Read Nyishi 1 TISSOLONIKA 4 Bible Online

1 TISSOLONIKA 4 - Nyishi bible

1 TISSOLONIKA 4

¹Ngulug vbw-bor tulu, bitwr benya so, nulv hoggub nyil Pwnbog hangam xumdwb nyitayin hoq pagoqkam nulv ngulug tomswrnam mam tagab nukun, hoo nulv hoq hvbkalam nyil swwdu do. Hoqgab ngulv nulam At Sw Jisug emin gab hoqhvb kvda vigo nyil swwtwk hvl xuml biywr dvn.

²At Sw Jisu galoqkv ngulv nulam tomswrnam gamlam jitkun ham nulv cengdo.

³Hoggab Pwnbog hang mwwnamv, nulam dvrwqb swwm dvb mwwdwn hoo nulam yocu-yabio nyinam mam ogum nyisiq maab dootwk hvl bedwn.

⁴Nulug pengko lo nyi vxiv hoggub nyil mwwg atwg nywxw lvgab swwtayin hoo hoggub dvrwq bvla xinam gob nyil dvrwqb swwtayin ham cengdwb nyidwn.

⁵Hvbmabde Pwnboam cengmabo Nyoodo nyi tulug nyinam hvb atwg gv aiyaqg nyinw-mwnwnam hoqg nyerab swwmab.

⁶Hiyv kam atwg Kristan vbw-bor gon nyimurl xaalyo dvb pagoq kaacoql nyidwb nyima dvn. Ngulv soq bvrwq sam nulam otuqho bekin tukun ho ngulv nulam sija atorjaqb yvtw padwn ham nyimabv, hoggab hoqhvb nyin boam At Sw bulam laqm-baqmtayin. Hoggab Pwnbov ngulam kacib nyil swwm dvb dvgoq goqma, hvbmabde dvrwqbo nyiib nyil swwm dvb dvgoq goqpan.

⁷Pwnbov ngulam nyimur nyicil doom dvb goqma, hvbmabde dvrwql swwm dvb.

⁸Hoqgab hiyv nyiv soq tomswrnam pagoq sam haqdwn, mwv nyiam haqma dvn, hvbmabde hiyv mwwg Dvrwqbo Yalam nulam jidwn mwam haqdwn.

⁹Bwrm bor tulungam abynam pagoqkam nulam tomswrl ngo pota xeqdwb nyikma, hoggab akwn akwn aby bomin sunam pagoqkam nulam Pwnbov atv tomswrnam mam cengdo.

¹⁰Hoo nulv jvqtw jaqb soq pagoq sam nyikin banv Mesidoniya gvda lo doonbo nyi tulu mwlwngam kaakin do. Hvbmabde vbw-bor tulu, nulam xuml ngulv bedwn, hoqhvb kvda meeg yaiya koi alwb nyil swwto.

¹¹Swrsomalo swwl, nulug atwg kor pammam hingkib nyil door twnwr gvdwl, ngulv nulam benam hvb atwg swwgam kaato.

¹²Soq sib nyil nulv mwwjw maanbo nyi tulungam hingkib nyil swwto hoo nulv hiyv nvkam nulug pwwmako ho hingw dvb nyiram.

¹³Ngulug vbw-bor tulu, mwwgwnam doomabo nyi tulug hvb nyil, hang mwwdwql nulam doom dvb ngulv mwwma, ho sikbo nyi tulug pagoqkam nulam cengmab doom nwma.

¹⁴Hoggab Jisu sipekul lokta turab kunam, sam ngulv mwwjwdvn, hoqgab ngulv sam mwwjwdvn Jisun mwwjwl sikbo nyi tulungam Pwnbov mwwg lvgab bool wgtaikun.

¹⁵Ngulv sija nulam hognvkam tomswr gvdwn, soq tomswrnam si At Swg tomswrnamv; At Swg hookurnam gob simab turl doonbo nyi tulungv sikbo nyi tulungam ngulv hoggub nyilakam bulug otuqb wco nyoram.

¹⁶Hoggab hoq aalam rumd goqrwl ao gumtw tulug lvgab ao gumtw koibo akv ao gumtw tulungam boolayil ipoqnam mam hoo Pwnbog piul, dumdum-taal dul At Sw mwv ao gvda toloqgv ipoqtayin; hoq kokwb Kriston mwwjwl sinbo nyi tulungv otuqcob gorab taikun.

¹⁷Hoq kokwb ngulv simab turl doonbo tulungv doonyi ao tol At Swn kaapa taab bulug lvgab ngulam lokub doomwq aob jaarab wgtayin. Hoqhvb nyik nv ngulv kuiyum nwrba nagub At Swg lvgab dooba taikun.

¹⁸Hoqgab nulv soq agam sam mwwgab gvdwl akwn akwn biywr-bebial bet-belal dooto.