Read Nyishi JOSUA 2 Bible Online

JOSUA 2 - Nyishi bible

JOSUA 2

¹Hoo Nunwg ko tuup Josua nyi vnyi go Sittim hoqgv mvqky-maqlam mvm dvb kanaml begamv, “Jeriko gvda amjaq wl dvl hingkib kaaka ta.” Hoo bulv wlayil meqjo bo Rahabpvk hvnam eminam namho haal bulv doonunum.

²‍Hoo hoqham Jeriko lvpw atam betamnum, “Kaato, Israelwg nyi tulungv gvdangam mvqky-maqlam mvtab soi si haal doopa ku.”

³‍Ho Jeriko lvpw atv Rahabnvn agam bilwqnv begamv, “Noqg nam uraho noqg dookub haanbo nyi tulu ham lvvgwb boolin to, hoggab bulv gvdangam mvqky-maqlam mvtab haapa ku.”

⁴‍Hvbmabde nyem hv nyi vnyiam boolayil kvsil apnum. Hoo mwn benum, “Jvqtw jaqb bulv ngoqg dookub haanum, hvbmabde bulv hog loqb wn kun ham ngo cengk ma.

⁵‍Hoo hwdlo toggoqkam mutum tai moodho nyi vnyiv wn kun. Bulv hog loqb wn kun ham ngo cengk ma. Bulam nyebiab ruqmin gvn, hoggab nulv bulam ruqtin tai.”

⁶‍Hvbmabde mwn bulam naaxo aob booca layil naaxo ho xoa kulub tvl wsw poolupl apnum.

⁷‍Ho nyi tulungv bulam Jordon pobu namgub ruqmin gvnum. Hoo ruqmin gvnbo nyi tuluhv wleq kalam toggoq viyap pam nyebia jaqb ciqtumnum.

⁸‍Nyi tuluhv yuma taab, mwn bulug dookub naaxab caonum

⁹‍hoo nyi vnyiam benum, “Ngo cengdo At Sw nulam gvdangam jipa kun, hoo nulam bosnamv ngulug ao si haapa ku, hoo gvda soq doonbo nyi mwlwngv nulug agaho jiqpaq duku.

¹⁰‍Hoggab hwdlo nulv Ijipt hoqgv leng yikho At Sw Swlw Sa-svlongam pwtwl xoodwb mvnam mam, hoo Jordon otuqho Amor nyi tulug lvpw at vnyiam Sihon nvla Og hiyam nulv twrkiq twrmal twrmnam mam, ngulv tapa paku.

¹¹‍Hoo ham tapa twqda kalam ngulug hangv hoxa kunum, hoo nulam dvqrwq dvb nyi haakam bo akjijaqkam doomanum, hoggab nulug Pwnbo At Sw, mwv doa aog hoo swcw niikumg Pwnbov.

¹²‍Ho sija, At Swg eminho ngam dingr tvb, ngo nulam aya yaal nyinam hvb, nulv ngoqg abwg imiqkam aya mwwpa tvbv, hoo ngam mwwr cwk mvdwb muxnam loq ak jipe bv

¹³‍ho nulv ngoqg abam la annam, ngoqg vbw-boram la any-bwrm mam, hoo bulug dvparam sig hoqgv ngulam ywwlin tayin hvl.”

¹⁴‍Hoo nyi vnyiv mwnwn benum, “Ngulug swwgv sidwb nyijaqkam noqgab ngulv sij tayin! Ngulug soq nyinam sam no nyi asaqkam betam mabaloqkam, ho hwdlo At Sw gvda sam ngulam jiyikun ngulv nam ayal hoo noqg lvgab dengky jaqb nyij tayin.”

¹⁵‍Ho mwn bulam oso lvgab pupum hoqgv sulu lvvgwb xempoq mvnum, hoggab mwnwg nammv bopamg sulu bviywrho mvtin tvl doonum, ho mwn sulu bviywrho doonum.

¹⁶‍Hoo mwn bulam benum, “Diisw gvdab wno, ho maalo nulam ruqmin gvnbov wrwq kamyi nvp yv, hoo alo ruqmin gvnbo tulungv wkur maady deedib aal loum go kvsil doota. Ho kokwngam nulv nulug atwg lamtab wn ku.”

¹⁷‍Nyega vnyiv mwnwn benum, “Noqg ngulam soq pagoq gab dingrwl benam sam ngulv nyimab nyiram.

¹⁸‍Kaato, hwdlo ngulv gvda uraso haaikam, no soq nwlw sam ngulam noqg xempoq mvk pupum so hiqgab tvl doom laka, hoo noqg abam la annam, noqg vbw-boram la noqg ab tulug imiq dvparam soq uraso bookuml doog laka.

¹⁹‍Ho noqg imiq nyi ak gon noqg nam hoqgv lamta ho lengl yvtwl, mwv siba loqkam, mwwg hijum gorgiam mwwg atwg dumpo ho haatayin, hoo ngulv pagy baqram. Hvbmabde noqg nam uraho doon boam hiyv ak gon alaq idaql meng baloqkam, mwwg hijum gorgiam ngulug dumpo so haatayin.

²⁰‍Hvbmabde no soq ngulug bon nyinam sam nyi asaqkam betam baloqkam, noqg ngulam dingrwl benam sam ngulv nyila kuram.”

²¹‍Hoo mwn benum, “Nulug gomcwr bekjaqb hoq tulu ham nyim to.” Ho mwn bulam kanam kunum, hoo bulv wleq kunum. Hoo mwn nwlwngam pupumho hiqgab tvl apnum.

²²‍Bulv wknv diisw gvdab wknum hoo hoqho bulam ruqmin gvnbo tulungv wkur maady deedib aal loum go dooiyanum, hoo ruqmin gvnbo tuluhv lamta mwlwho meegaqnum hvbmabde meepa maanum.

²³‍Ho nyi vnyiv wkur kunum. Bulv diisw gvda hoqgv ipoq laikul pobungam rabpeq kunv Nunwg ko tuup Josuag dook ho haaknum, hoo bunyiam hoggv xeq nyiknum ham hog mwlwngam bunyiv mwam betamnum.

²⁴‍Hoo bunyiv Josuanvn benum, “Jvqtw jaqb At Sw gvdangam ngulug alaqlo jipa ku. Hoo hoq lvgab gvdaho doonbo nyi mwlwngv ngulam bosil, hang hol tvmdwrl doodu deen.”