Read Nyishi JOSUA 20 Bible Online

JOSUA 20 - Nyishi bible

JOSUA 20

¹Ho At Sw Josuanvn benum,

²“Israel nyiilungam beto, ‘Ngo nam Mojes lvgab agam gooknum kigwl cwwgw ko bopam tulungam xuqlinl apto,

³‍ho hiyv haqma pa golo nyiingam mengb nyiloqkam, hoqb mengbo hv kilwq tayin. Minglwq deenbo nyi tulu hoqgv hoq tuluhv nulgab cwwgw nangob nyitayin.

⁴‍Mwv hoqg bopam ak golo kilwq tayin hoo bopam haagag toggoqho daqtwl bopamg nyi axa tulungam mwwg bvrwqkam bedwrl betayin. Ho bulv mwam bopam urab boa tayin hoo mwam dook ak jitayin, hoo mwv bulug lvgab hoqho dooba tayin.

⁵‍Hoo minglwq deenbov mwam ruqmin gvba lo, bulv mwam minglwq deenbo mwwg alaqho gvqlwqram, hoggab mwv mwwg door-doopwngam haqma pa golo mengnum, hoo mwam otuqho ceebio hang baqmanum.

⁶‍Hoo mwv bopam ho dootayin hwdlo mwam nyi tulug maqpar ho pw-hwwma deedib, ho hoq moodho nyub butub swwnbo hv sima deedib mwv ho dootayin. Ho nyi mengbo nyi ak hv mwwg atwg pamdab hoo mwwg atwg nammwb, mwv hog pamda hoqgv keknum hoqb wkur taikun.’”

⁷‍Hoqgab bulv Naptali diisw gvdag Galili ho Kedesam, hoo Iprayim diisw gvdaho Sekem mam, hoo Judag diisw gvdaho Kiriat-arba (hoqhv Hebron) bopam tulungam xuqlin kunum.

⁸‍Hoo Jordon lvvgwg dou-caga Jeriko ho, ho bulv Reubenwg nyob tulu hoqgv Bejer deexa-rara lywpangam, hoo Gadwg nyob tulu hoqgv Gilead gvdag Ramotam, hoo Manasse nyob tulu hoqgv Basan gvdag Golan ham xuqlin kunum.

⁹‍Soq bopam tulu sam Israelwg nyiilu gab la hoqgv bulug pengko ho nyoodo nyiilu gab xuqlinl ap kunum, ho hiyv ak gon nyiingam mengdum tvs mwwl mengma bov soqb kilwq tayin, ho mwam minglwq dvb nyinbo nyi alaqho mwv siram, hwdlo mwv nyi tulug maqpar pw-hwwk dvb daqlin maady deedib.