Read Nyishi 1 TISSOLONIKA 3 Bible Online

1 TISSOLONIKA 3 - Nyishi bible

1 TISSOLONIKA 3

¹Hoqgab ngulv hoq hentwram cwqla kuma gab ngulv Eten nampamho vpwb doonamv al hindo mwwnum.

²Hoggab nulam bet-bela mvdwb Kristog Tugu Puiyam ngulug lvgab bekarl yvbam bo Timotinvn nulug dookub nulug mwwjwngam biim mvma dvb biywr-bebia mvdwb kanamnum.

³Noqg nyelin dors hentwr henam gab hiyvkam duleql geqdwb nyiram, hoggab ngulv soq sam hendwb nyiky dukun, ngulam dwr buqtaqnamv ham nulv atv cengl doodo.

⁴Hoggab nulug lvgab lokub ngulv doodwkho ngulv nulam bekinnum, soq hentwr nyelin sam ngulv hengky dvb nyitayin hvl nulam bekinnum, ham nulam begonam mam cengl doodo.

⁵Hoqgab ngo kam cwqla kumab pooka-yirka bo uiyv lokam nulam pooka-yirkal ngulug bon nyinam mam niqtuq lengm mvma twqto mwwnv nulug mwwjwngam cengdwb Timotinvn kanam nvmlwq tukun.

⁶Hvbmabde sija Timoti nulug dookub wpekul ngulug dookub hookurl nulug mwwjwnam hoo abynam pagoqkam ngulug mwwk jaqb puiyam baqa paku, nulv ngulug alko gab mwwdwqnam mam hoo ngulv nulam kvvnwb hog hwdgo svngal doodwn hvbkalam nulvkam looxiam ngulam kvvnwb svngal doodwk hvl ngulug dookub pui baqanam mam tapa tvl;

⁷ngulug vbw-bor tulu, ngulv nulug mwwjwngam tatwl, ngulug nyelin hentwr henam aoho ngulv hemp al mwwpa do.

⁸Hoggab nulv sija biimab At Swg uraho dood nyiloqkam ngulug swwgv.

⁹Ngulv ngulug Pwnboam nulug gab; paqkin do. Nulug pagoqho mwwg galoqkv ngulug hemp kaapa ko-gab ngulv mwam paqdwn.

¹⁰Aal aiyib nulug nyuqtuq-mooram kaapa mvdwb jitbvk hvl hoo nulug mwwjwngam koi mvdwb jidynam mam jitwk hvl ngulv mwam xumdul doodwn.

¹¹Sija ngulug Pwnbo Ab mwv atv hoo At Sw Jisu ngulam nulug dookub wk lamtangam kaakin tvbwk hvl bedwn.

¹²Hoqgv At Sw nulug pengko lo akwn akwn aby bomin sunam mam meeg yaiya koi mvdwb vigo jignvk hvl bedwn. Ngulv nulam hoggub abydvn hvbkalam nulvkam nyi mwlwngam aby boto.

¹³Hoqgv nulam mwv ator torm dvb jitayin hoo nulv Pwnbo Abwg kaagaho niqtuq doonbo hoo dvrwqbo nyiib At Sw Jisu Kristo mwv mwwg dvrwqbo nyi tulungam boolayil ipoq dvk aalam nulam dvrwq dvb kaapa gvnka.