Read Nyishi KOLOSI 3 Bible Online

KOLOSI 3 - Nyishi bible

KOLOSI 3

¹Nulam Kristog lvgab swwm dvb swwgwb turab mvpa kun, hoqgab ao lvpwg pagoq tulungam meegaqto, Pwnbog lvqbwq alaq tolo doonbo Kristo hogloq ho doodwn.

²No gvda gvt soq pogaqkam mwwmabv, hvbmabde ao gvda toloqg pagoqkam mwwto.

³Hoggab nulv sipa kun, hoo nulug swwgv Kristog lvgab Pwnbog uraho doodwn.

⁴Jvqtw jaqb nulug swwgv Kristog lvgab doodwn, ho mwam kaapa yukam nulam kam mwwg lvgab kaapa taikun hoo nulv mwwg yuunam gumnam kaapa tayin.

⁵Hoqgab nulv gvda gvtwg uraso nulug hangv mwwngam nyinwnam ham, yocu-yabio nyinam ham, dvrwq maanboam, almanboam, nyis-nyipeql nyinam ham, kaabynam ham, ui panam mam hoo roogumnam ham mengxato (Hoggab roogumnamv murty xumnam hvb nyidwn).

⁶Hoqgab hoqhvb nyinamv Pwnbog hang lengnamv mwam bugil swwma bo nyi tulug aoho haatayin.

⁷Nulv atv mood golo lok hoqhvk nyi tulug pengko ho dootwl hoq hvb mwwnamv nulam bulug alaqho doonum.

⁸Hvbmabde nulv sija, hang lengnam, haaxaqnam, hang baqnam, tob-tainam hoo bec-beyab benam agam, mwws-saqpeqnam mwlwngam apaq dukub nyiky paku, hoo almanbo, kac-kanyiaqbo agam goonam hoq tulu ham nulug agam hoqgv nywywngam lengm mvmabv.

⁹Akwn akwn xaalyo minsmabv, hoggab kolwg kucuqbo akam vjam pisuql pixianam hvb hog mwlwngam apaq tukul sija nitbo akam kaapa paku.

¹⁰Soq nit nyi ak sam Pwnbo akv mwam kvvyw tac dvb looxiam mvdar dordu dvn hoo nulam mwwg nyijwq-nyegam gonam mwwg pagoqkam pw-hwwdwb cengm dvb nyidwn.

¹¹Hoq niqtuqngv sija hog nyob asaqgo akukam Nyoodo nyiv la Juhudi nyobv hvl nwd oksub xidwb nyima dukun; pepaql-mux mvnam gola pepaql-mux mvmanam dook ma, cengnbo gola cengmabo, damn gola damabo hoo nyet gola nyera go asaq bes dook maadwn; hvbmabde Kristo hog mwlwngv, Kristo hog mwlw lo doodwn.

¹²Nulv lak Pwnbog nyi tulungv, mwv nulam aby bonum hoo mwwg pagoq gab mwwg nyiib swwm dvb nulam xuqpa kun. Hoqgab nulv hang biinam, tumanam, ayanam, hang yanam hoo cwqnam mam svtam-soruqb kooto.

¹³Akwn akwn cwqmin sul swwto hoo hwdlo jaqkam ceekol sormin sunamv dooi nyiloqkam akwn-akwn paqnyi minsto. At Swg nulam paqnyi jinam hvb nulv hoggub nyijaqkam akwn-akwn paqnyi mins dvb nyidwn.

¹⁴Hoq kokwb soq mwlwg lvgab abynam mam vbw ata lwqto, hoggab abynamv hoolu mwlwngam lvkin gob nyil hang pwkin gob mwwl swwdwb ator jidwn.

¹⁵Kristog nulam swrsomalongam jinam, nulug hangam mwwdil pvvbam niqtuq lengm dvb jidwn, hoggab soq swrsomalo gab Pwnbov nulam gv vp pwkin gob nyil swwm dvb goqpan. Hoqgab nulv sija paqyalinco hvto.

¹⁶Kristog tugu puiyv nulug hang uraho xinam poot jaq gob nyil doodwb nyiky dvn. Akwn akwn biywr gvdvl tomswr minsul hog mwlw mwwcinam gonam bekin minsto; bejam hoo dvrwqbo bemin bel hoq lvgab Pwnboam nulug hang uraho paqto.

¹⁷Nulug nyitaq betaq mwlwho At Sw Jisug emin gab nyito, hoggab nulv mwwg emin galoqkv Pwnbo Abam paqdwb nyidwn.

¹⁸Nywxw tulu, nulv nulug nyol tulungam bugil swwto, hoggab nulv Kristan nyiib nyigam gab hoqhvb nyidwb nyidwn.

¹⁹Nyol tulu, nulv nulug nywxw tulungam aby boto, hvbmabde bulam biru-berol bemabv.

²⁰Ko tulu, nulv nulug ann abam hog mwlwho tvjwl swwto, hoggab hoqhvb nyinam hv At Swn hang xumdwb jidwn.

²¹Ann ab tulu, nulv nulug ko tulungam hang belin nyupuq lyol biluq maabv, hvb bebnyiloqkam bulug hangv almab nyitayin.

²²Nyera tulu, nulv nulug at tulungam nyitaq mwlwho bugil swwto, hvbmabde nyiv kaai hvdam nyiig kaaga-tagab bon nyinbo hvb nyimab, hangv mwwjw gvdwl At Swn bosil nyito, nyiam mwwl nyimab.

²³Nulv hog mwlw nyitaqho nulug hvvjw hara ura hoqgv At Sw gab nyid nvbo mwwl hoo ham nyi gab nyima dvnbo mwwl nyito.

²⁴Sam mwwgab laka, nulgab At Sw nulug nyijongam jidwb mwwg nyi tulungam jidynamv doodwn. Hoggab Kristo jvqtw jaqb nulug bon nyij deenam At Sw akv.

²⁵Nyimur nyinbo akam mwwg nyimur nyijongam jidwb mwam nyitayin, hoggab Pwnbov nyi vxiam aiyinb swgw xidy bov.