Read Nyishi 1 TISSOLONIKA 5 Bible Online

1 TISSOLONIKA 5 - Nyishi bible

1 TISSOLONIKA 5

¹Ngoqg vbw-bor tulu, ngo nulam hoq moodam hoo hoq aalam xeql jidwb nyima; hoggab hoqhv hwdam nyitayin ham cengma.

²Hoggab dvcobov aiyam hoggub nyil dvco cotab haadwn hoq hvbkalam At Swg haad Aalv nyitayin, ham nulv atv mwlwngv cingx pvqrwl doodo.

³Nyi tulungv, “Swrsomalo al dukun hoo alvku,” hvl betayin, hoq moodam cengma lvpab bulug sigv haatayin. Hoq si ko bwwta bo nyem cinc cinam hvb haqmapaq golo haatayin hoo nyi tulungv hoggub nyilakam bulug sig hoqgv keleq nyoram.

⁴Hvbmabde ngoqg vbw-bor tulu, hoq Aalv dvcobo hvb nyil nulam ruiyub kotwl lomduq dvb nyidwb, nulv kan uraho dook maabv.

⁵Hoggab nul mwlwngv hutog ko tulungv ho aalwg ko tulungv. Hvbmabde ngulv ai hoola kanwg nyi kuma.

⁶Hoqgab ngulv nyi asaqg hvb yubdul dook yooju, hvbmabde huul hengabl hvvmin gvdwl dootju.

⁷Nyi tulungv aiyam sulak yubdwn ho nyi tulungv aiyam sulak bulv twwxum dvn.

⁸Hvbmabde ngulv aalwg hutog nyiv, hoqgab ngulv mwwjwnan la abynan soruqkam gvtwl hoo ywwt ywwnam mam mwwgwnan bopyangam bentwl hvvmin gvdwl dootju.

⁹Hoggab Pwnbov ngulam mwwg hang lengnam nyiib nyil swwm dvb xuqmanum, hvbmabde ngulug At Sw Jisu Kristo galoqkv ywwt ywwnam swwgam kaapa mvdwb ngulam xuqlin pakun.

¹⁰Mwv haai kukam ngulv simab turl doojaqkam sik jaqkam Kristog lvgab turl dooba mvdwb mwv ngul gab sinkun.

¹¹Hoqgab nulug sija nyidul doonam hvb nulv akwn akwn biywr-bebial bet-belal lwcup-lvkabl haakam bepa minsul svka kamin suto.

¹²Ngulug vbw-bor tulu, ngulv nulam mvnyi-moiyul bedwn, hiyv nyi tulungv nulug pengko lo bon nyidwn hoo At Swg bonam nyim dvb la nulam kvvyw-tada mvdwb jipan hoq nyi tulungam ayab kaato.

¹³Bulam xima vrram xil bulug bonam nyinam gab bulam aby bog dvl hindy alwb swrsomalob nulv doobamto.

¹⁴Ngulug vbw-bor tulu, ngulv nulam xuml bedwn, kvtaq rvpaqb nyil swwma boam bulam belam becam yvtw pato, hang pwnyo bo nyi tulungam biywr-bepam gvdwl haakam bepato, ator maanbo nyi tulungam svka to, ho nyi mwlwngam cwql swwto.

¹⁵Hengab to, hiyvkam hiyv akgon almab nyik gab almab kalam nyilwq maabv, hvbmabde akwn akwn al minsul mwlw gab looxiam alko pagoqkam nyidwb nulv mwwgabto.

¹⁶Lwxiam hemp pokyto,

¹⁷xumnam mam apaq maabv,

¹⁸hog mwlw nyitaq luuxy pagoqho paqyalinco paql swwto, hoggab soq si Jisu Kristog aoho Pwnbog nulgab hang mwwlwqnamv.

¹⁹Dvrwqbo Yalam mvtur maabv;

²⁰nyiqry kanam agam mam anam maabv.

²¹Hog mwlwngam poodil kaaka to, alboam nootul doogto

²²hoo almanbo hoolu luuxiam apaqto.

²³Swrsomalongam jinbo Pwnbov nulam hindy alwb dvrwq dvb hog mwlwho ap gvnka hoo ngulug At Sw Jisu Kristog haad aalam nulug yvjam, yalam, ho gv ayaqkam hog kac doom maab dvrwq jaqb doom dvb rvkil ap gvnka.

²⁴Hiyv nulam dvgoq goqnum hoq ak hv mwv sam nyitayin, hoggab mwv mwwjw dvb nyidwn.

²⁵Vbw-bor tulu ngul gabkam xumt bvka.

²⁶Vbw-bor tulu mwlwngam mwwjw boam ngulug dvrwqbo moopupnam lvgab moopupl salam jitka.

²⁷Ngo nulam Atwg emin gab xuml bedwn, soq pota sam mwwjwbo nyi tulu mwlwg agaho poory rikinto.

²⁸Ngulug At Sw Jisu Kristog anyangv nulug lvgab doonka.