Read Nyishi JOSUA 11 Bible Online

JOSUA 11 - Nyishi bible

JOSUA 11

¹Hwdlo Hajorwg lvpw at Jabin sam tapa yin, mwv Madonwg lvpw at Jobab dookub, hoo Simrong lvpw at dookub, hoo Aksap gv lvpw at dookub nyi kanamnum,

²‍hoo nyoodum daiyag diisw gvdag lvpw at tulu dookub, hoo Cinnerotwg nyooko daiya Araba, hoo haapa gvdab, hoo dou-haagag Napot-dor namgub,

³‍ho dou-caga haagag Kanaan nyi tulungam, Amor nyi tulungam, Hittait nyi tulungam, Perijj nyi tulungam, hoo diisw gvdag Jebus nyi tulungam, hoo Mijpa gvda urag Hermon hoqg Hibitait nyi tulungam, nyi kanamnum.

⁴‍Hoo bulv bulug sipai tulu lvgab lengnum, bulug sipaiyv vcjaqb koinum, hoqhv sa-svlo sugurg xuqx hvb mvqlwnum, bulug svpur rvla ceriotv naleqnum.

⁵‍Hoo soq lvpw at tulu si maqkin gob Israelam nyob padwb nyibnv bulv lvkin gob Merom iss kucw ho svmcw mvl doonum.

⁶‍Hoo At Sw Josuanvn benum, “Bulam bos maabv, hoggab aaram mam soq mood so Israel nyiilungv bul mwlwngam mengm dvb ngo jitayin. No bulug svpur tulungam xikum-xilum mvtayin hoo bulug ceriot tulungam wm lvgab rampaq tayin.”

⁷‍Hoqgab Josua la mwwg nyob pvxwl nyob paky bo nyi tulungv Merom iss kucw ho bulam haqma paqb nyob panum hoo bulam bulv munyiub kunum.

⁸‍Hoo At Sw bulam bulug Israelwg alaqho jiknum, ho bulam mengnum hoo bulam Koibo Sidon gvla Misrepot-maim namgub, hoo dou-caga daiyag Mijpe Lywpa namgub ruqmin gvnum. Hoo bulam bulv mengnum, hoo mwv nyi akjijaqkam doom mvmab mingtwrnum.

⁹‍Hoo At Sw hoggub benum hvb Josua bulam mvnum: mwv bulug svpur tulungam xikum-xiluml mvnum hoo bulug ceriot tulungam wm rampaqnum.

¹⁰‍Hoo Josua wkur banv hoq moodho Hajoram naareqnum hoo hoqg lvpw atam lyoqr orioq hoqgv mengnum, hoggab otuqho Hajor hv mwlwg lvpw-hatiam atorl koi yaanum.

¹¹‍Hoo lyoqr orioq hoqgv hoqho doonbo nyi mwlwngam bulv mengnum, bulam twryum kunum; saql doonbo akkam dook maanum. Hoo mwv Hajoram wm lvgab rampaqnum.

¹²‍Hoo soq mwlw bopam tulu sam la hoqg lvpw at tulungam Josua naareqnum, hoo lyoqr orioq hoqgv bulam mengnum, At Swg nyera Mojesg gaml jik jaqb bulam twryum xaanum.

¹³‍Hvbmabde Israel nyiilungv diisw gvdaho doonbo bopam tulungam wm rampaq maanum; Hajor arongam Josua wm rampaqnum.

¹⁴‍Hoo soq bopam tulu soqg nyob pal naareqnam dupum-dvrab pam la tuun-meengam Israel nyiilungv naanum. Hvbmabde bulv nyi mwlwngam lyoqr orioq hoqgv bulam twryum maady deedib mengnum, hoo bulv akkam saql doon boam apaq maanum.

¹⁵‍At Sw hoggub mwwg nyera Mojesnvn gaml jinum, ho Mojes Josuanvn gaml jinum, hoo Josua hvbjaq nyiknum. At Sw Mojesnvn gaml jinam mam mwv akkam nyimanam doomanum.

¹⁶‍Hoqgab Josua gvda mwlwngam naaknum, diisw gvdangam hoo Negeb mwlwngam hoo Gosen gvdangam la haapa nyookam hoo Arabangam la Israelwg dook diisw gvdangam la haapa nyookam naaknum

¹⁷‍Seir daiya ho daqlin bo Halak Puutu hoqgv naalayil Hermon Puutu akog Lebanonwg Baal-gad Lywpa namgub naaknum. Hoo mwv soq gvda tulug lvpw at tulungam naareqnum hoo bulam jwwl-pal bulam sidwb mengnum.

¹⁸‍Josua soq lvpw at tulug lvgab nyob panum.

¹⁹‍Gibeon ho doonbo Hibait nyi tulungam apaq tvl, bopam akkam Israel nyiilug lvgab swrsob doobam dvb pvvb mvmanum. Bulv soq bopam tulu sam nyob pal naaknum.

²⁰‍Hoggab At Sw soq nyi tulug hangam kamtwr dvb mvgam gab bulv Israel nyiilungam nyob paky dvb mwwnum, ho bulam aya mwwpa maadwb nyob pam layil twryum mvdwb At Sw Mojesnvn gaml jiknum.

²¹‍Hoo Josua hoq moodho haalayil Anakim nyi tulungam diisw gvda hoqgv, Hebron hoqgv, Debir hoqgv, Anab hoqgv, hoo Judag diisw gvda hoqgv twryumnum. Josua bulam la bulug bopam tulungam twrkiq-twrmal twryum kunum.

²²‍Israel nyiilug gvdaho Anakim nyiv akkam dook maanum. Hvbmabde anyo go mee Gaja ho, Gat ho, hoo Asdod ho doonum.

²³‍At Sw Mojesnvn agam goonam hvb Josua gvda mwlwngam naaknum. Hoo Josua ham Israel nyi tulug nyob-nyobam xibwql xilin jitwl gumn naam kunum. Hoo gvdangv nyob pakmab doonu kunum.