Read Nyishi JOSUA 18 Bible Online

JOSUA 18 - Nyishi bible

JOSUA 18

¹Ho Silo ho Israelwg nyiilu mwlwngv lvkin gob hookumnum hoo hoqho kvvrwq minsko tombu ak mvpnum. Naareq kunum gvdangv bulug agaho doonum.

²‍Hoqho Israelwg nyiilu pengko ho nyob kvn go otu jisv dooxiqnum.

³‍Hoqgab Josua Israel nyiilungam benum, “Hog hwd oyu go nulv doonu tayin, nulug ab tulug Pwnbo At Sw nulam gvdangam gumn naam dvb jima namyv?

⁴‍Nyob vxy hoqgv nyi loq oum go xuqlin to, hoo ngo bulam gvdangam odum-akob gvqyiql kaam dvb kanam tayin. Bulug otu naadynam mam bulam hingky alwb hoqham xeqm tayin, hoo ngoqg dookub haam to.

⁵‍Bulv hoqham kvn gob mvpin-mvra tayin. Judangv mwwg nyooko daiyag dwrbu-dwrya ho dooky tayin, hoo Josapg imiq dvparv nyoodum daiyag dwrbu-dwrya ho dooky tayin.

⁶‍Hoo nulv gvdangam kvn gob mvpin-mvra tayin hoo hoqham hingky jaqb xiqtunam mam ngoqg dookub bwa to. Hoo nulug Pwnbo At Swg agaho ngo nulgab tak cingtayin.

⁷‍Lebi nyi tulungv nulug pengko ho otu naamin gvram, hoggab bulug otungv At Sw nyub gob swwtayin. Hoo Gad la Reuben hoo Manasseg nyob papo gon dou-cagag Jordon kvtin ho bulug otungam naaknum, ham At Swg nyera Mojes bulam jiknum.”

⁸‍Hoqgab nyi tulungv gorabl hoo wnum, hoo gvdangam xeqdy bo tulungam Josua tomswrl begamv, “Gvdangam odum-akob gvqyiql kaatwl hoo ham hingky jaqb xeqtu to hoo ngoqg dookub hookur to. Hoo At Swg agaho nulgab ngo Silo ho tak cingtayin.”

⁹‍Hoqgab nyi tulungv wnum hoo gvdangam odum-akob gvqyiql kaatwl hoqg pamda tulungam kvn gob mvpin-mvra dvb kitap ho hingky jaqb xeqknum. Ho bulv Josua dook Silo svmcw ho haaknum,

¹⁰‍hoo At Swg agaho Josua bul gab Silo ho tak cingnum. Hoo Josua, Israel nyiilungam gvda jidy sanam mam bulam nyob vxiam jiknum.

¹¹‍Benjaminwg nyob nyiilu gab tak cinglinam gvdangv, Judag nyiilu ngvla Josapg nyiilug dwrbu-dwryag pengko ham cinglinum.

¹²‍Bulug nyoodum hoqg vrrv Jordon hoqgv doorabnum. Ho Jerikog nyoodum daiyab caatayin, ho dou-haagag diisw gvda namgub caanum, hoo hoqg vrrv Bet-abenwg deexa-raraho rwtupnum.

¹³‍Nyooko daiya hoqg vrrv Luj daiyab wpeqnum, (hoqhv Betel), ho Atarot-addar namgub rwlnum, nyooko daiyag vrrv Akog Bet-horon puutu aob wnum.

¹⁴‍Ho taqcgonwg vrrv taqcgonwb wnam, Bet-horon taqcgonwg dou-haagag nyooko daiyag puutu hoqgv nyooko namgub doonum, hoo hoqhv Kiriat-baal (hoqhv Kiriat-jearim) ho vrr rwtupnum, hoqho Juda nyiilug bopam ak doonum. Soq si dou-haaga hoqg vrnamv.

¹⁵‍Hoo nyookog vrrv Kiriat-jearim lvvg hoqgv vrram rwrabnum. Hoo hoqg vrrv Epron hoqgv Neptoag iss namgub vrnum.

¹⁶‍Ho vrrv puutu hoqgv rwl kunv Hinnomwg Ko tuupwg Lywpa namgub iknum, hoqhv Repaim Lywpag nyoodum daiya ho doonum. Hoo hoqg vrrv Hinnomwg Lywpab iknv Jebus nyi tulug gordub rwbo layil, hoo En-rogel ako daiyab rwlnum.

¹⁷‍Ho hoqg vrrv nyoodum daiyag En-semes daiyab wknum, hoo hoqhv Gelilot namgub wknum, hoqhv Adummim odum taqc ho doonum. Ho hoqhv Reubenwg ko tuup Bohanwg wlw diidaqko namgub iknum,

¹⁸‍hoo nyoodum daiyag Bet-araba gorbwb rwpeq layil Araba namgub iknum.

¹⁹‍Ho nyoodum daiyag vrrv Bet-hogla gorbw daiyab rwpeqnum. Hoo nyoodum daiyag vrrv Al Sa-svlo ho rwrnum, ho nyooko gv Jordon ho rwrnum: Soq sib nyooko daiya hoqg vrram rwknum.

²⁰‍Dou-cagangv Jordon ho vrr rwrnum. Soq si Benjaminwg nyob nyiilungam otu naam dvb jinam gvda vrr rwknamv.

²¹‍Benjaminwg nyob nyiilug dvparag bopam tulug eminv Jeriko, Bet-hogla, Emek-kejij,

²²‍Bet-araba, Jemaraim, Betel,

²³‍Abbim, Para, Opra,

²⁴‍Kepar-ammoni, Opni, Geba—camleq vnyi bopam tulu lvgab bulug nampam tulungv doonum:

²⁵‍Gibeon, Rama, Beerot,

²⁶‍Mijpe, Kepira, Moja,

²⁷‍Rekem, Irpeel, Tarala,

²⁸‍Jela, Ha-elep, Jebus (hoqhv Jerusalem), Gibea la Kiriat-jearim—camleq vpy bopam tulu lvgab bulug nampam tulungv doonum. Soq si Benjaminwg nyob nyiilungam otu nvvsiq mvdwb jiknamv.