog ura gonam bulv cengtayin.

³Kristo hog mwlw Pwnbog pumb rwlwqnam mam la cenglaq uddum mam doogbo atv.

⁴Hoqgab ngo nulam bedwn, bulv hog hwdgo tangam dvb goos jaqkam, nulv hiyv nvkam xaalyo bo agam gool vm mvvk maabv.

⁵Hoqgab ngo gv vpv nulug lvgab dooma jaqkam ngoqg yalv nulug lvgab dooba dvn. Ngo nulug lvkin gob nyil Kriston biimab mwwjwnam mam hwngkw kaapa tvl, ngo hemp aldo.

⁶Hoqgab nulv Jisu Kriston At Swv hvl mwwjwl gaqnam hvbkalam nulv mwwg lvgab doobal swwto.

⁷Mwwg uraho noqg rwbam ura jaqb guugab to, hoo mwwg aoho svqgwl swwto, hoo noqg mwwjwngv ator yaiya tayin, nulam tomswrnam hvbkalam swwrab to. Hoo paqyalinco hvnamv nulug hanglo lwxiam bwwr tvl swwto.

⁸Hoqgab soq sam nulv hengab to; nulam hiyv nvkam nyia koam pumb rwlwq biyuq-bemaql nyera book maabv. Hoggab hoqhv nyi tulug swwtam hoqgv gon bwsiq-bwsiql bvl ignam nyicwngv, hoo soq sam swcw-nyodo sam bvvl doogbo ak yalwg ao hoqgv; hvbmabde hoqhv Kristog galoqkv haama dvn.

⁹Kristo Pwnbog kvvyw kaacv ho nyiip loodangv.

¹⁰Nulam hog mwlw swwgam mwwg lvgab jitaq pakun. Mwv hog mwlw yalwg swwgam la atoram doog gvdwn.

¹¹Nulam mwwg lvgab pepaql-mux kunum, ho soq pepaql-muxnam si nyia kog mvnam hvvma, hvbmabde Kristo mwv atv pepaql-mux mvkho mvtaq pan hoo soq pepaql-muxnam si ngulam nyic nyinam gv soodin hoqgv naalin dvn.

¹²Hoggab nulam baptijum jidwk ho nulam Kristog lvgab lwqtaq kunum, hoo hoq baptijum akinho Kriston sik boam purabnam hvbkalam Pwnbov nulam mwwg nywywngam sima bo atorv nulug mwwjwnam galoqkv purab pakun.

¹³Lok mood golo nulv atwg nyic nyik gab nulug yalv siknum, hoggab nulv Nyoodo nyiib nyinum, hoo pvvb uraho doomanum. Hvbmabde sija Pwnbov nulam Kristog swwk ho swwba mvdwb swwgam jipa kun. Pwnbov ngulug nyic mwlwngam ngulam apaq jipa kun.

¹⁴Mwv ngulug aoso doonbo almanbo yolungam mvpaq gvnkun, ho hoqham kaaga hoqgv naaxa kunum hoo ham daapo aotv silo puqnywngv taqtin tukul twrg nukun.

¹⁵Hoo hoq daapo aoho Kristo mwv atam, swcw-nyodongam bvvnbo alaq hoqgv atoram naareq kunv atam naalin suknum hoo hoq tulungam nyi tulug kaagaho mwlwngv kamin dvb mviya tukul bulam nyumwb mvl hvnyw-har dvb mvknum.

¹⁶Hoqgab nulv hognvkv dvdwn, twwdwn, pool karlinam durum dvnam hvbkalam doonu ko aalwg bvrwqgab nulv hiyv nvkam yolu mvdwb jimab.

¹⁷Hoq mwlw si yal bobo hvb kokwngam haadynam bvrwqngv, hvbmabde Kristo lak gv vp jaqkv.

¹⁸Ao gumtwngam xuml hang yanbo nyiib nyil bulv nyiqry kamanam go kaagam gab koi gob mwwnbo nyi tulungam hiyv nvkam bepaq-beyaq komabv. Hoq hvk nyiv hog niqtuq doomab saqnam gotwq bolo saql mwwtaqb benbo nyiv; mwv nyia kog mwwcib mwwl nyidwn.

¹⁹Hoq nyi akv Kristo gv vpv hvl mwwpa kumab apaq kuma bov. Kristog alaqho gv dorpwngv dvsam naadwn hoo alongv la ayaqngv xwqsiq xwqmeq tvl doodwn hoo Pwnbov swwrab mvdwb mwwkwb gv si swwrab dvn.

²⁰Nulv Kristog lvgab sipa kun hoo nulam soq swcw-nyodo sam bvvnbo yalwg alaq hoqgv naalin pakun. Hvnyiloqkam nulv gvda gvt so doos tvl hog nyitwl

²¹“Sam bvvmab,” “Sam dvka twwka maabv,” “Asaqkam idaq maabv,” hvl benam gaml tulu sam tal swwdwn”?

²²Soq hoolu mwlw si bulam lok mvn kunam hoqgv mvn kumanum; soq mwlw si nyia ko tulug mvnam pvvbv hoo tomswrnamv.

²³Soq tulu si jvqtw jaqb albo pumb rwnam hvb vnyiq kaaga lo nyidwn; hoo bulv gv vpam nyelin dorswb vm yaab mvdwn. Hvbmabde hoq tulungv gv vpv nyinw-wnwnam mam bulv munyiub nyoma dvn.