Read Nyishi 1 TISSOLONIKA 2 Bible Online

1 TISSOLONIKA 2 - Nyishi bible

1 TISSOLONIKA 2

¹Ngulug vbw-bor tulu, ngulv nulam kaatab wnamv hog niqtuq doomab nyimanum ham atv cengdo.

²Ngulv nulug dookub Tissolonikab haama daab ngulam Pilipi gvdaho hoggub nyil almab ngulam mvnum hvnyw-haram nyipanum ham nulv cengdo. Nyemaq ui hang baqnbov vigo doos bakam ngulug Pwnbov haakam alwb nulug agaho mwwg galoqkv haanbo Tugu Puiyam bem dvb atoram jinum.

³Ngulug nulam xuml begdvn si bexiaql bema, ho hangv mwwrul bema, ho nulam hiyv akgon vm xaalyol bema.

⁴Hvbmabde ngulug agam googdvn si Pwnbov ngulam bedwb jinam mam bitwl bitwqdvn, hoggab mwv ngulam miid miidil meeka tvl ngulam kvtaq pa hvl mwwg Tugu Puiyam ngulam gvqlwq jipa kun. Ngulv nyia koam hang xumdwb nyidwb hvl mwwma dvn, hvbmabde hiyv ngulug hangam hubdil kaaka dvn hoq Pwnboam mwam ngulug hangv xumdwb nyidwb doodwn.

⁵Hoggab ngulv nywywngam nulug ogumho biyuq-bemaq gob bemanum, ho ngulug roogumnam mam mvvsil ap maanum ham Pwnbov ngulug hvvky gob doodo.

⁶Ngulv hiyv galoqkv kam paqk nwma, nulug galoq kvkam ma ho hiyvg nyi asaq ak galoq kvkam ma, ho mwwby kama.

⁷Hvbmabde ngulv nulug pengko lo hingkib swwnum, ho annv atwg ko hoiyinam hoggub anyab kvvyw-tadal sonam hvb.

⁸Nul gab ngulug abynamv vigo nulug aoho doognum gab ngulv Pwnbog Tugu Pui arongam baqa twqma, hvbmabde ngulug swwgam kam nulgab ludum jipaq dvb mwwnum. Nulv ngulug kaagaho tula maanam gob nyinum.

⁹Ngulug vbw-bor tulu, nulug hang uraho mwwgabnamv dood nvpv, ngulv hoggub nyil haagab alwb aal-aiyib bonam nyil nulam hiyv nvkam ngul gab mwwdwq moma dvb Pwnbog galoqkv haanbo Tugu Puiyam nulam bekinnum.

¹⁰Mwwjwbo nyi tulu, nulug agaho ngulv jvqtw jaqb dvrwqb hog nyimur-wmur maab nyinum, ham kaanbov nulv doodo.

¹¹Nulv cengdo ngulv nulam vxiam abv mwwg koam hoggub sodwn hvbkalam nulam nyinum.

¹²Ngulv nulam biywr-bebianum, bet-belanum hoo ngulv Pwnbog kaagaho mwam hang xumdwb nulam mwwg lvpwlo yuunam gumnam naaba mvdwb dvgoq goqnbo Pwnbog hangam cengdvl swwtwk hvl ngulv nulam xuml bekinnum.

¹³Ngulv Pwnboam looxiam hoggab paqyalinco hvl paqdwn hoq paqk pagoq goqsaq ak doodwn. Ngulv nulug dookub Pwnbog puiyam baqal haadwk ho nulv hoqg puiyam tatwl mwwjwl svgagvrwq dvkho nyia kog agam pui gob tvjw maanum, hvbmabde Pwnbog puiyv hvl tvjwnum, soq si jvqtwngv. Hoq agam mam mwwjw bov nulug uraho wnbov bonam nyidul doodwn.

¹⁴Ngulug vbw-bor tulu, Judiya gvdaho hoggub Pwnbog dvrwq namlo lo Jisu Kristog nyi tulungv hoggub nyil hentwram henum hvbkalam nyipa ku. Nulvkam hoq mvnyi-mviyanam luukinam nulug atwg gvda nyi tulug Juhudi alaq hoqgv hentwram henam hvbkalam nulv atwg nyi tulug alaq hoqgv hentwram hang xumdwb nyima, hvbmab nyi mwlwg ceebiob nyibnv hang bvqsil doodo,

¹⁵hiyv At Sw Jisunvn la nyiqry benbo tulungam meng nukun, hoo ngulam kam nyob panum. Bulv hog hwdgo Pwnbog hinglwq maadwb nyido! Hog hwdgo bulv nyi vxiam ceebio baqdo!

¹⁶Bulv Nyoodo nyi tulungam bulug ywwt ywwnam puiyam kam ngulam bema bvk hvl biturnum. Soq sib nyil bulv looxiam nyiam nyil nyic naleqb nyidwn. Hoggab Pwnbog hang lengnamv bulug aoho lok haatayin!

¹⁷Ngulug vbw-bor tulu, ngulv nul galoqkv apo gob gv apongv aado minsjaqkam, ngulug hangv aado maadwn. Ngulv nulam kaapa maagam gab ngulv vigo nulam lokta kaapa nwwbnv svnganum.

¹⁸Ngulv nulug dookub wkur dukub mwwnum. Poul ngo atvkam wkur dukub lok-lwnyi go nyikanum, hvbmabde Uiyv ngulam ham nyim dvb jimanum.

¹⁹Hvbsujaqkam, betar-wtar tvl, nulv ngulug hingwnamv, ngulug hemp pogwngv, ngulug paqsul pvqgwngv, ngulug hempnamv; ngulug At Sw Jisu haai kukam mwwg agaho ngulug lvrgwngv.

²⁰Jvqtw jaqb nulv ngulug yuugwngv hoo hemp pogwngv.