Read Nyishi JOSUA 14 Bible Online

JOSUA 14 - Nyishi bible

JOSUA 14

¹Soq tulu sam Israel nyiilungv Kanaan gvdaho gumn naanum, hogloq ham nyub Eleajar la Nunwg ko tuup Josua hoo Israel nyiilug nyob peelo bov bulam bulug ab-ab dvparam gumn naam dvb jinum.

²‍At Sw Mojes alaq hoqgv bulam gumn naam dvb gaml jinam hvbjaq kiya leq papo nyob tulungv tak cingkal naanum.

³‍Hoggab Mojes nyob vnyi gola papo gon Jordon kvtin ho gumnam jinum, hvbmabde Lebi nyi tulungam bulug pengko ho otu jimanum.

⁴‍Hoggab Josapg nyiilungv hoolu loonyinum, Manasse la Iprayim. Hoo Lebi nyi tulungam gvdaho gumn jimanum, hvbmabde dook bopam tulungam aro la bulug tuun-meengam ww dvkam la bulug dupum-dvrab pam jinum.

⁵‍At Sw Mojesnvn gaml jinam hvb Israel nyiilungv nyiknum; bulv gvdangam jibwq kunum.

⁶‍Ho Gilgal ho Judag nyiilungv Josua dookub haanum. Hoo Kenijj nyi Jepunne gv ko tuup Kaleb mwam benum, “Noqgab la ngoqg pagoqkam Kades-barnea ho Pwnbog nyi akam Mojesnvn At Swg benam mam no cengdo.

⁷‍Ngo vnyw campy kunum hwdlo At Swg nyera Mojes ngam Kades-barnea gvdangam mvqky-maqlam mvm dvb kanamnum, hoo ngo mwam jvqtw pui agam mam baqa jinum.

⁸‍Hvbmabde ngoqg vbw-bor tulungv hiyv ngoqg lvgab wmin gvnbov nyiilug hangv hoxanum; hvbsujaqkam ngoqg Pwnbo At Swn ngo bumpwb nyimin gvnum.

⁹‍Hoo Mojes hoq aalho dingrwl begamv, ‘Hoggub nyijaqkam noqg lvpia sampnam gvda ham noqgab la noqg ko tulu gab nwrba xaqb otu nvvsiq mvtayin hvnum, hoggab noqg Pwnbo At Swn no bumpwb nyimin gvpa ku.’

¹⁰‍Hoo sija, kaato, At Sw mwwg bekjaqb ngam swwl doodwb jipa, hwdlo Israelv deexa-raraho wdu yikho, soq agam sam At Sw Mojesnvn goonamv vnyw campy leq nywng duku. Hoo sija, kaato, ngo vnyw cam piin leq nywng dukun.

¹¹‍Mojes ngam kanam yuk aalho atornam hvb sija kam ator xiqdwn; ngoqg otuqg atornam hvb sija ngo atordvn, wkur-wxil nyob pad bvkam huqlwngv doxiq dvn.

¹²‍Hoqgab sija At Swg hoq aalho benam diisw gvda sam ngam jitbv, hoggab hoq aalho no Anakimv koibo gurum tulungam bulug bopam tulungam mwiywq tvl doonam mam tapanum. At Sw ngoqg lvgab dooba yin pv, hoo At Swg benam hvb ngo bulam ruqlin ruqpaq tayin.”

¹³‍Ho Josua mwam lvqc cinum, hoo Jepunneg ko tuup Kalebnvn mwv Hebronam otu jinum.

¹⁴‍Hoqgab soolo godab Kenijj nyi Jepunne gv ko tuup Kaleb Hebronam otu naaknum, hoggab Israelwg Pwnbo At Swn mwv bumpwb nyimin gvnum.

¹⁵‍Otuqho Hebronwg eminam Kiriat-arba hvnum (Arba Anakimwg pengko ho mwlwngam koi yaan nyi akwb nyinum.) Hoo gvdangv nyob pakmab swrsob doonu kunum.