Read Nyishi JOSUA 10 Bible Online

JOSUA 10 - Nyishi bible

JOSUA 10

¹Jerusalemwg lvpw at Adoni-jedek, Josua hoggub Ai bopam mam naareql hoo ham twrkiq-twrmal twryumnam mam, ho Aiyig lvpw at tulungam, Jeriko lvpw at tulungam mvnam mam, hoo hoggub Gibeon ho doonbo nyi tulungv Israel lvgab swrsob doobam dvb pvvb mvnam mam tapa kalam twqda,

²‍mwv vc loodab bosnum, hoggab Gibeon hv koibo xinam bopam ak gob nyinum, hoo hoqhv Aiyam vigo koi yaanam, hoo hoqg nyi tulungv nyob pvxwl nyob paky bo tulungv.

³‍Hoqgab Jerusalemwg lvpw at Adoni-jedek Hebron lvpw at Hohamnvn, Jarmut lvpw at Piramnvn, Lakiswg lvpw at Japianvn, hoo Eglonwg lvpw at Debirnvn nyi kanaml begamv,

⁴“Ngam haag dvl hoo ngam svka tvbv, hoo Gibeonam nyob patuj. Hoggab bulv Josuanvn la Israel nyiilug lvgab swrsob doodwb pvvb mvpa ku.”

⁵‍Ho Amor nyi tulug lvpw at ang-gv, Jerusalem gv lvpw atv, Hebronwg lvpw atv, Jarmutwg lvpw atv, Lakiswg lvpw atv, hoo Eglonwg lvpw atv, bulug sipaiyv lvkin gob hookum nv Gibeonam ceekol nyob padwb svmcw muiyum tvl doog kunum.

⁶‍Hoo Gibeonwg nyi tulungv Josuag svmcw dook Gilgal ho nyi kanam tvl begamv, “Noqg alaqkv noqg nyera tulungam svka maab doonu maabv. Ngulug dookub nyebia jaqb haal dvl hoo ngulam ywwlin tvb hoo ngulam svka tvb, hoggab diisw gvdaho doonbo Amor lvpw at tulungv lvkin gob ngulam ceekol nyob pata do.”

⁷‍Hoqgab Josua Gilgal hoqgv mwv la mwwg lvgab nyob palaqbo nyiilungam la atorb nyob paky bo nyiam boolayil wnum.

⁸‍Hoo At Sw Josuanvn benum, Bulam bos maabv, hoggab noqg alaqho bulam ngo jipa kun. Bulug nyi akjijaqkam noqg agaho dvqrwq nyoram.”

⁹‍Hoqgab Josua nyebia jaqb Gilgal hoqgv ai yupw wnv Gibeon ho soolwqnum.

¹⁰‍Hoo Israel nyi tulug agaho At Sw bulam mwwdar-mwwpar mvma dvb mvnum, ho hiyv bulam Gibeon ho vc loodab jwwnum hoo bulam Bet-horon namgub ruqcanum hoo bulam Ajeka la Makkeda namgub mengnum.

¹¹‍Hoo bulv Israel nyi tulug aga hoqgv keknum, bulv hwdlo Bet-horon namgub keca yukho, At Sw doa toloqkv wlw hwdbo nyodo taa-ngam hol mvnv bulam Ajeka namgub hoiyaq mvnum, hoo bulv siknum. Israel nyiilungv lyoqr orioq hoqgv mengnam mam koi yaab bulam nyodo taa-ngv hoxnum.

¹²‍Hwdlo At Sw Amor nyi tulungam Israelwg ko tuupwg alaqho jilwq yuk hoq aalwg hoq moodho Josua, mwv Israel nyi tulug agaho benum, “Doonyi no Gibeon ho biimab dooiya to, hoo pool no, Aijalon gv Lywpa ho dooiya to.”

¹³Hoo bulug ceebio tulungam bulv ree daqnam gob, doonyiv biimab doonum, hoo poolv kam biimab doonum. Soq sam Jasarwg kitap xeqp maap nvi yv? Doonyiv doa lvpa ho biimab doonum hoo aal loog taqp namgob nyebiab haamab doonum.

¹⁴‍Hoq aal hvb nywywngam otuqho nyika maanum, hoggab At Sw nyi akwg benam yalam tanum, ho At Sw Israelwg nyiilu gab nyob panum.

¹⁵‍Hoqgab Josua la mwwg lvgab wba bo nyi mwlwngv Gilgal svmcwb wkur kunum.

¹⁶‍Soq lvpw at ang si bulv atv kela yukul Makkeda lwwpwq ho kvsil doonum.

¹⁷‍Hoo ham Josuanvn betamnum, “Lvpw at angngam kaapa paku, bulv Makkeda lwwpwq vv kvsil doodo.”

¹⁸‍Hoo Josua benum, “Lwwpwqg ungngam wlw pwt boloq duqg dvl duqtum to hoo ham nyi loq rvkil daqg mvto,

¹⁹‍hvbmabde nulv atv hoqho doodu maabv. Nulug ceebio tulungam ruqmin gvto; bulam kaol rvky bo tulungam mengto. Bulam bulug bopam ho haam mvmabv, hoggab nulug Pwnbo At Sw bulam nulug alaqho jilwq pakun.”

²⁰‍Ho Josua la Israelwg ko tuup tulungv bulam mingtwr twrxa dvb mengnum, hoo bopam tulug gurum uraho boumnam mwlwngam mengnum,

²¹‍ho Josuag nyiilungv Makkeda svmcw ho cum-cumb haaknum. Nyi akjijaqkam Israel nyiilungam ceekol agam goomanum.

