Read Nyishi KOLOSI 4 Bible Online

KOLOSI 4 - Nyishi bible

KOLOSI 4

¹At tulu, nulvkam nulug nyerangam ayab kvtaqb kaal soto, hoggab nulv rub sam mwwgab tvka, nulug at ak ao gvda tv doodwn ham cengl nyito.

²Pwnboam tuma jaqb swgwl dooto, hoqham nulv hvvmin gvdwl paqyalinco hvnam lvgab xumto.

³Pwnbov ngulam mwwg puiyam bekin mvdwb mood alboam ngulam kaapal Kristog nywywngam mwwc lamanam ura puiyam bekar mvdwb nulv ngulug gabkam Pwnboam xumtbv. Soq pagoq gab sulak ngo sija pvtwq ura si doodwn.

⁴Hoqgab ngoqg bedynam puiyam dardar alwb ngam bekin mvdwb ngoqgab xumto.

⁵Mwwjw maanbo nyi tulug agaho hengab nyil hingkub sul swwto ho mood alboam tuugab gvdwl albo bonam nyito.

⁶Nulug agam goonamv looxiam tangam dvb la taby dvb gooto hoo nulv nyi vxiam hognvkam birwqtayin ham kvtaqb cengdwb nyido.

⁷Ngulug tumanam bor, ngulug lvgab At Swg bonam mwwjw alwl nyibambo Taikikas, mwv ngoqg pagoq puiyam hindy alwb nulam bekin yin pv.

⁸Hoqgab ngo mwam nulug dookub kanam nvmlwq gviyin, ho mwv ngul mwlwg puiyam nulam bekinl nulug hangam hemp mvdwb jitayin.

⁹Ho mwwg lvgab nulug dvpar hoqg nyiib nyinbo tula maanam mwwjw albo bor Onisimasnvn kam kanam namtaq gviyin, bulv soq so hognvkv xeq nyidu dvn hog mwlwngam nulam bekin tayin.

¹⁰Aristarkas, ngoqg lvgab pvtwq uraso doonbo, mwv rub nulam salam jilwqdo, hoq lvgab Barnabaswg bor Mark kam salam jilwqdo. Mwwg pagoqkam nulam bekin tukun, hoqgab mwv nulug dookub haab nyiloqkam mwam nulv alwb kvvrwq-tataqto.

¹¹Josua, hiyvn Jastas hvl benam akv kam nulam salam jilwqdo. Soq pepaql-muxnam Juhudi nyi oum aro si ngoqg lvgab Pwnbog lvpw haty gab bonam nyiba dvn. Bulv ngoqg hingw alnam svka koi albo gob nyido.

¹²Epapras, nulug pengko lo akgon, mwv kam nulam salam jilwqdo, mwv Jisu Kristog nyera akgon. Mwv looxiam nulgab xeqxeq jaqb Pwnboam swgw dvn, hoo Pwnbog nulam haakamb cengl ator jaqb biimab daqm dvb ho Pwnboam bugil mwwg mwwlwqkob swwm dvb xuml kodwn.

¹³Ngo atv mwwg haagab ator alwb nulgab la Laodikia hoo Hirapolis nyi tulu gab bonam nyinam mam betam jidwn.

¹⁴Ngulug tumanam Doktor Luk kam hoo Demas nulam bulug salam jilwqdo.

¹⁵Laodikia ho doonbo vbw-bor tulungam la Nipaho mwwg namho dookum bo dvrwq namlongam ngulug salam mam jito.

¹⁶Nulv soq pota sam pooril kaaxo kokwngam jvqtw jaqb Laodikia alo doonbo dvrwq namlo ho poory mvdwb jito. Hoq poory rinam akinam nulv Laodikia hoqgv jilwqnam potangam kam poory dvb nyitayin.

¹⁷Hoo Arkipaswn beto, “At Sw nam hognvk bonam nyim dvb jipan ham no niqtuq nyilinto.”

¹⁸Poul ngo, atwg alaqngv soq pota sam xeqg yin. Poul galoqkv salam. Ngoqg pvtwq doonam sam mwwpa maab nyima beka! Pwnbog swrsomalongv nulug lvgab dooba nvka.