Read Nyishi JOSUA 17 Bible Online

JOSUA 17 - Nyishi bible

JOSUA 17

¹Ho Manasse nyiilungam jibwq deenam mam jiknum, hoggab mwv Josapg tuup vbw cociqkv. Manasseg tuup vbw cociq Makirnvn, Gileadwg abam, Gilead ngamla Basanam jibwq kunum, hoggab mwv nyob paky bo nyi akv.

²‍Hoo Manasseg nyiilu tuugin bulug nyob dvpar-dvparam jibwq kunum, Abiejer, Helek, Asriyel, Sekem, Heper, hoo Semida. Soq tulu si Josap ko tuup Manasseg nyob dvpar nyega ko hosiqkv.

³‍Sija Manasseg soq ko tuup Makir, Makirg ko tuup Gilead, Gileadwg ko tuup Heper, Heperwg ko tulu Jelopehad ko tuup doomanum, hvbmabde nyem ko arongv doonum, hoo mwwg nyem ko tulug eminv: Mahla, Noa, Hogla, Milka, hoo Tirja.

⁴‍Bulv nyub Eleajar nvla Nunwg ko tuup Josua nvla nyigbo tulungam benum, “At Sw Mojesnvn gaml jinum ngulug vbw-bor tulug lvgab ngulam otungam jitbv.” Hoqgab At Swg agam gooknam hvb bulug ab tulug vbw-bor tulug pengko ho bulam mwv otu jiknum.

⁵‍Hoqgab Gilead la Basan gvdangam xipaq tvl, Manassengv Jordon kvtin gonho wyw gota otu naanum,

⁶‍hoggab Manasseg nyem ko tulungv mwwg ko tuup tulug lvgab otungam naamin gvnum. Gilead gvdangam Manasse nyiilu tuugin jibwql jiknum.

⁷‍Manasseg dwrbu-dwryangv dou-cagag Sekem daiyag Aser hoqgv Mikmetat namgub wcnum. Ho nyooko hoqg gvda vrrv En-tappua nyi tulug dook namgub wcnum.

⁸‍Tappuag gvdangv Manasse gab doonum, hvbmabde Manasse vrrwg Tappuag pamdangv Iprayim nyiilu gab doonum.

⁹‍Ho Kana kucw namgub vrram rwlnum. Soq nyooko kucwg Manasse bopam tulug pengko ho Iprayimg bopam tulungv doonum. Ho Manasseg nyoodum daiyag gvda vrrv pobu kucw namgub caanum hoo sa-svlo ho vrram rwtupnum,

¹⁰‍nyooko daiyangv Iprayim gv hoo nyoodum daiyangv Manasse gv, ho sa-svlo lvgab hoqg gvdangam vrnam. Nyoodumv Aserho, hoo dou-cagangv Issakarho wcnum.

¹¹‍Issakar la Aser hookam Manasse ngv Bet-sean mamla hoqg nampam tulungam, hoo Ibleam mam la hoqg nampam tulungam, hoo Dorho doonbo tulungam la hoqg nampam tulungam, hoo En-dorho doonbo tulungam la hoqg nampam tulungam, hoo Taanak ho doonbo tulungam la hoqg nampam tulungam, hoo Megiddoho doonbo tulungam la hoqg nampam tulungam; oum deenv Napat.

¹²‍Hvbsujaqkam Manasseg nyiilungv soq bopam tulu sam otu naanyi maanum, hvbmabde Kanaan nyi tulungv gvda so hvraqb dookynum.

¹³‍Hwdlo Israel nyiilungv atorb swwi kukho, bulv Kanaan nyi tulungam nyera-paqn hvb bon nyim dvb mvnum, hvbmabde bulam twrkub ruqlinl ruqpaq maanum.

¹⁴‍Ho Josapg nyiilungv Josuanvn agam gool begamv, “At Sw ngam lvqc cigam gab, ngoqg nyiilungv naleq sukjaqkam, hoggub no ngam gvda akin go otu naam dvb jipa kun?”

¹⁵‍Hoo bulam Josua benum, “Noqg nyiilungv mvqlw paloqkam, no atv nyorob caag dvl, hoo Iprayim gvdangv noqg gab anyo paloqkam, Perijj nyi tulu ngvla Repaim gvdangam noqg atgab mwbin suto.”

¹⁶‍Josapg nyiilungv benum, “Diisw gvdangv ngul gab jotram. Hvbsujaqkam hiyv Bet-sean la hoqg nampam tulungv hoo Jejreel Lywpa ho doonbo Kanaan nyi tulungv yoqdwr ceriotam doogdo.”

¹⁷‍Ho Josapg imiq dvparag Iprayim mamla Manassengam Josua benum, “Nulv nyiilungv mvqlw do hoo vcjaqb huqlw doodwn. Nulam gvda akin go aro jibwqram,

¹⁸‍hvbmabde diisw gvdangv nul gvku, hoggab hoqhv nyoro sujaqkam, nulv ham mwbin tayin hoo hoqham aado kiyo dvb vrr rwl otu naato. Hoggab Kanaan nyi tulungv yoqdwr ceriotv doog sujaqkam hoo bulv ator sujaqkam, nulv bulam ruqlinl ruqpaq tayin.