²²‍Ho Josua benum, “Lwwpwq ungngam ngurkoq gvdwl hoo lvpw at angngam lwwpwq hoqgv ngoqg dookub boa to.”

²³‍Hoo bulv hvb nyiknv, hoo Jerusalemwg lvpw atam, Hebronwg lvpw atam, Jarmutwg lvpw atam, Lakiswg lvpw atam, hoo Eglonwg lvpw atam mwwg dookub soq lvpw at ang sam lwwpwq hoqgv boa jinum.

²⁴‍Hoo hwdlo soq lvpw at tulu sam Josua dookub boa yukho, Josua Israel nyi mwlwngam goqkumnum hoo mwwg lvgab wbal nyob pagbo mwlwg peelo bo akam benum, “Ogumb hvvnwq to; noqg lvpiangam soq lvpw at tulug lwwpo so caadaq to.” Ho bulv ogumb hvvnwqnv bulug lvpiangv lvpw at tulug lwwpo ho caadaqnum.

²⁵‍Hoo Josua bulam benum, “Bos maabv ho hang homabv; ator to hoo haakam to. Hoggab hiyv nulam ceekol nyob pan boam At Sw nulug ceebiongam laqm-baqm tayin.”

²⁶‍Hoo kokw ho Josua bulam mengnum hoo bulam sidwb mengnum, hoo mwv bul angngam svvn tuluho paqyinl apnum. Hoo bulam svvn ho bulv ariyum namgub paqyinl apnum.

²⁷‍Hvbmabde doonyi haata yukho, Josua gaml jitwl bulug svmangam joopoq layil bulam bulug kvsil dook lwwpwq ho joolwq kunum, hoo bulv lwwpwq gambam wlw lvgab ngurtumnum, hoqhv soolo godab doodwn.

²⁸‍Mekkedangam Josua hoq aal dara ho mviya kunv, hoo hoqg lvpw atam lyoqr orioq hoqgv mengnum. Mwv nyi mwlwngam twryumnum; mwv nyi akkam doom mvmanum. Hoo Jerikog lvpw atam mvnam hvb mwv Makkedag lvpw atam mengnum.

²⁹‍Ho Josua la Israel nyi mwlwngv Makkeda hoqgv wpeq layil Libna gvdab haanum hoo Libnangam ceekol nyob panum.

³⁰‍Hoo At Sw hoqg gvdangam la hoqg lvpw atam Israel nyi tulug alaqho jilwq kunum. Hoo mwv lyoqr orioq hoqgv hoqg lvpw atam la nyi mwlwngam mengnum, mwv nyi akkam doom mvmanum. Hoo mwv Jerikog lvpw atam mengnam hvb hoqg lvpw atam mengnum.

³¹‍Ho Josua la Israel nyi mwlwngv Libnab wpeq layil Lakis gvdab haanum hoo Lakisam naareqnum hoo ham ceekol nyob panum.

³²‍Hoo At Sw Lakisam Israel nyi tulug alaqho jilwq kunum, hoo mwv loonyi aalho ham naareq kunum hoo mwv lyoqr orioq hoqgv Libnangam mvnam hvb nyi akkam doom mvma dvb mengnum.

³³‍Ho Gejerwg lvpw at Horam Lakis sam svka taab haanum. Hoo Josua hoqg lvpw atam la mwwg nyiilungam akkam doom mvma dvb mengnum.

³⁴‍Ho Josua la Israel nyi mwlwngv Lakis wpeq layil Eglon gvdab haanum. Hoo bulv ham naareqnum hoo ham ceekol nyob panum.

³⁵‍Hoo bulv ham hoq aalho naareq kunum, hoo lyoqr orioq hoqgv mengnum. Hoo mwv Lakis sam mvnam hvb hoq aalho nyi mwlwngam twryum kunum.

³⁶‍Ho Josua la Israel nyi mwlwngv Eglon hoqgv Hebronwb wnum. Hoo bulv ham nyob panum

³⁷‍hoo ham naareq kunum hoo lyoqr orioq hoqgv hoqg lvpw atam la pamda tulungam, hoo hoqg nyiilungam mengnum. Eglonnvn mengnam hvb mwv nyi akjijaqkam doom mvmanum, hoo nyiingam la hoqham twrkiq-twrmal twryumnum.

³⁸‍Ho Josua la Israel nyi mwlwngv Debir wkurnv ham ceekol nyob panum

³⁹‍hoo mwv hoqg lvpw atam la hoqg pamda tulungam naareq kunum. Hoo bulv bulam lyoqr orioq hoqgv nyi mwlwngam twryumnum; mwv akjijaqkam doom mvmanum. Hebronam la Libna lvpw atam mvnam hvb mwv Debirg lvpw atam mengnum.

⁴⁰‍Hoqgab Josua diisw gvdangam hoo Negeb gvdangam hoo haapa nyookam hoo puutu-hulu gvdangam naareq kunum hoo hoqg lvpw at tulungam mengnum. Israelwg Pwnbo At Sw gaml jinam hvb, mwv saql doonbo nyi akjijaqkam doom mvmab twryum kunum.

⁴¹‍Hoo Kades-barnea hoqgv meng rablayil Gaja namgub bulam mengnum, hoo Gosen gvda hoqgv Gibeon namgub mengl kunum.

⁴²‍Hoo Josua lvkin cwqnyi ho soq lvpw at tulu sam bulug gvdangam naareq kunum, hoggab Israelwg Pwnbo At Sw Israel gab nyob panum.

⁴³‍Ho Josua la Israel nyi mwlwngv mwwg lvgab Gilgal svmcwb wkur kunum.