Read Nyishi JOSUA 1 Bible Online

JOSUA 1 - Nyishi bible

JOSUA 1

¹At Swg nyera Mojes sixo kokw so, Mojesg dvqsiqkv Nunwg ko tuup Josuanvn At Sw benum,

²“Ngoqg nyera Mojes sin kuba. Hoqgab sija Israel nyiilungam bulam ngo jitanam gvda urab, no la soq nyiilu mwlw si soqgv gorabto, ho Jordon kvdaqb rabto.

³‍Ngo Mojesnvn dingr kunam hvbjaq, nulug lvc saml dapko gvda mwlwngam ngo nulam jipa kun.

⁴‍Soq Lebanon deexa-rara soqgv koibo Iupratas pobu namgub, Hittait nyi tulug gvda mwlw hoqgv naarab layil dou-haagag Koibo Sa-svlo namgub noqg gvda gob nyitayin.

⁵‍Noqg swwca bumpw ho nyi akkam nam ceekol dvqrwq dvb nyinbo dooram. Ngo Mojes lvgab hoggub doobanam hvb ngo noqg lvgab dooba tayin. Ngo nam apaqram ho nam haqpaq ram.

⁶‍Atorto hoo haakam to, hoggab ngo bulug ab tulungam gvda jidwb dingr kunam gvdaho no soq nyiilu sam otu naam dvb nyig tayin.

⁷‍Ator bvla haakam twqto, ho ngoqg nyera Mojes nam gaml jikjaqb no pvvb tulu ham hengab jaqb nyito. Hoqho no laqc-lvqbwqb kwxwq-bvwr maabv, ho no hoqb wjaqkam no aljaqb niqtuq lengyi nvpv.

⁸‍Soqg Pvvb Kitap sam noqg agam hoqgv wleq mvmabv, hvbmabde ham no aal-aiywb hingkib kvvi-kaamil dooto, ho hoqho hoggv xeqk jaqb ham no hengab jaqb nyito. Ho noqg nyinam-wnamv swwta-geetayin, hoo no aljaqb niqtuq nyilin lengtayin.

⁹‍Ngo nam gaml jimanam yv? Ator to hoo haakam to. Vcwr gokam bos maabv, hoo hang homabv, hoggab noqg Pwnbo At Sw no hog loqb wjaqkam noqg lvgab dooba dvn.”

¹⁰‍Hoo Josua nyiilug saab tulungam gaml jinum,

¹¹“Svmcwg lvpa raab wpeq gvdwl nyiilungam gaml jito, ‘Nulug dvs-twwsam mwx-mvaqto, hoggab aal loum uraho nulv Jordonam rablayil nulug Pwnbo At Sw nulam gvda jinam mam gumn otu gob naadwb nyitayin.’”

¹²‍Hoo Reuben nyi tulungam, Gad nyi tulungam hoo Manasse nyi tulu papo gon Josua benum,

¹³“At Swg nyera Mojes nulam gomcwr benam mam mwwgab to, ‘Nulug Pwnbo At Sw nulam doonu ko nyookam jitayin hoo nulam soqg gvda sam jitayin.’

¹⁴‍Nulug nywxw tulungv, nulug ko tulungv, hoo nulug tuun-mee tulungam nulv Jordon kvtinb rama taab Mojesg nulam jinum gvdaho bulv dootayin, hvbmabde nulug pengko ho nyob palaqbo mwlwngv nulug vbw-bor tulu gab rabco layil hoo bulam svka tayin,

¹⁵‍At Sw nulam jinam hvb nulug vbw-bor mwlwngam gvda jima deedy dib, hoo nulug Pwnbo At Sw bulam jinam gvda ham bulv kam gvdangam gumn naatayin. Ho nulam gumn naam dvb jinam gvdab nulv wkur tayin hoo ham gumn naatayin, At Swg nyera Mojes nulam dou-cagag Jordon kvtinwg gvdangam jinam ham.”

¹⁶‍Hoo bulv Josuanvn birwqnum, “Noqg gaml jinam mwlw ham ngulv nyitayin, hoo no ngulam hog loqb kanam tayin hoqb ngulv wtayin.

¹⁷‍Ngulv Mojesnvn tvjwl svvnam hvb, ngulv nam tvjwl swwtayin. Mwv Mojes lvgab doobanam hvb, noqg Pwnbo At Sw noqg lvgab dooba twqn ka!

¹⁸‍Hiyv lajaqkam noq gamlam taleql ceekol hoo noqg mwam gomcwr jinam mam tvjw maan bov sidwb nyitayin. Ator to hoo haakam twqto.”