Read Nyishi JOSUA 13 Bible Online

JOSUA 13 - Nyishi bible

JOSUA 13

¹Sija Josua vigo axa kunv vnywngv wknum, hoo At Sw mwam benum, “No vigo axal vnywngv wdku, hoo gvdangam gumn naasv vigo doxiq do.

²‍Soq gvda tulu sam naasv doxiq dvn: Palistan swsw-saakam mwlwngam, hoo Gesur nyi tulug gvda mwlwngam

³(Ijipt gv dou-caga daiyag, Sihor hoqgv Ekronwg nyoodum gvda vrr namgub, hoq mwlw sam Kanaan nyi tulug gvda gob xitaq gvdwn; hoqham lvpw at ang go pvvb bwwl doogdvn, hv Palistan, Gaja, Asdod, Askelon, Gat, hoo Ekron) hoq lvgab Abbim tulu ngvkam,

⁴‍Kanaan nyi tulug nyooko daiyag gvda mwlwngam, hoo Sidon nyi tulug Mearangam, Amor nyi tulug Apek vrr namgub,

⁵‍hoo Gebalait nyi tulug gvdangam, hoo dou-cagag Lebanon mwlwngam, hoqgv Hermon Puutu akog Baal-gad hoo Lebo-hamat namgub,

⁶‍ho Lebanon diisw gvda hoqgv Misrepot-maimho doonbo gvda mwlwngam, ho Sidon nyi tulug gvda mwlwngam naadwb nyinum. Ngo atv jaq bulam Israel nyi tulug aga hoqgv ruqlinl ruqpaq tayin. Ngo nam gaml jiknam hvb Israel arongam gvdangam gumn naam tai kun.

⁷‍Sija hoqgab soq gvda sam Israelwg nyob kiyangam la Manasseg nyob papo gon gumn naam tayin.”

⁸‍Manasseg nyob papo gon, ho Reuben nyi tulungam la Gad nyi tulungam Mojes dou-cagag Jordon kvtin ho gvdangam gumn naamnum, hoqhvb At Swg nyera Mojes bulam jinum:

⁹‍Aroyer hoqgv Arnonwg Lywpa vrr namgub, hoo lywpag ra lvpa bopam mam, hoo Medeba hoqgv Dibon lywpa namgub;

¹⁰‍hoo hiyv Hesbon ho pvvb bwwl doogbo Amor nyi tulug lvpw at Sihonwg bopam tulungam, hoqgv Ammon nyi tulug gvda vrr namgub;

¹¹‍hoo Gilead, hoo Gesur nyi tulu gvla Maakat nyi tulug swsw-sangam, hoo Hermon Puutu mwlwngam, hoo Basan mwlw hoqgv Saleka namgub;

¹²‍hiyv Astarot hoola Edrei ho pvvb bwwl doogbo Basanwg lvpw at Og (mwam aro Repaim ho boum tvl apaqnum); soq tulu sam Mojes mengl hoo bulam ruqlinl ruqpaqnum.

¹³‍Hvbsujaqkam Israel nyiilungv Gesur nyi tulungam la Maakat nyi tulungam ruqlinl ruqpaq maanum, hvbmabde Gesur nyiv la Maakat nyiv soolo godab Israelwg pengko ho doodwn.

¹⁴‍Lebi nyob arongam Mojes gumn jimanum. Mwv mwam benum, Israelwg Pwnbo At Swn boyuqnam pwr jinam mam bulv gumn nvvsiq tayin.

¹⁵‍Hoo Mojes Reubenwg nyob nyiilungam bulug imiq-imiqkam otu jinum.

¹⁶‍Hoqgab bulug dwrbu-dwryangv Aroyer hoqgv Arnonwg Lywpa vrr namgub, hoo lywpa ra lvpag bopam namgub, hoo Medeba lywpa dwaq namgub;

¹⁷‍ho Hesbon lvgab hoqg lywpa ho bopam doonbo mwlwngam; Dibon, hoo Bamot-baal, hoo Bet-baal-meon namgub,

¹⁸‍hoo Jahaj, hoo Kedemot, hoo Mepaat,

¹⁹‍hoo Kiriataim, hoo Sibma, hoo Jeret-sahar aog diisw lywpa namgub,

²⁰‍hoo Bet-peor, hoo Pisgag puutu gunum-gvnam, hoo Bet-jes imot namgub,

²¹‍ho soq tulu si lywpag bopam tulu mwlwngam, hoo hiyv Hesbonam pvvb bwwl doogbo Amor nyi tulug lvpw at Sihon, hiyvg lvgab Mojes Midianwg nyigbo tulu, Ebi la Rekem hoo Jur hoo Hur hoo Reba, Sihonwg lvpw atwg ko tuup tulungv, hiyv gvdaho doonum.

²²‍Nyiqry kaal nyoky hiqnbo Beyor gv ko tuup Balaam nvkam lyoqr orioq hoqgv Israel nyiilungv bulug meng pengko ho mengtaq kunum.

²³‍Hoo Reubenwg nyiilug gvda vrrv Jordonv. Soq sam Reubenwg nyiilungam bulug imiq-imiqkam bulug bopam mam nampam tulungam otu naamnum.

²⁴‍Mojes Gadwg nyob nyiilungam bulug imiq-imiqkam otu jinum.

²⁵‍Bulug dwrbu-dwryangv Jajer, hoo Gileadwg bopam mwlwngam, hoo Ammon nyi tulug gvda taqcgon, ho dou-cagag Rabbag Aroyer namgub,

²⁶‍hoo Hesbon hoqgv Ramat-mijpe hoo Betonim, hoo Mahanaim hoqgv Debirg dwrbu-dwrya namgub,

²⁷‍hoo Bet-haram, Bet-nimra, Sukkot, hoo Japon lywpa namgub, ho Jordonwg vrr hoqgv Hesbonwg lvpw at Sihonwg lvpw-haty namgub, ho Jordonwg dou-cagag ako daiyag Cinneretwg Sa-svlo namgub naamnum.

²⁸‍Soq si Gadwg nyob nyiilungam bulug imiq-imiqkam bulug bopam mam la nampam tulungam otu jinum.

²⁹‍Hoo Mojes Manasse nyob papo gon otu jinum. Manasse nyiilungam imiq-imiqkam otu jinum.

³⁰‍Bulug swsw-saakv Basan mwlwngam naalayil Mahanaim namgub, Basanwg lvpw atwg lvpw-haty mwlwngam, hoo Basan uraho doonbo camx bopam mam la Jair pamda mwlwngam,

³¹‍hoo Gilead taqcgon, hoo Astarot, hoo Edrei, ho Basanwg lvpw at Ogwg lvpw-hatig bopam mwlwngam jinum. Soq nyiilu sam Manasseg ko tuup Makir nyiilungam jibwq kunum. Sam Makirg nyi papo gon bulug nyob hoolu hoqgv naanum.

³²‍Soq tulu sam Moab lywpag Jordon otuqg dou-caga Jeriko ho bulam otu jibwqnum.

³³‍Hvbmabde Lebi nyob tulungam Mojes otu jimanum; mwv bulam benum hvb, Israelwg Pwnbo At Sw bulug gumn otungv.